السلام عليكم و رحمه الله وبركاته
اولا كده بدعي لنفسي و لكل مشتاق ربنا يرزقنا بالذريه الصالحه
انا اول مره خدت الحقنه التفجيريه دي كانت في دوره ابريل و كانت في اليوم ال14 من الدوره و تم الجماع علي مواعيد الدكتوره حددتها طبعا خدت الحقنه تاني يووم هوب ظهرت الاعراض كانت كالتالي:
1-ارتفاع في درجات الحراره
2-دوخه و نووووم كتير
3-اكتئاب
4-كثره دخول الحمام
5-الغثيان
6-وجع في المبايض و الرحم
7-افرازات كريميه بيضا و قبل الدوره افراز بني خفيف
8-ضيق من جوزي
9-اختناق و صعوبه تنفس
10-بشتهي انواع من اكل و بحس بنفور من روايح واكل كنت بحبهم
11-وجع في الصدر
12-انتفاخ البطن و الصدر بشكل ملحوظ
13-لون البول متغير و ريحته نفاذه
14-صداع
انتو متخيلين بتعمل فينا ايه لدرجه قولت لنفسي الحقنه مش هتعمل ده كله اكيد عرض او 2 و الباقي ان شاء الله حامل فانا طبعا زي زيكو مقعدتش علي حيلي فضلت اعمل سيرش و شوف و اجمع خبرات و دلائل علي الحمل لحد ما وصلت لبنوته هنا كانت كاتبه انها عملت اختبار في اليوم ال11 من الحقنه و اتاكدت من غياب تاثيرها و عادته تاني في اليوم ال12 بدا يظهر لها خط خفيف طبعا انا من اليوم العاشر بليل جهزت اسلحتي كلها و جبت 5 او 6 اختبارات حمل و بدات الدوامه اللي مش بتخلص الصبح و بليل كله سلبي جيت في اليوم ال14 صبح عملت اختبار طلع خط خفيف قولت لجوزي طبعا فرح روحت حللت دم رقمي طلع صفر حزنت جدا و اكتر علي جوزي كان اتحمس جدا و الدوره نزلت الحمدلله رضينا و قولنا لعل في الشهر القادم جيت في شهر مايو في اليوم ال 12 من الدوره الدكتوره كتبتلي علي حقنه تنشيطيه و بعدها بيومين خدت تفجيريه تاني و بدات من تاني كانت الاعراض بقي
1-صداع بسيط
2-تغير لون البول و ريحته و كثره دخول الحمام
3-وجع في المبيض اللي خارج منه البويضه
4-ارتفع درجه حراره بعد الحقنه باربع ايام لمده 4 ايام
5-نوم كتير
6-اكل مخلل كتير جدا و اكل مالح لدرجه اللي حوليا شكو بحملي فعلا
7-خمول و كسل
8-افرازات في الاول جبنيه ثم كريميه ثم مدممه ثم كريميه
جيت تاني في اليوم العاشر عملت اختبار طلع خطين و خفيييف جدا جيت في 11 من الحقنه طلع سلبي و ال12 و ال13 ايجابي روحت ال14 احلل دم تاني قالي هتستلمب النتيجه بكره جربت اختبار تاني بليل طلع سلبي و الصبح طلع خط بسيط بالعافيه يتشاف ثم استلمت النتيجه طلعت صفر للاسف لتاني مره و قدر الله و ماشاء فعل و مازالت المحاولات مستمره الدوره عدي علي معادها يوم و لسه مجتش بس مش مشكله اللي حابه احكي فيه مع اي حد بيخوض تجربه الحقنه التفجيريه هي بتخلي الجسم حامل فعلا فيها هرمون حمل فكل الأعراض بنمر بيها و كل عرض بيتهيألنا اننا كده خلاص في حمل و بنتعلق بقشه ... من تجارب كتير جدا قرات و سمعت عنها طول ماحنا شغلين بالنا بالموضوع مفيش حمل بيحصل اول ما بنشيله من دماغنا سبحان الله بيحصل و بيكون مفاجأة. .. الموضوع محتاج تروي و طبعا السعي و اكيد اللجوء الي الله لان دي معجزته هو اللي بيخلقها
فلازم ندعي كتير و اللي هتاخد الحقنه دي لازم تفهم كويس انها هتعيشك ايام حمل حقيقيه فيها كل الاعراض فلازم تستمتع بالنوم فقط 😂😂😂 غير كده متبصش لشئ لحد ما دورتها تعدي بيوم فتبدا بقي تفتش هي مجاتش ليه و ان شالله ماجت 😂😂
لان خلال الشهرين دول انا نفسيتي تعبت من صدمات الاختبارات و زهقت و حزنت و ده اكيد هياثر عليا فضروري نحافظ علي استقرارنا النفسي و ندعي و نستغفر كتير جدا و ان شاء الله ربنا هيرزقنا كلنا بالذريه الصالحه اللي تقر اعيننا
و ان شاء الله اي حد محتاجه اي سؤال او استفسار انا موجوده و ياريت بس اللي يعدي علي موضوع يدعي لي و يدعي لكل مشتاق حتي لو بظهر غيب مش لازم تكتب رد
و لعل و عسي الشهر الجاي بنطمن بعض اننا نكون حوامل لكل اللي في منتدي و اللي بتقرا كلامي و اللي هتدعي لنفسها و لينا 😘
والسلام عليكم ورحمة الله وبركاته