السلام عليكم ورحمة الله وبركاتة
اخواتى انا فى البداية عايزة اقولكم ان دة تانى موضوع ليا فالقسم هنا
اول موضوع كنت شاكة انى حامل و مش طلعت حامل
انا تابعت مع دكتورة وكان عندى لخبطة هرمونات و تكيسات الحمدلله بعد علاج فترة
ومازال مستمر قل جداا عن الأول واللخبطة كمان اتعدلت والحمدلله فضل كبير من ربنا سبحانة وتعالي
انا موضوعي صعب شوية اتمني تسمعوة للأخر و تقفوا جمبي
انا فبداية زواجي كنت متخيلة ان عدم حملي بسبب انى كنت عاملة عملية اذالة كيس او ورم حميد من عالمبيض
العملية كانت وانا بنت قبل زواجي كمان و الحمدلله العملية تمت بنجاح و الدكاترة قالو ان مفيش اى مشكلة فى المبيضين و اني معنديش مشاكل فى الحمل والخلفة
بعد زواجي انتظرت فترة 5 شهور تقريبا ومفيش حمل روحت لدكتورة قالتلي ان العملية الى عملتها
ليها توابع وهي حدوث التصاقات و انسداد قناتي الفالوب ودة احتمال انة يحصل او لأ
كشفت عليا و عرفت ان فية تكيسات كمان عالمبيضين و ان درجتهم بتخلي البوييضة متنزلش كاملة
فبالتالي مش هيحصل حمل ف ادتني ادوية للتكيسات و الحمدلله هديت
وكان عندي ارتفاع ف هرمون الحليب و ادتني دوا ظبط الهرمون الحمدلله
و جت ف اخر شهرين
ادتني حقنة تفجيرية للبويضة بس البويضة حجمها تضخم جدا ل 41 والمفروض انها اما توصل ل 25 بتنزل تتلقح مع العلم اني كل شهرالبويضة كانت بتوصل ل 25 ف وقت التبويض ودة معناه ان الحقنة التفجيرية
اثرت بالسلب مش بالايجاب تانى شهر الدكتورة قالتلي خدي حقنة تفجيرية تانى انا رفضت وقلتلها انا حسة انها بتضر وبتلخبط عندى البويضة مش بتفيد قالتلى طيب خالينا الشهر دة بدونها ونشوف هيتم اية
الحمدلله التكيسات قلت جامد و البويضة وصلت لحجم ال 25 ونزلت عشان تتلقح بس لقيت البريود جاتلي
ومحصلش حمل روحت للدكتورة قالتلي انتي كدة كل حاجة اتظبطت التكيسات قلت خالص والبويضة نزلت كاملة ف معادها لية محملتيش؟؟!!
قلتلها طيب مش نستني شهر كمان قالتلي كان المفروض بيحصل حمل طالما مفيش مشكلة خلاص فبدأت ترجع ل موضوع العملية و ان يمكن يكون عندى التصاقات او انسداد ف قناة الفالوب
وطلبت مني اشعه صبغة و انا خايفة منها وفنفس الوقت عندى امل ربنا يكرمني بدون ما ادخل فالدوامة دى
اشعه الصبغه عرفت انها بتعمل التهابات وليها اعراض جانبية غير انها مؤلمة
انا قررت انى استني ومروحش للدكتورة ولا اعمل الاشعه بالصبغة دلوقتي غير لما ادى لنفسي فرصة
معلش طولت عليكم انا كنت محتاجة افضفض شوية واخد مشورتكم
انا حسة انى شايلة حمل كبير ف قلبي و نفسيتي كمان تعبانة لان فوق الى انا فية والدي توفي قريب
كنت اتمني يشوف احفادة وهو كمان كان دايما بيتمني دة
بالله عليكم انا طالبة منكم دعوة بظهر الغيب ف الشهر الكريم الى احنا فيه دة
انا كل الى اتجوزو ف نفس وقت زواجي و بعد زواجي كمان اللهم بارك حملوا ربنا يتمملهم على خير
وتعبت من اسألة الناس و كأن مسألة تأخر الحمل ب مزاجي انا هتم سنة حتى الأن زواج ولم يحدث حمل
الحمدلله على ما قدر لي و ربنا عالم انى شكراة وحمداه على كل حال بس املي فية كبير انة هيفرحني و يرزقني الحمل قريبا
ياااارب اللهم ارزقني الحمل السليم المعافي انا وكل مشتاقة للحمل ياااارب و قر عيننا بالزرية الصالحة يارب
انا اسمى نهى ادعولى ربنا يكرمني بالحمل السليم المعافى والزرية الصالحة الى بتمناها عاجلا وليس اجلا
ولو حد عندة اى نصيحة او رأى فاللي قولتة او مشورة انا مرحبة بيها
معلش طولت عليكم
وكل سنة وانتم طيبين