تجمع حوامل ليبيا

عيون زوجي · 09-12-2011, 04:05 PM

ايه.....مرحبتين والفين مراحب
كيف حالك وحال وليدك وبنيتك الصغيرونه وشن جو الحوش الجديد والجيران الجدد في السراج صح؟
اللهم انت خير حافظا وانت ارحم الراحمين يحفظلك اوخيك ويرده سالم هو وكل الثوار وما يصيبهم شر ولا خوف ولا الم يارب
واسئل الله العظيم ان يشفي زوج اختك ويرده لزوجته وعويلته سليم معافى
هدا خوك يلي صارله حادث السنه يلي فاتت ولا لا؟

عيون زوجي · 09-12-2011, 04:08 PM

ام اسيل الف الحمدلله على سلامتك
احمدي ربك بنتك كبرت وتعاونك زي الرحمه
البنت ياسلام انا سارة نستنى فيها تكبر شوي
ما قلتيش البيبي ولد ولا بنت وكيف حال سلفاتك وحمواتك وشن جو الرمضان في مصر قالوا حلو............

عيون زوجي · 09-12-2011, 04:12 PM

اليوم انخلعت لما قريت خبر الانفجار يلي في المطار واحنا كيف فرحنا انه بيرجع للخدمه تاني ونرجعوا زي قبل
بس اتصلت براجلي في خدمته قالي ان اصحابه اكدوله انه في جهة قصر بن غشير في معسكر انفجرت دخيرة بالغلط مش متاكده طبعا
وسمعت بحكايه كتائب القدافي يلي جايه بتدير عمليه انتحاريه في راس لانوف وقتلت 15 شخص من الثوار يلي كانوا شاديين بوابات
الله المستعان الكلاب يبوا ايديرولنا جو العراق باش ما ننعموش بعيشتنا

عيون زوجي · 09-12-2011, 04:16 PM

نستأدنكم لانه مافيش حد غيري
انا اليوم صايمه انا وراجلي ومش عارفة شن انطيب
تعودت عالتنبله
ممكن رز بلاو وبازيليا وبيتزا اسهل شي
وحماتي جابت امس في المركز الطبي بنوته وعندها زوز اولاد من قبل وهي تسكن في جنزور ومش عارفة امتى نمشيلها لان طلوع الليل ما انحباش
اني نطلع في النهار ونروح في الليل عادي اما نطلع من الحوش في الليل ما انحبش

ميراس · 09-12-2011, 06:14 PM

السلام عليكم ورحمة الله وبركاته ام قصى نشكرك على شعورك الحلو وربى ايطمنك على والدك وياربى يرحم كل الشهداء وهالكلاب يبو فعلا ايخلو ابلادنا زى العراق ربى ايفشل جميع مخططاتهم يارب والله الناس تعبت والله اليوم عندنا اخبار من بنى وليد تعبت الناس معاش عندهم شى والامن زيرو والناس فى رعب من هالكلاب ايهددو فيهم حتى اللى يبى يطلع مايخلوه ربى ايفرج علينا

ღॐ آية ღॐ · 09-12-2011, 06:25 PM

السلام عليكم
ميراس شن الاخبار ان شاء الله تكوني بخير
وللاسف والله ماعندنا بيه اتصال ...اللهم نسالك الصبر...
عيوووووووووووووووووووون
زمان على الحلوين كيف حالك وطمنيني على الاهل ان شاء الله الكل بخير ...
وهو نفسه الي دار حادت ونزاد عليه ولد من شهر وشوية ...عنده بنت عمرها اربع سنين...
مشاء الله عليك الداكرة 100%....
ام سعد نورتي ومشاء الله على سعودي ربي يحفضه تبارك الرحمان...

ღॐ آية ღॐ · 09-12-2011, 06:29 PM

انا نسكن في السراج عيون مكان هدئ جدا جدا
والجيران كل حد في حاله ...
بس متونسه بحوش سيدي وسلفتي الي مقابلتني ليها سنه برة وقريب تروح
وحيزيد الونس ....
لاكن سكنت النجيلة كانت افضل من حيث الحركة والجيران..
اسولة توة قريب تسكر تمانية شهور ... بس هيا ضريفة هلبا وتشيشونة لاكن حلوة...

ღॐ آية ღॐ · 09-12-2011, 06:37 PM

ميراس انا في طرابلس زوجي في نصف الاحداث قالي شن رايك نمشو لي تونس
لان ايوب يخاف من صوت رزمات النيتو قريب هبل
لاكن انا اصريت نقعد .... مسكين جاته فوبيه من الصوت العالي...
لاكن كله فداك يا بلادي ...صمدون هنا لاخر رمق....
ام قصي الله يسلمك منورة حبيبتي كيف الحال ؟؟....
عيون وين سورينام شن صاير فيها ...هيا تسكن جيهت طريق المطار صح...؟؟

ღॐ آية ღॐ · 09-12-2011, 06:39 PM

ام اسيل ربي يتمم حملك على خير وفي اي شهر؟؟؟
وحبل وينها شن صاير فيها..

ღॐ آية ღॐ · 09-12-2011, 06:42 PM

عيون ان شاء الله صيام مقبول وافطارحلو
ارجعي بعد المغرب ...