تجربتي في اطفال الانابيب .

[علياءء]

السلام عليكم و رحمه الله و بركاته

اليوم ان شاء الله بكتب لكم اول تجربه لي في IVF الا و هو اطفال الانابيب او بالمسمى الاخر التلقيح المجهري
بما اني جربت ال IUI و اللي هو بالعربي التلقيح الصناعي الداخلي مرتين متتاليتين و مانجح ف حبيت اني ماا اضيع وقت و ابدا فالانابيب .

طبعا لله لحمد و الفضل بعد الله كان لشيوخنا الله يحفظهم و يطوللنا بعمر الشيخ محمد بن زايد ال نهيان اللي اصدر مرسوم بشأن بطاقه التامين للابناء الامارات بشكل عام و خصيصا لسكان ابوظبي بان جعل بطايق التامين تغطي كل التكاليف الشامله لاي علاج ف اي مستشفى خاص .
طبعا ماشاء الله الامارات فيها وايد مستشفيات متخصصه ف مجال الاخصاب و النساء و كل مستشفى فيه دكاتره مختصين و طبعا نجاح التجربه يكون عائد بعد الله على صحه المرأه و عمرها و صحه بويضاتها و احيانا صحه الحيوان المنوي لرجل .
الدكتوره تشوفج و اتابعج و تعطيج ابر و منشطات و ادويه و نظام علاجي يعتمد كله على جسمج و قابليتيه لتقبل العلاج .

فالمختبر يحافظون علي بويضاتج و يهتمون فيها و يلقحونها بشكل اكثر من جيد و يحاولون الحفاظ عليها لمده اطول حتى ترجع لرحمج سليمه . فإذا مانجحت التجربه و كان تحليل حملج سالب فهذا مش معناته ان المستشفى سيء او انتي جسمج مش كفوء و لكن خلي املج بالله اكبر و عسى ان تكرهوا شيئا و هو خير لكم و مثل ماعطى غيرج و ماحرمهم تاكدي انه بيعطيج و ما بيحرمج و كل تاخيره اكييييد فيها خيره .

مثال انا : كنت جدا منحبطه ان جسمي ما قدر ينتج اكثر من 7 بويضات . غيري ماشاء الله فوق ال 20 و خبركم عاد مش كل البويضات تتلقح ف كنت بس اصلي ادعي ان الله يرزقني الذريه الصالحه عاجلا غير اجل ياربي لكن شويه من تفكيري كان يقول ان يمكن احتمال ان ولا بويضه تتلقح او اقل شي احصل بويضه وحده و لووووو حصلت الحمدلله . لكن بعد ما اكتشفت اني حصلت علي 7 بويضات و منهم 5 تلقحو قلت الحمدلله الحمدلله الحمدلله < لانه غيري يتعالج و ياخذ ابر و يتعب لكن بعد السحب يكتشفون انهم مجرد اكياس مش بويضات ف كيف حال اللي اسوء مني ؟؟ و انا ربي رزقني و من علي بالعطا و وصلني لمرحله علاج مجاااااانيه مقارنه باسعار اطفال الانابيب اللي تتجاوز اسعارها ال 50 الف درهم اماراتي . و انا بصحه و بويضاتي بصحه و اجنتي بصحه ف كيف اجازي رب العالمين بالعطاء ؟ غير الشكر و العباده و الله يثبتنا و يهدينا اجمعين

الحين نرجع لموضوعي ..

انا عالجت ف مستشفى الفقيه فالعين عند دكتوره داليا ، دكتوره عراقيه جداا ذوق و ابدا مش انتهازيه و لا تفكر ان تامين بيغطي العلاج او انها بتحصل فلوس او عائد بل انها اتفكر ف صحتج و عمرج و اهم من هذا كله انها ماتحب اتعب مرضاها بالعلاجات . بعد تجربتين للتلقيح الصناعي الداخلي الفاشل اعتبره مش عند الكل كل واحد و جسمه لكن انا مانجحت وياي ف اعتبرته فاشل و مضيع للوقت . ف قررت اني انتقل للخطوه التاليه لاني ماريد اضيع وقت و الخطوه التاليه ك الاتي (انابيب و خلاااص ).

الدكتوره رفضت انها تسوي لي طفل انابيب لانها تقول عمري صغير و اني بتعب من العلاج و بنرجع نكرر التلقيح الصناعي الداخلي مره اخرى عسى ان ينجح و طبعا لاني (ام راس) عاندت و اصريت الا تسوي لي . بحكم اني المريضه و اعرف علاجي و ماريد اضيع وقت ف اصريت انها تبدا فالعلاج و انا بتحمل التعب لانه مافي شي اي بالساهل و الحمل طبيعته متعب و اللي تبا تحمل تصبر و تتحمل صح و لا ؟


بديت العلاج في ثاني يوم دوره و انتن بكرامه .

يوم الثلاثاء : لمده( 5 ايام ابره جونال اف ) (لتنشيط المبيض حتى نحصل على اكبر عدد من البويضات )

يوم الاحد : اليوم السادس رحت موعدي و سوت لي سونار و قالت اني احتاج (ابر جونال اف ) بعد مره و عطتني ابره ثانيه ماعرف شو اسمها لكن وظيفتها انها تمنع البويضات من الانفجار قبل موعدهم . و كان عندي 13 بويضه مقاساتهم كالات (19-18-17-16-14-14-13-22-20-19–18-16-12)

يوم الثلاثاء : إبره تفجيريه الساعه 9:45 مساء

يوم الاربعاء: الساعه 12:00 توقفين اكل لين وقت العمليه (تصومين)

يوم الخميس : بما اني من سكان العين ف اضطريت اني اروح لفرع بوظبي عشان عمليه السحب و لازم ريلج يكون معاج لانهم يحتاجون توقيعه و ثانيا لازم حد يرجعج البيت لانه بعد التخدير تكونين تعبانه . اول ما وصلت ودوني الطابق الثاني اللي بس يدخلونه الحريم ومستحيل ييدخله اي ريال . دخلوني الغرفه و عطوني ثياب العمليه و لبستهم و خليت شنطتي الي فيها فوني و ذهباني اللي تحتهم قبل ما البس ثياب العمليه و خليتهم مكانهم مأمنه عليهم و عقب شلوني بكرسي طبعا ف نفس الطابق يدزونج و انتي مأمنه ان مافي و لا ريال كللللهم حريم و دخلوني غرفه العملات و تسدحت و خدروني تخدير كامل طبعا ههههههه و غفيت ع طول و ماحسيت ب ولا شي و نشيت ف غرفه ثانيه اللي تكونين فيها تحت الملاحظه و الالم كان جداااااااا خفيف مثل الآم الدوره و جدا عادي و محتمل فلا تشلون هم العمليه و يتني الدكتوره تقول انها سحب مني 7 بويضات و عقب رجعوني الغرفه و يابو لي اكل عشان افطر ، و تسدحت شويات و عقب قلتلهم اني ابا اطلع و ارد البيت و ارتاح و رخصوني و طبعا قبل لا تطلعين ينصحونج و يقولون لج شو تسوين و شو ماتسوين و النصائح كانت كالتالي :

الراحه التامه
-تجنب الانشطه و التمارين المرهقه
شرب الحليب بكثره حتى وقت ترجيع الاجنه
عدم الاستحمام بالمياه الساخنه او الدخول الى احواض السباحه
المواضبه على اخذ الادويه الموصوفه .

عدم ممارسه الجماع لمدة اسبوع
الادويه كانت عباره عن :-
جل مهبلي مثبت اسمه crinone8% مرتين يوميا (صبح-مساء) .
الحبوب البيضاء progylution 3 مرات يوميا (الصبح تحت اللسان - الظهر في المهبل - العشاء تحت اللسان ) معلومه (الحبوب طعمها سويت فلا تاكلون همها ) .



يوم الاحد : اتصل فيني دكتور التخدير و بشرني ان 5 بويضات تلقحو و 4 منهم درجه اولى .

يوم الثلاثاء : 5-12-2017 يوم ترجيع الاجنه طبعا قالو لي ما اطلع من العين لين المختبر يتصل لي و يقول ان البويضات سليمه و تحركي بتجاه بوظبي و دقوا لي لله الحمد و عشان تعرفون النحااااااااااااسه قبل ما اطلع يلست ادور بطاقه التامين و الهويه (ضاعن) عشان تعرفن النحاسه بس ف نصيحه قبلها بيوم زهبي كل اوراقج ، طبعا شليت الجواز احتياط و اول ماطلعت فتحت برنامج الدعاد و قريبت دعاء الشكر و دعاء الحمل و الذريه و طول الدرب و انا ادعي و حطيت ف اذني سماعه و يلست اسمع القران عشان جسمي يهدا .و صلت و دخلوني غرفتي و كالعاده عطوني الثياب و دخلوني غرفه العمليات و قبل ماتي الدكتوره تميت ادعي و اذكر الله و استغفره (استغفر الله عدد خلقه و رضا نفسه و زينه عرشه و مداد كلماته ) (أستغفرك ربي عدد خلقك و رضا نفسك و زينه عرشك و مداد كلماتك ) (استغفرك ربي و اتوب اليك )(ربي لاتذرني فردا و انت خير الوارثين ) (ربي لاتذرني فردا و انت خير الوارثين يا ارحم الراحمين يا ارحم الراحمين يا ارحم الراحمين ) و طول ما انا يالسه اتريا لدكتوره و انا على هذي الادعيه و يوم تي الدكتوره يبدون يتاكدون من اسمج و اسم ريلج و البويضات اللي تبين ادخلينهم . و طبعا رجعو لي 2 و الباقي بيجمدونهم باذن الله . و سدحوني عندهم تقريبا مال ساعه و شوي و عقب رخصوني و عطوني نصايح الا و هي :-

- اني لازم اخذ ادويتي اللي هم الجل و الحبوب البيضا لين وقت التحليل
- الراحه و ما اتحرك و اتعب نفسي لمده 3 ايام
- ما اوقف لمده طويله و لا اشل اشياء ثقيله .
- الراحه المطلق فالسرير غييييير مطلوبه
-تجنب الرياضه و الاعمال الشاقه و العمل بهدوووء
-عدم ممارسه الجماع لمده اسبوعين

و طبعا التحليل عقب 5 ايام باذن الواحد الاحد .
و الله يصبرني و يصبركم و يرزقنا الذريه الصالحه عاجلا غير اجل ياربي .



اللي سوت عمليه اطفال الانابيب و نجحت او فشلت و كيف كانت اعراضها ياليت انها تشرفنا بكومنت خفيف لانه البنات محتاجات مثل هالمواضيع و عشان الفايده تعم ع الجميع و الله يرزقهم و يرزقنا يارب .

و ان شاء الله بخبركم بالتحديثات اول باول (ادعو لي ) .