السلام عليكم ورحمة الله وبركاته
انا من تجمع المتوقع ولادتهم بشهر ذي الحجة و مثل ما وعدتكم بنات تجمعي بنزل قصة ولادتي ببنتي وطبعاً أنا بكريه ..
بيوم عرفة سافرنا لمنطقة الأحساء وأنا من سكان الدمام بس نقضي العيد بالأحساء مع الأهل وصلنا الظهر وقضينا اليوم مع الأهل وفطرنا وربي يتقبل منا الصيام وبعدها قعدت مع حمواتي نجهز ليوم العيد وما كان فيني أي شي وبعدها رحت لغرفتي وقعد زوجي تعبان قال مابي أنام تو الناس الساعه 10 بخلي النوم ع الساعه 2 ارتاح كم ساعه ونقوم لصلاة العيد قلت أوكي اجل أنا بقوم اتروش واتنظف وهو نزل تحت وجمع الشباب عنده المهم وخلصت تروشت وعدلت شعري وقعدت أسوي منكير وبدكير لاظافري <~ رايقه حدي بس من بعد الشاور كان يجيني الم وأحس حركة البيبي زادت وبطني كل شوي يتغير وأقول بخاطري لا مابي أولد بالحسا كل شي مجهزته بالدمام "(
وجات الساعه 2 وأدق ع زوجي أقوله تعال نام فوق قالي فيك شي قلت لا مافيني شي والشباب يقولون له شكل فيها ولاده زوجتك روح لها ههههه كنهم حاسين المهم جاء الساعه 2 ونص وانسدح ع السرير وقال مره تعبان بنام لي ساعتين وشوي يشوفني أتوجع وقلت لا مافيني شي بس شكله دخل فيني هواء لان تروشت وطلعت بالمكيف وكل شوي الوجع يجي ويروح وبشكل منتظم وحاول فيني لين رحت المستشفى ودخلت ع الولادة ع لطول وكشفت شافته مفتوح 4 سم قالت خلاص ولاده اليوم وأنا أقول لااا وقعدت أصيح مابي أولد أبي أعيد ههههه
بعدين حطت التخطيط وقالت بعد شوي بشيله منك وقومي امشي امشي عشان تتسهل الولاده ورحت امشي بحديقة المستشفى واسمع صلاة الفجر وبعدين دخلنا نصلي بعدها طلعنا نمشي ونسمع تكبيرات العيد وصلاة العيد بعدين قلت خلاص تعبت بدخل ودخلت وكشفت شافته فتح 5 قالت بعد امشي ونروح نمشي داخل المستشفى الا ونشوف أم زوجي وابو زوجي جاين وخالتي تصيح ومفجوعه وقلت لها روحي عيدي وافرحي لا تحاتيني وكانو أهلي جاين بالطريق من الدمام بس ما حبيت أخرب عليهم العيد ولا حبيت أقول لهم الا وشوي تدق أمي علي وارد عليها وأعايد فيها وأقولها ترا أنا بالمستشفى بولد قالت لا تمزحين قلت والله بس عيدي وتعالي هههه بس هي ما قدرت وجاتني بس قد أنهم مسكوني وقالوا لي لا تقومين خلاص بنعطيك ابره تحمي الطلق وتسكن الألم وتفتح الرحم وعطوني وخلاص أحس دايخه تجيب النوم قامت أمي تقول هاذي الأبره مو زينه راح الطلق منها ههههه وقعدت على هالحاله لمدة ساعتين الطلق يرتفع بس ما أحس وراح مفعولها الا وتجي الدكتوره وتكشف وتقول مفتوح 7 سم وبعدين جات ونزلت المويه ومرررره دافيه سبحان الله وبعدين راحت وبدا الطلق يززديد وحطو علي الكمامة وبدو يجهزون الغرفه للولاده وطلعوا العدة وبدا الخوف وهم يعلموني كيف ادفع إذا فتح 10 المهم بعدين جات اكشفت قالت 9 بس الطفل نبضه قل وبرز ببطنك بخليك 20 دقيقه لين يجي الاستشاري الا انادي زوجي واقوله بنتي لا يصير فيها شي وهو يهديني وشوي تكلمه الدكتوره برا وتقوله ان كذا وكذا ويمكن عمليه وأمي قامت تصيح وتقول تعبتو بنتي من الفجر كان قررتو من زمان عمليه وشوي يجي الاستشاري ويقول خلاص عمليه وبعدين وقعت ع العمليه ووكلت امري لله واستودعت ابنتي الله وودعت أمي وزوجي وأنا دموعي تنزل ما قدرت أمسك نفسي لان شفت أمي تصيح وكني خلاص آخر مره بشوفها وبعدين وقفوني عند باب العمليات وجاء دكتور التخدير وقعد يقول كل عام وانتو بخير ويعرفنا بنفسه وسألني كذا سؤال إذا قد سويت عمليات أو معي أمراض وبعدها دخلوني وأشوف دكاترة كثير حولي ونيرسات ،،
وآخر شي شفت الساعه 12 الا عشر وشفت كمام وقالي الدكتور يلا خذي نفس وخذت قال أقوى وبعدها خلاص ما حسيت آلا برجال يقولي بدور جبتي بنت حتسميها ايه وأنا أقوله مدري وكني احلم مغمضه عيوني وأشوف سواد وشوي نقلوني العنايه طبعاً ما أحس وسمعت نيرس تقولي بدور بدور وتضربني وأنا ما صحيت الا دخل زوجي وقالي حمد الله ع السلامه وفتحت عيني وأنا دايخه قلت له شلون بنتي هي عايشه قال ايه ويبتسم لي ويقول اهم شي سلامتك وطلعوه بسرعه وشوي دخلت أمي طبعاً ما رضو وقعدت تصيح وتقول لهم بنتي ما عندي غيرها أبي أشوفها وبعدين قالوا خلاص مو تقولون بتدخلون بعد أنتو الباقي هههه كانوا موجودين أم زوجي وأبو زوجي وبعدين دخلت أمي وسالتها عن بنتي قالت أي بخير صورها أبوها يوريك إياها وطلعوها وراحت أمي للبيت تكمل العيد ههههه
وأنا كل شوي أنام واصحى بغرفة العنايه وأشوف حواليني نيرسات كثار اللي تقيس لي الضغط واللي تكتب واللي مدري وش تسوي وأبر بايديني حسيت ان فيني مئة عله وعله واسألهم متى اطلع يقولون بعد ساعه ورجعت نمت وصحوني بعد ساعه صدق وطلعوني من العنايه وغطو وجهي الا اسمع صوت زوجي يقول شفيها افتحو وجها هو خاف ليكون طلعوني ميته ههههه وفتحو وجهي وشفته قبالي وابتسمت له وطلعوني ع غرفتي وهو معي ووراني صورة بنتي بالجوال وماعليها شي حاطين اجهزة عليها وه يا محلاها وجلست شوي الا جابو لي بنتي فديتها وحطوها ع صدري وأنا مو قادره امسكها كل مافيني يعورني وبعدين خذوها مني وقعدت ما زوجي وجاوا أهلي واهله المغرب وعيدو معي وصار عيدي عيدين بوجود حبيبة قلبي بنوتتي
" الله يحرسها بعينه التي لا تنام ويحفظ زوجي لي ويحمينا من كل عين وحاسد "
11-15-2012, 09:15 PM
ولادتي ببنتي " حلوه سنيني فيك يا عيد روحي "
miss bedoor 
رد: ولادتي ببنتي " حلوه سنيني فيك يا عيد روحي "
.gif "65")
جديد منتدى إستفسارات مرحلة الولادة
العرض العادي
