دردشة بنات ليبيا , دردشة حوامل ليبيا , تجمع بنات ليبيا

[سورينام]

المشاركة الأصلية كتبت بواسطة عيون زوجي

سورينام عارفاتك مشغوله اول ما تفضي خشي كملي قصة السبوع وشنو درتي بالتفصيل حتى لو مالقتنيش

حاااااضر يا غالية :

جبت بنتي يوم 9-10-2011 وقعدت 3 ايام وطلعت وجاني صداااع رهييييب عمري ما شفته والله يومين مافيش نوم لا ليل لا نهار وزوزي ما خلى ماجابلي من مسكنات وبعد ايامات هفت بروحه قالولي متحركة بعد البنج ..
المهم على اساس بنرتاح سبوع وبعدين بندبح واندير لمتي مرة وحدة ونرتاح ماداما حوشي مفرش ومرتب قبل ما ايحوسو فيه الصغار ..خخخخ بعد اسبوع هربت الميه وقعدت سورينام تحاحي لا لمة ولا الناس جو لأن كلهم عارفينى بندير لمة زي جياب ولدي .. وقعدت نحرق في اعصابي لين جت المية ودرتها يوم 4-11-2011
درت رز مسقي وصونية حار فيها طاجين دجاج بالجبنةوالبطاطا+فليفلة +كفتة فلفل مع سلايط ومخللات ومشروب وفواكه والحلويات درت 3 حاجات في باكو قنين مع الشاهي قبل العشي وروزاطا وعبمبر وبعد العشي طاسة باللوز وإقلب .. لأن المكسرات الوقت هذاكه لقيتهم اكبلو بــ 18 دينار + التحف متاعهم أرخص وحدات القطعة ب دينار الحق اكثر من امكانياتي وزيادة اني مدايرتهم في ساره وفي فراس يخي في سارة درت حتى الكونفيتي في تحفة بروحه والمكسرات في تحفة بروحه لذلك قلت ياسر منه هالسريب حتى طاسة باللوز ياسلاااام عليها

[ام قصى محمد]

حبيباتى حطو على ليبيا تى فى
والدى الشيخ صالح بلو يتحدث

[ღॐ آية ღॐ]

سوري الف الحمد لله على سلامتك بس ليش جبتي بلعملية
وليش مش بنج كامل انا عمليتي بنج كامل
خفت من يبرة الضهر سالني دكتور البنج شن تبي كامل او نصفي
قلتله كااااااااااااامل
ضحك وقالي شن معنة قلتله والله تبيني نشوفكم وانتم تجزرو فيا
لالالالاء والله ما نقدر...بس تعبني الكامل حاشاكم ما رجعتش وقعدة نكح
وكل كحة نحس العملية بتنفتح الحمد لله على كل حال...دكرتيني بلزي مضى"

[ღॐ آية ღॐ]

المشاركة الأصلية كتبت بواسطة ام قصى محمد

حبيباتى حطو على ليبيا تى فى
والدى الشيخ صالح بلو يتحدث

مشاء الله والدك كان في الجبهآ نتدكر صح؟؟

[عيون زوجي]

قصدك بوك يا ام قصي ما فهمتش؟؟؟

[عيون زوجي]

ياااااسر شنو يبوا اكتر من هكي سبيع اقنين وفي عز الربخه وغلاء الاسعار

عقبال ما تحضري اعراسهم يااارب

[سورينام]

أيوته ألف مرحبا حبوبة.. جبت بالعملية لأن صغاري الزوز الأولين جايبتهم بعملية سارة على خاطر جت فاخمة ماشاءالله 4 كيلو وفراس للتاسع وهو راسه فوووق (فارسي) خلاص معتاها التالتة ثابتة ههههههه عملية بدو تفكييير .. والبنح حتى اني في سارة درت كامل لأتها عملية طارئة .. لكن فراس قررولي عملية ف بداية التاسع ودرتها نصفي ومحلااااااااااااااها ما حسيت بشي وهما ايهدرزو عليا ويضحكو لين تمت واصلا ماتشوفي شي بينك وبينهم ستار

[سورينام]

المشاركة الأصلية كتبت بواسطة عيون زوجي

ياااااسر شنو يبوا اكتر من هكي سبيع اقنين وفي عز الربخه وغلاء الاسعار

عقبال ما تحضري اعراسهم يااارب

سلمها يااربي ها شن رايك حكيتلك بالتفصييييل الممل .. ونسيت ماقلتلكش اني لبست قفطان أسود حاير ومشجر بالقهوي فيه ربطة تحت الصدر وبعدين وااااسع متاع حوامل لأن بطني كانت منفوخة هذاك الوقت + خراصات كرستال اسود طواااال وحلاص .. خخخخخ وراح مني خاتم ذهب ايهببببببببلللللل وليا معاه ذكريات حلوة جابهولي راجلي في اول عيد زواج قريب نهبل علييييه الله غالب انشاالله دفعة بلاء على صغيويرتي

[ღॐ آية ღॐ]

سلمك يا سوري
انا نتدكر جارتي جابت قبلي بي اسبوعين
لما مشيت انباركلها حكتلي انها جابت بلعملية ودارت
بنج نصفي وندمت لان الصداع قعد معاها اسبوع
وقالت كانت مرعوبة وهي تشوف في العدة وتسمع في صوت
المعدات وانا عاد ما نحكيلكش متت برعب وحمدت ربي في نفسي
اني بنجيب طبيعي سبحان الله نصيب ..قالو طبيعي وبعدين جبت بلعملية
لذالك طلبت بنج كامل "

[عيون زوجي]

اجرك حاصل يا احبيبه........