تجمع حوامل ليبيا

[ميراس]

عيون وينك انت وباقى البنات يقين احكيلى اشوى عنك ومنين من ورفلى

[ميراس]

خلينى نحكيلكم عن اخر اخبارى انا الان فى تونس ليل خمسة ايام طبعا وضعى الصحى زى الزفت هرموناتى رجعت ارتفعت من جديد والورم زاد تضخم من جديد تصورو بعدما نزل الى 13 هرمون الحليب عاود ورقى مرة تانية 700 والله ماعد نعرف شن اندير متلخطة وخلاص

[أم سعد]

السلام عليكم

مساء الخيرات

عيون ... قصة حملي في الأول درت مانع طبيعي بس الحال مامشاش معانا ولعبنا في روحنا

وحملت والحمد لله ... اللي شجعني اني نحمل ان ولدي معاش يرضع مني حليبي جف ودخلته الصناعي ... وراجلي يبي الصغار ... ومانعرفش الوحم شن هو ولله الحمد ... ومانخدمش ... وسكنت في حوشي مع انه مازال مش كامل من ناحية الفرش "كله من المشفشف" ... وعاجبتني قصة جيبي على بعض ويكبرو مع بعض ... والحلو في الموضوع انه ان شاء الله بيجوني في نفس اليوم ... سعودي جي يوم 3/2 وهذا ان شاء الله في نفس اليوم نجيبه ... وهذه قصتي

أما بخصوص الشمال ردي بالك تضربيها لأنها بتتعقدلك منه .. عاقبي عادي ... ولما اديرها فرحيها هللللللللللللبه ... راهو البنت أسهل من الولد شن بديري في حمودي بعدين ... وديمة قعمزيها على المحبس وفهميها ان الشمال لحمودي البيبي بس وهي كبرت وان الشمال حاجة مش حلوة

ميراس ... أسأل الله االعظيم رب العرش العظيم أن يشفيك ... وإن شاء الله ربي يطمنك على أهلك


دهشت :)

[يقين]

عيون ربي يخليك حبيبتي شكرا

[يقين]

ميراس اسكتي اني اماله اني حالتي ما يعلم بيها كان ربي تصوري قبل انكلم فيهم علي الارضي توا ليا تلات ايام نتصل يعطيني مشغول وعارفه الخبر الاكيد في وحدين داروا اجتماع وما يبوش يسلموا وفي وحدين تانين يبوا يسلموا والموضوع خاش في بعضه وربي يستر عارفه اني حاسه فعلا انه بني وليد اصعب من طرابلس تعرفي علاش لان طرابلس معروف وين مكان المجرم وكتايبه لكن بني وليد لا مش عارفه وين لابدين عطيهم موت ما لقوا كان بني وليد

[عيون زوجي]

ميراس يا غاليه اسئل الله العظيم رب العرش العظيم ان يشفيك
اول مرة نعرف قصة مرضك يلي نعرفه انه عندك ولد واحد وكبير في الثانوي صح ولا لا
شن قصة ورمك وشن نوعه ومن امتى فضفضي على روحك يا اوخيتي
انتي وين في تونس اهلي نصهم في سوسه والثاني في العاصمه
ويارب يطمنك على اهلك وتنحل سلمي وربي قادر على كل شي
الشفشوفه طالع الفجر يشحن فيهم بلعاني ومخلي موسى ابراهيم وعلي الاحول وولاده غادي

[عيون زوجي]

ام سعد...هههههههههههههههههههه
المانع الطبيعي كدبه كبيرة نفس قصتي وسورينام وايه وغيرنا ياما
حتى انا حملت لما سارة عمرها 7شهور وبجد فرحت بحملي وحاليا فرحانه بيهم رغم تعبهم
مبروك اعليك العتبه الجديدة يعطيك خيرها ويكفيك شرها وبالبركة ان شاءالله
والاثاث ملحوق اعليه بالك يتغير الحال وتخشلنا البضاعه الاوربيه والامريكية ونفتكوا من الصيني ومستوى المعيشة يتحسن وتقدري تشري اثاث زي الخليجيات ما حدش خير مننا
وان شاء الله تجيبي على خيرررررررر

[عيون زوجي]

يقين....ان شاء الله تتطمني على اهلك ويوفقك في قرايتك
من امتى انتي في مصر ؟ راني ننسى قوليلي شن عندك من صغار وشن اسمه ولا اسمه وقداش عمره وتقري على حسابك ولا ايفاد؟
القصقصة شعار تجمعنا حتى ثورة 17 فبراير ما تقدرش تغيره.....

[عيون زوجي]

قصة الشمال متعبتني انحس في روحي مش فالحة مش قادرة انعلمها امي تقولي مازال صغيرة وسلفتي كانت في بريطانيا 4سنوات دراسه وبنتها غادي الدكتورة اصرت انه لازم من عمر السنتين والا البيبي يقعد يعمل فيها مرة مرة لعمر الدراسه او اكبر
بنتي عنايديه هلبه هلبه وما تخافش

[عيون زوجي]

ام قصي وينك ؟؟؟؟؟؟؟؟؟؟؟؟