السلام عليكم ورحمة الله وبركاته
عساه اليوم الجمعة يكون خير وبركة عالجميع
حبيباتي عضوات ومشرفات منتدانا الغالي أشتقت لكم كثير
وفي البداية حبيت أشكر الأخت
أم زياد وأميره
عالمبادره الطيبه وطرحها موضوع لكي تدعون لي بالخير وتتسهل ولادتي في قسم استفسارات الولادة جزاكي الله الجنه فعلاً كنت محتاجة دعواتكم شكرا ياقلبي بصراحه أسعدني رؤية موضوعك.
وكذلك حبيت أشكر الغاليه أم تامر لأنها طمنتكم علي ونقلت لكم خبر ولادتي. في نفس قسم استفسارات الولادة
وهذي قصة ولادتي
طبعاً مثل ماكنتوا متابعين أخباري
أنا دخلت المستشفى بتاريخ 4/3/2014
على اساس يضعون لي بالون لتوسيع الرحم لأن كان الرحم فاتح بس واحد ونص وكنت بالاسبوع 38 ويبغون يسرعون ولادتي عشان سكر الحمل. المهم حطولي البالون من الساعه 10 الصبح لحد الساعه 10 ليلاً طبعاً البالون ياخذ 12 ساعه في عنق الرحم
طبعاً بدأت التقلصات وبدأ العذاب وانا على هالحال 12 ساعه ولاعطوني مسكنات ولا اي شيء وانا صابره ومتحمله على اساس يفتح الرحم واولد طبيعي وارتاح
المهم شالوا عني البالون و كشفوا عليا الساعه 10 بالليل
وكان الرحم فاتح بس 4 سم. قلت الحمد لله عالأقل فتح شوي
وقالوا ننتظر شوي يمكن يفتح بدون طلق صناعي لأن مثل ما انتو عارفين بمواضيعي السابقه خطر عليا الطلق وانا كنت والدة قبل قيصريه
المهم انتظروا عليا بس للأسف الرحم مافتح اكثر من 4. طبعاً بدأوا فيني تحريض وطبعاً كل هالفتره آلام وتقلصات ولادة تجي وتروح وكانت اقوى من قبل
ولما مافتح اكثر قالوالي راح نشق ماء الجنين عشان الرحم يفتح اكثر قبل مانحط طلق صناعي
طبعاً الطلق خلوه آخر شيء ممكن يلجأون له
وبعد شق ماء الجنين انتظروا كم ساعه كمان ورجعوا شافون العنق مفتوح ل 6 سم
وانا فرحت وتفاءلت خير وقلت واخيراً راح أولد طبيعي
ومسكت القرآن وقرأت سورة مريم وسورة يس وانا لسه بآلام ووجع
وبعدين رجعوا يكشوفا مع زيادة التقلصات قلنا اكيد فتح اكثر
لكن للأسفعنق الرحم ظل على 6. وعيا يفتح أكثر
طبعاً لجئوا للشيء الأخير وهو الطلق الصناعي بس الطلق عطوني نسبة بسيطه مجرد تحريض بسيط لأن مثل ماذكرت خطر على جرح القيصري السابق
وبعد ماحطولي الطلق وانا اتعذب اكثر فأكثر فطلبت ابره الظهر لأني خلاص احس نفسي بموت وانتهيت ومافيني طاقة أبداً.
وجابولي دكتور التخدير واخذت ابره الظهر وارتحت من الوجع
بس قالولي انهم عطوني ابره الظهر اللي هي بتنعطي جرعات بسيطه عالتوالي عشان احس بالتقلص شوي عشان وقت دفع البيبي ماكون متخدرة كلياً واعجز من الدفع
وطبعاً كنت احس بالتقلصات لكن كان محتمل عن العذاب اللي حسيته قبل ابره الظهر
وبعد الطلق بساعتين شافوا العنق وللأسف مثل ماهو 6 سم
قالولي ننتظر عليكي ساعتين فقط لاغير ان مافتح اكثر من 6 مانقدر نعطيكي ابدا طلق صناعي مرة ثانيه لأنه خطر عالرحم وعلى جرح القيصري لأن مكان الجرح عندي بدأ يتوسع وخافوا طبعاً يصير مضاعفات
وقالوا طبعاً راح نحولك قيصري
تخيلوا العذاب اكثر من يوم وانا بعذاب طلق وتقلصات وآخر شيء يكملونها بقيصري
يارب لطفك قعدت أدعي الله واصيح وقعدت اقرأ قرآن ومسكت المصحف واقرا سورة مريم وقرأت الزلزلة كذا مره. وامي وام زوجي معاي وقاعدين يبكوا معاي ويدعولي. لانهم شافوا كيف كنت أعذب وآر شيء راح يحولوني قيصري
بس رحمة ربي كبيره الحمد لله
بعد مرور الساعتين اللي عطوني لها مهلة انتظار على الولادة الطبيعيه رجعوا كشفوا عنق الرحم بعد الساعتين والحمد لله الحمد لله الحمد لله
لقوه مفتوح 8 سم. فقالتلي الدكتورة ان شاء الله بإذن الله راح تكون طبيعيه وحاولت تدخل ايدجها وتوسعلي شوي والحمد لله فتح 9 على ايدها
وبعدها بساعة رجعت وشافت والحمد لله لقته فتح عشرة وراس البيبي نازل وقالتلي الحين ابغيكي من تحسي بالتقلص حطي كل طاقتك بالضغط على تحت عشان تدفعي البيبي لأنه راسه خلاص نازل وشجعتني جزاها الله خير
والحمد لله بعد الشهيق والزفير كذا مره دفعت بأقصى ماعندي من قوة
وطلعت بنتي حبيبت قلبي. ربي يحفظها يارب
بس حابه انكم تدعولي مره اخرى. بنتي جاها بوصفار
وحالياً حبيبت قلبي كانت نسبته 6 وارتفع ألى ًُ12 وحطوها تحت الجهاز الخاص
ربي احفظلي اياها يارب وحالياً بعدني بالمستشفى جالسه معاها
ربي احفظها ربي احفظها يارب يارب