الجزء الرابع
الرضاعه ومستلزماتها
طبعا اذا بترضعي طبيعي او صناعي او الاثنين راح تحتاجي كم غرض ..
1- كريم للحلمة
دا الكريم بعد كل رضاعه تستخدميه علشان الحلمة يتكون شوي حمرا ومتشققة وهو يمنع التشقق والالام , فيه منه انواع مناسبة حتى وقت الرضاعه واغلبها طبيعيه مو كيمائية وضد الحساسية ..ومهمة ومو مجرد كماليات ..............وهذا كريم من مذركير مثال
2- بادز للثدي وهي عبارة عن قطن مبطن يحمي ملابسك من تنقيط الحليب من الصدر ولها ماركات كثير بس افضل وحده جربتها من شركة بيجن
3- مضخة لشفط الحليب من الثدي
وهذي ممتازة في حالة انك حسيتي باحتقان وتبغي تتخلصي من الحليب , او عندك الم وماتبغي البيبي يرضع مباشرة من الثدي لحد مايهدا, في منها يدوي ومنها بالبطارية
4- واقيات للحلمة
شي جديد وممتاز وبرضو للحلمة المتشققة والمتالمة , تحطيه على الثدي ومكشوف جزء بسيط منه يسمح للبيبي يرضع وبنفس الوقت وقاية لك من الالم ..موجود في ماركة avent
5- رضاعات
سواء رضعتي طبيعي لحال او نوعين رضاعه راح تحتاجي رضاعات
وممكن تختار مقاسات او تشتري طقم ..
للمولود حديثا تحتاجي رضاعتين مقاس 60 مل وحده للموية ووحده لليانسون (مهم للمغص حق الثلاث اشهر وباعطيكم طريقته اللي اعطاني اياها الدكتور )
ورضاعتين 90 مل للحليب ورضاعتين 120 مل برضو للحليب ..
وحلمات للرضاعات اضافية احتياط جيبي 3 وانتبهي للعمر يكون من 0 الى 3 اشهر
ولاتنسي فرشة تنظيف الرضاعات ..ولو اشتريتي طقم افضل . ويكون سعره قريب 200 ريال
حاليا افضل شي avent رضاعتهم الوحده بـ 35 ريال بس الطقم اوفر بكثير
وعندكم شركة بيجن اليابانية كويسة مره pigeon وعندكم رضاعات في سنتربوينت بس انتبهي الشركة المصنعه تكون معروفة وكويسة ,,,
6- معقم الرضاعات
في منها ماركات مختلفة وكل وحده لها عدد معين من الرضعات ,, وصار مطورة بعضها تعقيم بخار والبعض ديجيتال
وهذي تعتمد على الميزانية .
المعقمات تبدا من 300 ريال ,,
وهذا سبب كمان اننا نشتري الاغراض على اشهر علشان الميزانية
7- حافظات الرضاعات
سواء عقمتي الرضاعه بجهاز البخار او بأي طريقة بخار عندك اهم شي لا تلمسيها ابدا بعد التعقيم ولازم تغطي كل رضعه بغطاها وتحطيهم في حافظة معقمه
ترى اي غلطة فيها اسهال للبيبي لاقدر الله ومررره اسهالهم يطول ومايروح وفيها فيلم طويل وتسلخات وكله بسبب تعقيم مو اكثر << عن تجربة
7- مرايل رضاعه
وبرضو نذكرها هنا علشان ماننساها ,,,وبعد الرضاعه نشيلها على طول
8- مصاصات
بتحتاجوها شهر واحد , بس لما يبكي من غير سبب بيسكت فيها وبس يكبر شوية ترى سهل مرررره انك توقفيها في عمر شهر او شهرين ..
لاتحطوا اي شي في المصاصة ابداااااااااااااااا
كنا للاسف نحط نقطة عسل على بالنا مفيد , وطلع ان العسل لكل طفل اقل من سنة يكون سبب رئيسي في اصابة الاطفال لما يكبروا بالربو وحساسية الصدر << انا مثال ههههههههه للان اعاني بسبب طفولتي ,, وصاحبتي عرفت متأخر بعد اصابة 3 من اطفالها بالربو.
وعن جدهذا كلام استشاريين اطفال لان العسل فيه لقاح واشياء طبيعيه ثقيلة على الطفل
ومافي احلى من هدي الرسول الكريم في مضغ التمر وتحنيك الطفل.
9- مخدة الرضاعة
حلوة ومريحة تحطيها حول وسطك والبيبي عليها وترضعيه سواء طبيعي او بالرضعه وموجوده في بيبيز ار اص بالوان مختلفة
10- غطاء الصدر للرضاعه
طبعا مين تحب احد يتفرج عليها وقت الرضاعه هههههههههه
هذا غطاء ممتاز ومريح وموجود في كل مكان ,,وبصراحه مقنع مره
11- حافظات رضاعات للتدفئة
وهذي ممتازة لو كنتي طالعه بتحفظ لك الرضعه دافيه لوقت الاستخدام
12- ترامس الموية
وبرضو لازم يكون عندك ترمس موية حارة , وجنبه قارورة موية فاترة عادية علشان تجهزي الرضعه وقت مايحتاج لانه مو معقول كل مابكى تروحي تغلي موية وتنتظري
13- مقسم حليب
مهم برضو يكون جنبك وفيه حليب على حسب المعيار وجاهز خاصة بالليل لو بكي البيبي يكون جنبك الحليب في علبته وجاهز والموية والترمس ولاتحوسي
.
واختصارا خلي جبنك طاولة صغيرة يكون عليها رضعتين او 3 جوه حافظتهم المعقمه ومقسم الحليب ويكون جواه معيار حليب جاهز وموية وترمس موية ومناديل علشان بالليل ماتروحي مكان لو صحي البيبي يبغى يرضع .
ان شاء الله ما اكون نسيت شي في هالقسم ... وراح نكمل باقي الاجزاء باذن الله
02-09-2012, 05:33 AM
رد: تجمع حبيباتي الكروشات اللي راح يولدون بشعبان
سفن بارد 
جديد منتدى إستفسارات مرحلة الولادة
العرض العادي
