السلام عليكم جميعا
الحمد لله ولدت من 20 يوم تقريبا
طبعا غالبا الحوامل خصوصا البكرية ما تعرف فين حتولد
وأنا نفس هالشي ما قررت فين راح أولد إلا من تجارب الحوامل
لكن اكتشفت ان كل وحدة حتكون لها تجربة مختلفة تماما عما قرأت وسمعت
لكن ما يضر انقل لكم هالتجربة يمكن أحد يقتنع لسليمان فقيه واحد ثاني يرفضه
ملاحظة : انا على التأمين
بسم الله نبدأ ..
أنا كنت أراجع عند دكتورة وفاء في عيادات كافي ، للأمانة انا حبيتها هالانسانة
طبعا عيادات كافي ما يشملها التأمين لكن لأني ارتحت لها فقررت أكمل مراجعاتي عندها
كنت محتارة اروح معاها لمستشفى الزهرة أولد هناك ولا لا ..
مع مرور الوقت قررت اروح سليمان فقيه لأن تخديرهم ممتاز وما تحسي بآلام ..
رحت لدكتورتي مراجعة وقالت لي بدري ولسه باقي لك كثير لين تولدي ، ونصحتني أراجع بدري في سليمان فقيه
عشان يكونون متابعين وضعي ..
اتفقنا انا وزوجي اننا نروح يوم الأحد ، ولأني أراجع عندها وطمنتني أن وضعي تمام ما كنت مهتمة اروح أي دكتورة
سبحان الله إرادة ربي أن الجمعة تنزل موية الرأس ، ونتوجه انا وزوجي لسليمان فقيه ،
دخلنا طورائ الولادة ودخلوني طبعا غرفة الملاحظة ..
للأسف الدكتورة المناوبة جدا سيئة كانت ، ما اعرف اسمها بس تخيلوا جات تبي تتأكد أنها موية رأس ولا إفرازات
لما تأكدت أنها موية رأس اختفت ، وتخيلوا ننتظر أحد يجي يقولنا إيش حيصير ما في لا حياة لمن تنادي ، وزوجي بدورها في مكتبها يدور في الاسياب مو لاقيها وأنا نفسيا تدمرت 8 ساعات ولا أحد دخل عليا ما غير رابطيني في الجهاز الممرضات
المهم عدت نوبتها وجات نوبة الدكتورة شيرين ، انسانة جدا عطوفة ، طلبت اني انزل اسوي سونار عشان تعرف الرحم قد إيش مفتوح، وطلع مقفل تماما ، وقتها قالت لي عندك خيارين يا اما تنامي وترتاحي والصباح نعطيك طلق صناعي ، أو الآن نعطيك ، ومفعولها حياخذ وقت مو على طول ، قلت لها اني تعبانة ومحتاجة ارتاح لأن الجلسة في غرفة الملاحظة كتمتني وأتعبتني ، المهم أراد الله تنتهي نوبتها على وقت تحميلة الطلق الصناعي وجاتني دكتورة غيرها تعطيني اياها مو متأكدة من اسمها بس زوجي يقول تغريد عموما يدها كانت ثقيلة والمتني لكن حرام اظلمها ما أحوجنا نتعامل معاها غير وقت التحميلة ، بعدها ب 6 ساعات أراد الله أن نوبتها تنتهي وتجي دكتورة ثانية للأسف مو عارفة اسمها بس كانت مصرية ، كانت مستعجلة بس كانت رحيمة ، جات كشفت قالت لي 1 سم ، انا ببكي بعد التحميلة 1 سم !! خلال 6 ساعات !!
وطبعا كانوا مانعين عني الأكل والشرب وما نمت تمام فجلست أبكي اقولها انا ما عندي طاقة !!
حرام راحت وطلبت لي أكل ، طبعا قالت لي راح ننتظر 6 ساعات ونشوف ، انا عرفت أنه بعد ال6 ساعات حيقررون عملية قيصرية ، بس زوجي ما يبي يفجعني جلس يقول إذا بعد ال6 ساعات وما صار شي بينادون الاستشاري ويشربون إذا عنده حل ، قلت له ما بقي حل إلا العملية ، طبعا حاول يصرف وأنا مشيتها من خوفي
لما صار باقي على االمهلة ساعة قمنا انا وإياه نمشي في السيب عشان يحمى الطلق ، وكنت أتألم وتوقف كل كم دقيقة
طبعا غرف. الملاحظة قريبة من غرف الولادة ، وكنت اسمع صراخ الحريم واقوله مابي اروح هناك عشان الصوت >> خايفة والأصوات تزيد الرعب داخلي
واحنا نمشي إلا ام وحدة من اللي يصارخون تقول. ما عندهااااااا أحد !!!! << تقصد محد قاعد عند بنتها وهي تولد
أنا مو خفت، التفت على زوجي والدموع بعيوني اقوله ما عندها أحد !! بداية خير !!
استمريت على المشي ساعة تقريبا ، جات الدكتورة نفسها اللي حطت لي التحميلة الثانية بتكشف
لقاه الحمد لله 4 سم ، قالت لي خلاص نجهز ذحين غرفة الولادة لك ، وأنا خفت من قالتها واغرورقت عيناي بالدموع قالت لي مالك مش كنتي زعلانة لأنك ما ولدتيش ، دلوئتي زعلانة لأنك حتولدي !!
طبعا بدأ الخوف يعتريني ، دخلنا الغرفة انا وزوجي حقت الولادة ، صرت اقوله اني حاسة برأس الطفل قريب
وهوا يراقب الجهاز أرقام الطلق منخفضة فيحسبني أتخيل بسبب الكمام ، إلا الممرضة تصرخ دكتورة ولاااادة
وتدخل دكتورة شيرين '(
وجا دكتور التخدير معاها
الحمد لله من دخلت غرفة الولادة ما واجهت صعوبة ولا مشاكل بتيسير من ربي
طبعا تخديرهم فعلا روعة ما احس اني تعذبت في الولادة ..
اكيد في الم وتعب وارهاق ، بس من اللي أسمعه كنت أتوقع راح أتعب أكثر
بس نصيحة للمقبلين على التجربة ، مو مهم المكان قد ما يكون مهم إيمانك بالله قوي
كنت أردد خلال فترة الانتظار يارب أنا عارفة انه تكفير ذنوب وأنا راضية بقضاءك وكنت أردد
يارب تكون بنتي سليمة وهالتعب راح يختفي خلال ايام
وكنت افتح في يوتيوب سورة مريم ويس والزلزلة والملك في فترة الانتظار
والحمد لله رزقني الله ببنت جميلة سليمة الحمد لله