دردشة بنات المدينه المنوره - تجمع حوامل بنات المدينه

عروسه · 05-26-2011, 04:10 AM

شوفي ميش امكن تعرفي تحسبيها لي
أنا اجهضت بتاريخ 26\10\1431
وحملت بعد الاجهاض ماجاتني دورة
يعني المفروض الان أنا بأي اسبوع وأي شهر بالضبط؟

Mish · 05-26-2011, 04:20 AM

صح صآدقة إنو على حسب إستخدآم الشخص نفسو .. بمآ إنو تشيكو شركة أفضل فأحسنلك إنو تشتري الأفضل ..
إزآ كآن فرق السعر بينهم مو كبير بدليه ..
و بالنسبة لحسآب حملك ، إنتي حسبتيه مزبوط على أسآس آخر دورة ؟؟

Mish · 05-26-2011, 04:27 AM

سوبحآن الله .. يآ بنت إنتي زيي بالزبط .. بس يفرق التآريخ
أنا أسلبت 3 رمضآن و نفس الشي مآشآلله حملت على طول مآ جآتني الدورة
المهم شوفي بالنسبة للحسآب أنا الدكتور مآدري كيف كآن حسبلي هيآ ..
لكني لقيت موضوع هنآ في المونتدى وحده مآشآلله عليهآ شرحت مزبوط كيف تعرفي تآريخ ولآدتك و اليوم إللي سآر فيه الحمل ..
ولمآ سويت طريقتهآ طلعت بالزبط زي مآ قلي الدكتور عن يوم الولآدة ..
وطلع إنو حملي سآر يوم 24 - 10
رآح أدورلك الموضوع و أحسبلك هيآ ..

عروسه · 05-26-2011, 04:41 AM

فرق السعر كبير بينهم تشيكو تقريبا ب350 اما جنيورز ب 95 عليها تخفيض اما تشيكو لا
مو مشكلة لو بس احد جربها ومانصحني فيها ارجعها انا اخذتها لأنها حوالي 30 متر وهي مناسبه لي لأن غرفة البيبي جنب غرفتي بالضبط أما تشيكو فوق 300 متر وانا ما احتاج هذا البعد الكبير في المسافه

يعطيكي العافيه ميش ياليت تلقي الرابط والله احساسي اني حولد بدري عشان كده خايفه ابغى احد يأكدلي اني فعلا بالتاسع مو بالثامن وعمره احساسي ماخاب
ومن امس احس بطني نازله لتحت وبنفس الوقت لما اجي انام تشد علي بطني على جوه بشكل مؤلم

وحده من صحباتي جاتها الولادة من غير طلق على فجأة عشان كده اخاف تجيني زيها
تقول كانت جالسه عادي وحست بموية تخرج منها وراحت التواليت ولقت بزبوز يصب منها ولما راحت المستشفى قالولها ولادة وماكانت تحس بأي ألم
بس اعطوها طلق صناعي وبهدلوها فيه لحد ما ولدت الحمدلله

Mish · 05-26-2011, 05:01 AM

سوبحآن الله .. تصدقي أنا كتير أفكر إنو حآ تنفك عليآ موية الرآس بدون ألم و إنو أروح الموستشفى و يقولو ولآدة ..
حتى أمس حلمت نفس الشي و إني جلست أقول للدكتور الله يخليك أصبر عليآ يمكن يجيني طلق طبيعي لآ تديني طلق صنآعي ..
و من جد والله الفرق مره كبير في السعر .. إستني إلين وحده من البنآت ترودلك و شوفي أيش حتسوي إزآ خلآص حتخليه ولآ ترجعيه ..

نفسي أعرف .. مسلن لو الدكتور فعلن لقى إنو الرحم مفتوح من 1 - 3 سم هل حيقولي خلآص تجلسي في الموستشفى ولآ حيقولي روحي البيت ولمآ يبدأ الطلق تعآلي ؟؟
أحد يعرف ؟؟
الموشكلة إللي دحين صآحيين أنا و إنتي يآ عروسة و أظن مون لسآ موجودة و كولنآ بكريآت ..
يآلله إنشآلله تجينآ وحده من البنآت الخبيرآت مآشآلله نطفشهآ بالأسئلة كخخخخخ

عروسه · 05-26-2011, 05:06 AM

ههههههههههه
والله يا ميش امي تقول البكرية لازم تصبر في البيت ماتروح بدري عشان مايبهدلوها
امي حصلها في اول ولادة نفس الشيء انفكت الموية وهي نايمه وماشاء الله عليها قامت غسلت الفرش ونظفته
وصارت تمشي في السطوح ولا قالت لأبويا لحد ما خلاص استوت وبعدين راحت
بس أمهات أول مو زينا ياحبيبتي احنا لو مغوصه بسيطة قلبنا الدنيا صراخ وبكاء
بس في حاجه نفسي أعرفها واستحي أسأل امي

هما كيف يعرفو ان الرحم انفتح 2 ,4,6 سم هل لازم يكشفو داخلي عشان يعرفو ولا بالسونار يقدرو؟

moon-flower · 05-26-2011, 05:16 AM

اهليييييين بالكروشاات
ميش جبتو في سيره القط جا ينط ههههه
مغص الدوره سبب لى قلق طفشت منه
ياااريت يقوى ويسير طلق وارتااااااح باذن الله

moon-flower · 05-26-2011, 05:19 AM

اتوقع ميش لو لقيوه مفتوح يقولو روحى وبعدين ارجعى
احس كدا احسن ترجعى البيت تجهزي اغراضك وتشربي كف مريم وتمشي شويه
وتاخذي شور وترجعى المستشفى وقولى خلاص مانى خارجه غير وانا والده
اتمنى يسير معايه كدا

Mish · 05-26-2011, 05:28 AM

يختي عليكي يآ عروسة فكرتيني ببرآئتي إللي كآنت فيآ قبل أسبوع تقريبن ..
كونت زيك أفكر إنو يبآن إزآ فتح الرحم في السونآر .. لكن للأسف الشديد الحقيقة المرة إنو لآزم الكشف الجميل إللي بالأصآبع حسبي الله بس ..
وصآدقة والله على هرجة إننآ مآ نتحمل .. اليوم مآمآ شآفتني مجهزة أغرآضي لكن مخليه بعض الحآجآت إللي بأستخدمهآ وأبغآ أخدهآ معآيآ الموستشفى إنشآلله وقت الولآدة
قآلتلي متى تبغي تحوطيهآ قولتلهآ أشغل نفسي إنشآلله لمآ يبدأ الطلق ألملم دي الحآجآت عشآن يمر الوقت إلين يقوى خلآص
جلست تضحك قآلتلي أشك في الموضوع ، إنتي حتجلسي تبكي و تصحي زوجك على بكآكي و تنسي كل شي .. قآل أيش تلمي أغرآضك و الطلق بآدء و تضضضضضضضضضضضحك ..
حسيت إنهآ صآدقة مآلت عليآ ..

صح والله صآدقة يآ مون حتى أنا أشوف الأحسن إنو أجي أزبط وضعي في البيت بدل مآ أجلس في الموستشفى سبيل كل دكتور و دكتورة و سستر يجو يقيسو و يمشو ..

Mish · 05-26-2011, 06:08 AM

فينكم يآ كروشآت ؟؟ نومتو ؟؟

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
ممرخه ممتازه في المدينه المنوره	مااايااا	منتدى علاج العقم و تأخر الحمل	6	12-27-2011 06:11 AM
بنات المدينه ابي خبراتكم ..	بعثرة الوان	منتدى علاج العقم و تأخر الحمل	7	02-14-2011 02:35 AM
عين على طيبه الطيبه (( المدينه المنوره ))	نورا	المـنـتـدى الـعـام	4	02-09-2011 07:06 AM
لاهل المدينه المنوره	نسمة بحر	منتدى السوق التجاري	5	01-23-2011 01:39 AM
يافراشات المدينه المنوره تعالووووو...	فداك عمري يازوجي	منتدى علاج العقم و تأخر الحمل	7	03-21-2010 12:56 AM