كل اللي باركولي الله يبارك فيكم ويسلمكم
واللي ولدوا الف الف مبروك والحمدلله على السلامه
واللي باقي الله يسهل لكم
الحمدلله بناتي طلعوا من اسبوعين
في البدايه تعبوني مره صياح وبكاء يصحوا سواء ويبكوا سوا وما كنت اقدر ارضعهم بصدري سوا ولان اوزانهم صغيره فما يقدروا يمصوا كويس وبسرعه وكنت اتعذب لمى اخذ وحده وارضعها واترك الثانيه حتى يجي دورها وتجلس تبكي
اقعد ابكي معها
ذحين الحمدلله صرت ارضعهم صناعي خصوصا ان حليبي جف وما صار فيه حليب وبديت اتعود
وذحين شايله هم لمى اروح لبيتي الان انا عند امي والحمدلله مرتاحه اذا تعبت اعطيهم الماما واختي وانام لكن بعدين ما ادري ايش اسوي بس ان شاء الله ربي بيسهلها
ايوه اللي سالوني عن اكشن ولادتي
انا ولدت يوم 17 شوال وما كنت متوقعه ولدت في الاسبوع 34 وموعد عمليتي كان في 38
لكن الحمدلله
ومثل ما انتم عارفين من رمضان وانا رايحه جايه من المستشفى
بسبب نقص اوزان بناتي والحبل السري احيان مايضخ دم كويس
وقبل ولادتي باسبوع جاتني حكه غريبه في كل جسمي وخصوصا باطن رجولي ويديني كنت ابكي منها وما اقدر انام
رحت للمستشفى وقالوا تنويم ع طول واحتمال نولدك لانه انزيمات الكبد مرتفعه وهي سبب الحكه وفي خطر على الاجنه
اذا مانزلت الانزيمات راح نولدك
جلست 3 ايام في المستشفى كانت طويله مررررره
اكتيبت فيها ونفسيتي تدمرت
كنت اشوف الحريم اللي تتالم من الطلق واللي تبكي واللي تستعد لولادتها القيصريه وشايله هم
وبكذا ما كنت اطلع من غرفتي عشان ما اتزم نفسيا
وما اشوف الحريم يتعذبون
بعد 3 ايام الدكتور كتب لي خروج خصوصا ان حالتي استقرت و قال موعد عمليتك في 12 ذو القعده كنت فرحانه كثير اخيرا بطلع من السجن وبروح لاهلي خرجت
جلست يومين ما اشتكي من الم ولا شي
في يوم 17 /10
جاني الم في ظهري من تحت صحاني من النوم على الساعه 4 الفجر
ما خلاني انام يروح ويجي بس ما هو منتظم
وما جاء في بالي انه طلق
لانه في بالي انه الطلق يكون المه في البطن والظهر
الموهم
جلس معي الالم يزيد لكن اقدر اتحمله
طبعا مر الظهر والعصر وهذا الالم مو راضي يروح بس يمسكني فتره ويروح فتره
وهنا بديت اشيك خصوصا انه صار شبه منتظم
ومن خوفي من المستشفى ولاني تعقدت منه وكرهته ما علمت احد وسكت
واقول في نفسي اكيد مو الم طلق
يمكن من الالتهاب اللي عندي
لمى جاء المغرب خلاص هنا انا انتهيت وصار الالم في ظهري وينزل في رجولي دخلت علي امي الغرفه وانا اتالم وابكي وقالت يله نوديك قلت لها لا ماني رايحه
الالم اللي فيه سببها الالتهاب مو طلق ولا تنسى انه انا في شهر ثمانيه وهذا طلق كاذب
على الساعه 9 الا ربع
خلاص ماعاد قدرت اتحمل
وداني زوجي المستشفى وامي معي
دخلت على الدكتور قرا ملفي قال انتي حامل بتوم و ولادتك قيصري والمفروض تكون بعد اربع اسابيع
قلت ايوه
قال الان لازم فحص داخلي
بعدين طلع الرحم عندي فاتح 8 سم
انا هنا انصدمت
قال لازم ولادة قيصريه
وليش ما جيتي بدري عشان انتي عندك جرثومه حمل وخايفين تنتقل للاجنه وكمان واحد من الاجنه راسه فوق يعني كذا انتي عرضتي نفسك والجنين للخطر
بعدها جلست ابكي خفت من العمليه
حطوني على الكرسي وركض على غرفة العمليات غيروا ملابسي اخذوا بيانتي
جاء دكتور البنج وقال لازم بنج نصفي ما ينفع كامل لانك مانتي صايمه وخايفين عليك من الكحه
وكان مصر على البنج النصفي
قلت خلاص وتوكلت على الله
اللي كانوا في العمليه كانوا كويسين معايه
خدروني نصفي وبدوا يشقوا بطني طبعا ما حسيت بالم
بس حسيت بسكين لمى بدوا يشقوا بطني بس بدون الم
وهنا بديت ابكي واصيح من الخوف واترجاهم يخدروني كامل
الدكتور يقول حاسه بالالم اقول لا
بس حاسه بكل شيء تسونه وخايفه مووت
وجلس يحاول يهدي فيني وانا بكا وصياح
وبعدين جاب ابره وقال خلاص ذحين راح تنامي وحطها في المغذي طبعا
الابره ماهي ابرة تخدير بس جلس يضحك عليه وعشان اهدى اشوي
بعدها جلست استنى متى بنام
اشوي الا واحس الدكتور يضغط على بطني ويعدها خرجت بنتي الاولي
وشفتها
كانت احلى لحظه في حياتي. شعور ما اقدر اوصفه في وقتها نسيت الخوف وجلست بس اتامل فيها بالنسبه لي كانت اجمل مخلوق شفته بحياتي
نسيت كل شيء حولي ونسيت العمليه والخوف اللي كان فيه طار
وبس تركيزي عليها
بعدها خرجوا بنتي الثانيه كانت اصغر من اختها
ياقلبي هيا
اشرت عليها وجابوا لها ولمست رجلها وبستها
ياحياتي هما
وجلسوا الممرضات يمسحواهم بمنشفه بعدين اخذواهم
جلست بعدهم نص ساعه
جالسين الدكاتره يخيطوا بطني
بس الخوف اللي كان فيه راح
بعدها طلعوني من غرفة العمليات وودوني للغرفتي
والحمدلله الان صار حملي وولادتي ذكرى
ربي يسهل لكم ولادتكم ويقر عيونكم بمن سكن احشايكم
اهم شيء تذكروا ان الله هو المسهل
ومهما صعب الامر فالفرج عند رب العالمين
وبما اني جربت الطلق الطبيعي وولدت قيصري يعني جربت الاثنين
بقولكم على حاجه الم الطلق تقدروا تتحملوه صح يوجع لكن مو زي وصف البنات لا تخافون وبعدين من رحمة الله انه يمسكك اشويه وبعدين يفك يعني تقدري ترتاحي
وحتى القيصري
بس الله يعينك على اول اسبوع وبعدين تقدري تعتمدي على نفسك ولو اضطريت تقدري تقومي بلاوازم مولودك
والخوف يابنات حاولوا تنسوه ولا تفكروا فيه بالنسبه لي انا تندمت على الخوف اللي خفته وهو اللي جاب لي الهم حتى اني نسيت ادعي ربي لمى كنت في غرفة العمليات وفوت على نفسي فرصه خصوصا انه دعاء المراءه اثناء الولادة مستجاب
انتوا توكلوا على الله وربي راح يكون معكم
الله يسهلكم ويقومكم بالسلامه انتو والبيبيهات
سامحوني طوووووولت عليكم
استودعتكم الله