سيدات ليبيا الحبيبات ..تفضلووو

[هدية الخالق]

شموسة تسلمي عالاهتمام حبيبتي فعلا الحمل هذا أسهل الحمد لله لحد الآن مارجعتش الا مرة وحدة حشاك صح نحس في روحي بنرجع شوية لكن نشد في روحي ونقعمز وناخد نفس عميق نحس في روحي نرتاح بعدها وحتي تطيبي ماكرهتاش قاعدةالحمد لله نطيب عندك كرهت الزفر زي اللحم بانواعه وخصوصا الدجاج وصارلي زي في سما كرهت الماكلة من برا وخصوصا البيتزا والحاجات اللي فيها جبنة والله اول امس راجلي جاب معاه بيتزا صكرت خشمي عليها وماضقت منها الا نتشة صغيييييرة بعد مااصر عليا راجلي نضوقها ماحبيتش نرده
الله قبل شن يصبرني عليها
وربي يبشرك بالخير عالولادة زعما الثانية أسهل ان شاء الله ياااارب

[هدية الخالق]

سوسو ياحلوة وينك مغطسة شن اخبارك وعقبالك يارب تبشرينا بحملك حتي انتي قريبا
والف مبروك علي بنت عمتك فرحتلها هلبة ربي يكمل عليها وتعرفي تقريبا نفس موعدي هيا
اني كانت اخر دورة 1-4 وهيا ستة أربعة يعني بينا أقل من أسبوع وبيني وبين سلفتي عشرة أيام
المهم سألتيني كيف خبرت راجلي طبعا يوم حللت كانت عطلة يعني راجلي قاعد واحني من قبل مانحلل شبه متأكدين والتحليل زيادة تأكيد فقط لانه الدورة تأخرت هلبة وعندي شوية أعراض
طلعنا السبت بضعنا وخدينا الاختبار وخدينا فيتامينات وفوليك أسيد مرة وحدة وروحنا عشية مابيتش نجربه خفت يطلع مش واضح قلت نخليه للصبح ومانحكيلكش طول الليل متوترة ونخمم زعما حمل وإلا نتوهم بايخة بعد هالتوهم وهيأنه روحنا علي اساس إني حامل وخدينا حتي الفيتامينات ويطلع مافي شي هههههه
المهم من الفجر للساعة ثمانية واني نتقلب نغفى شوية وانوض نشوف الساعة نقول مازال الشوية لعند الساعة تمانية طار النوم ومعادش عندي صبر نضت خديت التحليل وتوكلت علي الله ومكتوب عالتحليل تستنى تلات دقايق وتبان النتيجة لكن اني طلعت فورا مجرد غطست الاختبار في البول حشاك ثواني بس وتغير لون الاختبار للوردي وطلعت علامة + وااااااضحة واني نرعش كلي ههههه
وطلعت لقيت راجلي قاعد راقد هو وبنيتي ماقدرتش انوضه لانه تعبان ساهر مع سوما الليلة الاولي مابتش ترقد واني تعبانة مش قادرة نرفع راسي قالي ارقدي وتو نقعد معاها
المهم لما لقيتهم راقدين واني النوم طاير ماقدرتش نولي فتحت النت وقعمزت نحسب في أي اسبوع وعلي تطورات الحمل شوية وقلقت خشيت امتديت جنب بنيبتي ونتامل فيها ومش مصدقة إني منجيب غيرها وشوية وناض راجلي طلع للصالة واني حاطة الاختبار عالطاولة خداه يشوف فيه واني لحقت عليه قالي شني صار مافهمتاش التحليل مش واضح لانه الخطوط بهتوا شوية قتله حمممممل فرح الحق وباركلي لكن الحق مش زي اول فرحة غييييير هاديكا حتي من عيونه ضحكوا وحتي هوا قالي صح فرحت وتعرفيني إني نموووووت في الصغار لكن مش زي الفرحة بسووووما الحق قتله طبعا حتي اني مش زي فرحتي بسوما أول طفل غيير شعور انك بتولي أم او أب لأول مرة لا يوصف
المهم بعدها طلعنا فطرنا برا جنبنا مطعم خاص بالطلبة وزي نظام البوفيه م
اول ماتخش تدفع عالفطور ستة دولار للشخص وعالغداء والعشاء عشرة وتاخد الاكل بروحك ولو تبي تفطر حتي عشر مرات عادي وبنفس السعر اللي دفعته اول مرة وتعرفي في اللي اول مايخش الصبح يدفع ستة دولار ويجيب معاه في كمبيوتره ويشدها اقامة لليل غادي يعني فطور وغداء وعشاء بستة دولار اللي دفعهم الصبح بس
وطبعا الميزة هادي للطلبة بس
المهم ليا فترة نقول لراجلي منتغدوا فيه يقولي لا فترة الغداء زحمة ومرات في طلبة معرفة خليها فطور وقبل ناويين منفطروا فيه السبت لكن قتله خليها الاحد عالاقل نحلل الصبح وكان طلعت حامل نطلعوا نفطروا برا علي اساس فطور بمناسبة الحمل هههههه
وهااااااااادي القصة سامحيني حكيتلك قصة حياتي وشرحت بالتفصيل الممل هههههه

[هدية الخالق]

فروسة واوشي وجيجي وام معاد كيف حالكم كلكم ان شاء الله تكونوا بخير
جنودة واثورة وييئيييييييييييينكم

[هدية الخالق]

تعرفواوا يابنات بطني لية ونخصات في اجنابي مخوفيني وعندي افرازات هللللبة حشاكم. نين مقلقيني طبيعي زعما ؟
وخايفة من طبان بنتي سلامتها لما نطبها يمشي طول اليوم وجع بطني وضهري والمشكلة هيا ماترقدش ٱلا بالطب وماترضعش إلا نكون طابتها في حجري ولما تكون راقدة في سريرها وتنوض نطب فيها باش نطلعها منا لانه سريرها مصكر وعالي
والايام اللي فاتوا كانت مريضة زايدة دلع كل شوية تجيني تبيني نطبها تمدلي في ايدياتها واني نستسلم ونطب فيها
والله مسكينة حصلتها مرضة باهية حرارة ثلاثة ايام وتوصل للأربعين اكثر حاجة وصلت للاربعين فاصلة اثنين ورفعناها للطواري لانه العيادات والمصحات عندهم يصكروا بكري والمستشفي الكبير تقدري تعايني في اي وقت وبلا موعد لكن تمشي للطوارئ طول رفعناها الساعة تسعة في الليل وساعة تستني يسالوا ميت سؤال ويستفسروا مش يعرفوا مدى خطورة الحالة وهل ليها اولوية تخش قبل غيرها من الحالات او لا والحمد لله دخلونا فيسع مع إنه في وحدة جاية قبلنا مسكينة تسخف مش قادرة تمشي حاطينها عالكروسة
المهم دخلونا دارولها كشف وقالوا عندها الواز همااللي مسببيلها الحرارة وقالوا احتمال تستمر حتي يوميين تانيين وعطوها مضاد حيوي وشروبو حرارة لمدة تمانية ايام
والحمد لله توا حالها أحسن لكن مهبلتني في اخد الدواء بالعياط ونصه يمشي برا مع إنه كانت تحبه ولما تشوفني جايبة الشروبو تجي تجري لكن شكلها اعيت من الادوية بنيتي ربي يشفيها ان شاء الله

[هدية الخالق]

مساء الورد
توينكم العفووووووو
تعرفوا رحت معاش نحب نخش علي كثر مامغطسين ومكسدين
نكتب رد ونقعد نستنى حد يخش بعدي ونقعد باليومين مانلقى شي
تعفلقت من هالحركة طول اليوم نشيك عالصفحة مانلقى في شيييييييييييييي

[هدية الخالق]

دور مني بيفتح االتجمع الجديد؟؟؟
والله انظني علي هالحال منقعدوا شهر في هالثمانية صفاحي اللي مازالوا

[هدية الخالق]

حماتي بتجيني زيارة في شهر ثمانية حسني نخمم من توا ..........
صيف وحمل وصغار ودوشة وشقتي صغيرة غرفة وصالة وتقيد مع راجلها منقعد بحجابي طول اليوم
طبعا من غير التطييب ضروري نوضان الصبح بكري وتجهزيلهم الفطور وبعدين التخميم في الغدي والعشي كل يوم
واكثر من هذا كله تقيد في النوم والراحة والهدوء عندها ثلاثة بنيات سلامتهم الصغيرة كيف جايبتها عمرها شهرين تقريبا
اااااااااااه ربي يعاوني يارب
ان شاء الله يحجزوا في فندق والا يأجروا شقة ويريحوني بيقعدوا عشرة ايام هلللللبة الحق

[هدية الخالق]

[IMG][/IMG]

[هدية الخالق]

صورة أخي احمد الله يرحمه ويغفرله في سرت كان وقتها شاد توكة حراسة غادي
ان شاء الله ربي يغفرله ويجعل مثواه الجنة ويعوضنا عنا خير
قلبي يتقطع كل مانشوف صورته ونتحسر عليه استغفر الله

ومرات نقول الحمد لله ان شاء الله يكون في مقام أفضل وربي يبدله بحياة أحسم من حياته وأهل أحسن من أهله في الجنة ان شاء الله

[هدية الخالق]

[IMG][/IMG]