شخباركم بنيات 
بصطحبكم شوي ف رحلة ف عالم الولادة
طبعا المعلومات والصور اللي يتضمنها موضوعي هي ما تختص بمستشفى معين
هي تقريبا الطريقة المتبعه ف جميع مستشفيات السلطنة الحكومية
وبأمانه الموضوع مجهود شخصي من معلوماتي واغلب الصور من تصويري
يلا نبدأ
أكيد تبدأ رحلة الولادة مع بداية الألم
ألم الولادة ما جربته شخصيا بس يقولوا كما نوعية آلام الدورة بس اشد
في منكم اللي تتوجه المستشفى ع طول مع بداية الوجع ,, وفي اللي تفضل انها تجلس فالبيت شوي لحد ما يزيد اكثر الالم وبعدين تروح
وفي اللي تتأخر واجد وعاد تولد فالطريق او عند باب المستشفى 
وبالنسبة للبكر دايما نلاحظ امها وعمتها ينصحوها تجلس فالبيت بألمها وما تتسرع لأنها تآخذ وقت اكثر من غيرها
عموما راح ندخل ف التفاصيل اكثر
وكل حامل وهي تقرأ تتخيل نفسها عاد فالموقف 
طبعا لما تجين راح تتوجهين لطوارئ الولادة راح تدخلين قبل غرفه يسموها غرفة التقييم
فهالغرفة راح تتقيم حالتك ,,
- راح ينعمل لك تخطيط لدقات قلب الجنين للتطمن ع صحته
هذه صورة لبعض انواع اجهزة التخطيط
متصل بوايرين يثبتوهن ف بطنك واحد يقيس دقات قلب جنينك والثاني يقيس شدة انقباضات رحمك
وهذه صورتهم
والنتيجة تطلع ف ورقة من الجهاز ’’
- بيقيسوا ضغطك وحرارتك
وهذا بعد مثال لجهاز قياس الضغط
- وثالثا والاهم راح ينعمل لك فحص للرحم عشان يعرفوا كم مفتوح عندك الرحم وكيف وضعك بالضبط في مرحلة الولادة ,,
انا الحين اتكلم بالنسبة للحالة الطبيعيه يعني بالنسبة للحرمة الطبيعيه اللي ما عندها مضاعفات ,,
اللي عندها امراض ومضاعفات يمكن تنعمل لها اشياء زيادة بس اللي ذكرته هو الغالب حدوثه مع كل الحريم ,,
بالنسبة لفحص الرحم
ينعمل عن طريق الممرضة او الدكتورة
وهذا ال set المستخدم فالفحص
طبعا مثل ما شايفة مصكر ومعقم المرهم اللي جنبه هذا جل ضروري فالفحص عشان ما تحسي بأي ألم اثناء الفحص
وهذه صورة ال set وهو مفتوح من داخل وكل محتوياته معقمة لمنع انتقال الجراثيم وحدوث الإلتهابات
وهذه صورة للقفازات المستخدمه طبعا معقمة 100%
كيف يتم الفحص ؟؟
اللي تفحص تدخل صبعين السبابه والوسطى ف منطقة الرحم مثل الصورة
ما يعور ابدا بس اهم شئ تسترخي وتآخذي نفس عميق أثناء الفحص
من خلال هالفحص تتبين 4 أشياء ,,
1- طول عنق الرحم
2- كم سم منفتح
3- وضعية الراس ,, يعني بعده فوق او نازل وهكذا
4- الغشاء المحيط بالبيبي هل موجود او ما موجود خاصة اذا الحرمة نزل عندها الماي قبل ,,
عاد بعد هالفحص تتضح حالتك ويتضح وضعك
اذا كنتي بكريه والرحم مفتوح 1 سم او 2 سم راح يرجعوك البيت ويقولولك لما يزيد الوجع تعالي مرة ثانية وبنعيدلك الفحص 
بس اذا كنتي الولاده الثانية والثالثة وما فوق راح تتنومي وتكوني تحت الملاحظة فقط لحد ما ينفتح رحمك 
لان الغير بكريه المنطقة عندها تكون سهلة وعضلاتها ألين من البكرية لأنها مرت بولادة او ولادات سابقة ,, فولادتها متوقع انها تكون اسرع
اما اذا تبين من الفحص ان رحمك مفتوح 3 سم وما فوق طبعا خلاص تعتبري انك دخلتي مرحلة الولاده وراح ينقلوك لغرفة الولادة اللي راح تولدي فيها 
حياك الله ف غرفة الولادة تفضلي
طبعا الغرفة تكون لك وحدك وتكون معاك ممرضة طول الوقت تتابع حالتك وتطورات الولاده
والغرفة تكون مجهزة بكل شئ تحتاجيه ف ولادتك
مثلا
هالتروليات فيها الاغراض الضرورية للولاده
هذا ال set فيه حاجه تلبسها الممرضة عشان تكون معقمة وهي تولدك وفيه اقمشة ينحط فيه البيبي واقمشة تكون قريبة من منطقة خروج البيبي عشان كذاك تكون معقمة
وهذا يحتوي ع الادوات مثل المقص وغيره وطبعا نفس الشئ معقمة ,,
المهم خلال فترة وجودك الممرضة راح تقيسلك الضغط والحرارة باستمرار وراح تعيدلك التخطيط ع فترات وراح تعيدلك فحص الرحم اللي شرحته فوق ع فترات بعد
ممكن بعد تحطلك سقاية تغذيه عشان تعطيك طاقة
واذا كنتي تعبانه كثير وما تتحملي الألم في بعض الاشياء اللي تنسيك او تخفف عليك الألم
مثل هالجهاز
البالون الأزرق فيه غاز عبارة عن مكس اوكسجين + نيتروجين متصل بالانبوب الاسود اللي ف نهايته ماسك مثل ما شايفه بالصورة
تحطي الماسك ع انفك وفمك وخذي نفس عميق راح تحسي بالغاز ,,
طبعا بعد فترة من استخدامه بتحسي بدوار بس لا تخافي هذا طبيعي من تأثير الغاز بس ما يدوم تأثيره ,,
وبعد ما تولدي وتخلصي الماسك ينشال وينغسل وينظف ح الاستخدام الجاي من حرمة ثانية
وفي حل ثاني لتخفيف الألم اللي هي ابرة تريحك شوي اسمها pethadine
شخصيا انصح بهذه الابرة لانها تلين عضلات الرحم بعد وتساعد ع الولادة
اغلب الحريم ما يطيعن يفكرن مع هالابرة راح يروح اللألم وبالتالي تتأخر ولادتهن
بس غلط هالكلام ,, الألم يكون موجود بس انتي ما تحسي فيه تكوني متخدرة بعض الشئ لأن الابرة تدوخك
نجي الحين للحظة الولادة نفسها
طبعا فهاللحظة خلاص ماشئ دلع وغاز وحركات 
هاللحظة تعتمد عليك انتي فالدرجة الاولى
لأنه وقت الزفرة ,, وكل ما كانت زفرتك قوية كل ما كان الوضع احسن وتولدي اسرع
ما بشرح الوضعية اللي تكوني عليها لان الاغلب عارف الوضعية
بس لما تزفري حطي يدينك على افخاذك من تحت وشديهن صوب بطنك وزفري
بهالطريقة راح يتوسع الحوض ويكون المجال اكبر للبيبي انه يطلع
اذا كنتي بكرية راح تحتاجي قص للمنطقة مساعده لك عشان يطلع الراس لان المنطقة تكون ضيقة اول مرة
مثل الصورة
مثل ما شايفة القص يكون ع جانب
بس لا تخافي ما بتحسي بالقص لأن الممرضة بتخدرك موضعي فالمنطقة قبل القص
وهذا سائل التخدير
وعاد بعد الولادة راح يخيطوك ويزيدوك تخدير عشان ما تحسي
ما بس البكرية تحتاج قص ,, احيانا حتى اللي عندها ولادات سابقة تحتاج قص مثل البكرية
ف حالة ان البيبي حجمه كبير ,, أو هي مباعدة سنوات طويلة والمنطقة رجعت تتضيق
واللي عندهن ولادات سابقة اغلبهن ما يحتاجن قص بس اثناء خروج البيبي تصير عندهن جروح بسيطة احيانا تحتاج لخياطة اذا كان تنزف
واذا جروح صغيرة وما تنزف ما يخيطوها لأن وحدها تلتئم ,,
سمعتي بشئ اسمه شفط أكيد
الشفط هذا يشفطوا البيبي من راسه ,, يعني يظطروا يسحبوه لعدة أسباب مثل :
1- اذا التخطيط صار سيئ وراس البيبي مبين راح يسحبوه
2- او اذا كان الحرمة فترة طويلة تمت تزفر والراس ما يتحرك من مكانه يظطروا يساعدوها بشفط
هذه صورة بعض الادوات المستخدمه فالشفط
الدائرة الصفرا تتثبت فـ رأس البيبي ويسحبوه ,,
وفي جهاز ثاني يتوصل بالكهرباء
الحين راح نتكلم عن حبيب الحوامل
الطلق الصناعي 
متى الوحدة تحتاج للطلق ؟؟
1- اذا كانت داخله للولادة بس ألمها فجأه يروح او يكون خفيف وما كافي للولاده
2- اذا كانت معدية ع موعدها
3- اذا نزل عندها الماي وكملت 24 ساعه وما ولدت
في نوع الطلق اللي هو يكون مثل الجل من تحت يحطوه اذا كان الرحم منفتح 1 سم او 2 سم
بس اذا منفتح 3 سم يستخدموا طلق عن طريق السقاية
هذه صورة دوا الطلق
هذه الغرشة الصغيرونه مخوفتنكن وااااااااااخسارتكن ,,
ينضاف الدوا للسقاية ويمشي مع السقاية ويبدأ يأثر عاد
بس نفس الألم الطبيعي ماعرف ليش بعض الحريم مهولات الموضوع
العملية القيصريه
شو الاسباب اللي تستدعي العمليه ؟؟
1- احيانا الوحدة داخله تولد طبيعي عادي بس فجأه التخطيط يضعف مال البيبي
2- وضعية الجنين اذا كان الراس فوق
3- المشيمة نازلة واجد وتتسبب في نزيف
4- البيبي حجمه كبير
5- او الوحدة عندها عمليتين سابقات
بعد ما تولدي سواء طبيعي أو عملية
البيبي الحلو راح ينحط فهالسرير
مزود بوسائل تدفئه عشان ما يفقد حرارة
مثل ما شايفين فهالصورة الجهاز اللي فوق السرير يطلع حراره
وراح ينعطى ابرة فيتامين K بعد الولاده مباشرة
وينحط ع صراره هالشئ
وتتعبأ هالاوراق بيانات الطفل او الطفله
وبث ,,
مع تمنياتي لكل حامل ولادة سهله
ودعواتكم ,, تعبني هالموضوع 
وللامانه الموضوع منقول من منتدى اخر 
04-23-2012, 03:13 PM
تعرفي على دليلك في يوم ولادتك
طال@عمري 
.gif "40")
رد: تعرفي على دليلك في يوم ولادتك
جديد منتدى إستفسارات مرحلة الولادة
العرض العادي
