ديوانية البحرين - دردشة حوامل البحرين - البحرينيات

[om khalil]

صباح الخير
أدري كلكم نايمين نوم الهنا ان شاءالله
قاعده من الساعه 3 ويا خلي مريض على عمر العدو
ترجيع وحراره عاليه ودايخ ياعمري

سكتوا قام يهلوس زهقني
يقول لي عن اشياء يشوفها واني ماشوفها
يبست في قشوري قمت علقت الليت من الخوف
يقولي ماما توفي التلب يركض اقوله وينه قال راح فوق الكبت
شوي الا يبي مرضعه !!
بعد شوي ماما شوفي الوحش فوق

يبست من الخوف ختمت القران هالحزه
اتصلت لابوه في الشغل خليته يحاجيه يمكن يهدي شوي

واني صداع شكله هبوط ضغط لاحول ولا قوة الا بالله العلي العظيم
الحمدلله بس،، الله يشافيه ويشافي جميع المرضى يارب

[om khalil]

روز ،، كنت انتظر طفطف تسوي سونار تالي اخبركم

أم أمل ،، ان كانت الافرازات مثل الخيوط المخاطية فهي قرب ولاده ان شاءالله وناس تنزل لهم ممزوجه بدم اكرمكم الله.

أم حماني ، ماشاءالله تبارك الله اينننننننننننن حماني الله يحفظه ويصلحه وتبلغين فيه معرس ان شاءالله

صحى خلي باقوم اسبحه بماي بارد

[أحلام أم]

المشاركة الأصلية كتبت بواسطة om khalil

أحلام أم
غيرناه لعيونش،، والله يطمنا على أم علي ان شاءالله وتقوم بالسلامه يارب

صباح الخير على عيون الحلوات وبيبياتهم
هلااااااااا أم خليل
أخيرا إعترفتي أني قايله مسويه حركة الدليعة وإنتي قايلة لي من قبل ،الله يجيب حسين بالسلامه وتفرحيين فيه وأقعد أدلعه ويابنتي مادري ولدي
الله يسمع منش حبيبتي وتقوم أم علي بالسلامه أمس بعد دخلووها العمليات يارب تتماثل للشفاء ويردون البحريين بالسلامه

[أحلام أم]

أم خليل
ماعليه شر حبيبي خليل ،ألحيين اليهال كله مرضه ،بس ضحكتيني ياهل يخوفش ولا ختمتين القرأن الله يساعدش على التعب
بنت الأياويد
الصلاة على النبي بنتش تينن ماشاء الله ربي يرزقني ببنت أو ولد حلاوتها والله يساعدش على دوام الجامعه
أم حماني
كبروا الحلويين ماشاء الله ربي يخليه ويجعلة من الذرية الصالحة
روز سول وطفلي حياتي وفلونة ونور الدنيا
البارحة فالينها في السهر والسوالف عليكم بالعافية يارب
شمس الصبااح
أشرقي وأعطينه مستجداتش لليوم يم دبة وتبى تولد

لوتدروون سهري البارحة على وويش
أول شي رحت القبائل إشتريت طين مال أطفال علبتين كبار ومسدس صمغ ،مسدسي ضايع في بيت أبووي من العشرة يوم نشارك في المرسم الحسيني وأقعد مثل اليهال أعجن في الطين ،بنتي طالبين عليها مشروع علوم تسوي الأرض بالطين وعلى شكل طبقات يعني طين باللون الأحمر تسوي كورة 6 سم وتالي تسوي فوقها طبقه غير لون 2,5سم وتالي طبقة القشرة 1سم للين تتشكل الكورة الأرضية ويش قدها وتاليييي تاخذين سكين وتقسمينها بالنص وتتطلع الطبقات واضحة وتحطين البيانات عليها بإشارات أعواد وتلصقوونها على قاعدة بالصمغ وترفقيين ورقة بالأدوات والخطوات والوصف في جدول وتااالي إلي إسم الطالبة إللي سوت المشروع أقول ماباااقي إلا أحط إسمي والصف : في البيت خخخخخخخخخ والحلووووة نايمه كأني خدامتها هلكت طلبت إسثغاته من أبو الشباب قال لوويش مالامس طين يدخل في أظافري الرقيق وتالي إنقهرت عليه وقلتله روح نااام عيل ولاإطالع حتى تلفزيون هههههههه

[شمس الصباح]

صباح الخير

بنت الأياويد ما شاء الله تبارك الرحمان والله يبلغش وتشوفينها عروس ويبلغني واشوف بنتي في حضي قريبا بأذن رب العباد

شخباركم بنات كلكم

اليوم تعبانه من امس وهو ينزل على خيوط وايد والمغرب بعد الصلاة صادني مرة وحده ألم في الظهر ويضربني للبطن ما عرفت اقعد مكاني قمت ادور في غرفة النوم بس خمس دقايق الا راح الألم ورحت تمشيت مع اني كان عندي الم بس خفيف ..
ويرد يرجع لي على الساعه ثمان واني اتعشى وانقز من مكاني واحووووووم في البيت بعدين رحت غرفتي وتركت لعيال وابوهم ياكلون لا ادري عن سفره ولا شي وخف اشوي بس متسمر الم الظهر للحين يروح ويرد وهداني انتظر يزيد يمكن يجي الفرج لا تنسوني بنات من دعائكم الليلة الجمعة

اشوفكم بعدين

[Roze]

شمس الصباح ربي يسهل عليش وييسر الموضوع وتتفرصخين بخق هذي الليله يااارب ليلة اليايه عندنه قراءه لسفرة ام البنين بدعي ليكم كلكم تتسهل عليكم ان شاءالله

[حبيبة حسوني]

صاح الخير بنات شخباركم؟؟؟
اني نفسيتي كلش زفت ويش اسوي في روحي
مو طايقه ولاشي ولا طايقه لاشكلي ولا اي شي وكله لايعه جبدي :(

[شمس الصباح]

المشاركة الأصلية كتبت بواسطة Roze

شمس الصباح ربي يسهل عليش وييسر الموضوع وتتفرصخين بخق هذي الليله يااارب ليلة اليايه عندنه قراءه لسفرة ام البنين بدعي ليكم كلكم تتسهل عليكم ان شاءالله

الله يسمع منش يارب اي والله اني بحاجة للدعاء بصراحة هذة ملاك لاعبه فيني اني بولادي ما صار جدي يجي الطلق ما يرحم عليه عليه واولد وارتاح الحين الم يجي ويروح كاني كذابه

حبيبة حسوني تعوذي من ابليس وخلي بالج على نفسج جدي الحامل تصيدها تغيرات نفسيه اني لو اقول ليش ويش سويت تسغربين منى حزت النومة قمت اتقلب في السرير ما اقدر انام الم ظهري دابحني ما اشوف الا ابو لعيال يقول كل دقيقة تتحركين بسسسسسسسسس قال جدي قمت اهدر عليه وتركت اليه الغرفه النوم كلها ورحت غرفه نفاسي ونمت اهناك مسكين خلاني للصبح نايمة لان يعرف اني كلش واصله والصبح بس قرب صوبي قعدت أصيح وهو يدلع فيني

[شمس الصباح]

المشاركة الأصلية كتبت بواسطة om khalil

هلااااااا وغلااااااااااا بكل الحوامل والوالدات

خلاص شمس وفلونه باقول ليكم،،، فيي ولد

باسميه حسين اذا الله أراد... يالله يكون ولد صالح ان شاءالله

دعواتكم

واخيرا ام خليل قلتين الله يسهل عليش وتشوفينه معرس

[أحلام أم]

شمس الصباح
بافولش طلق البنت يتعب غير الولد البنت يجي ويروح ووايد يصيدش ريح إستقبال غير الولد الطلق على بعض
الله يهون عليش مانلومش حبيبتي إقرأي سورة مريم وكثري من التمر وإدعي رب العالميين بعد كل صلاة بالتساهيل مع قرأة سورة الكرسي والنفث على بطنك وللين حمى الطلق إنشاء الله رددي سورة الزلزلة ولاتنسين تتوسليين بأهل البيت في كل لحظة حتى أثناء المخاض ترى يحضرون لش يساعدونش ويشفعون لش عند رب العالميين بتسهيل ولادتش
وبتفرحوون بملاك بينكم وبصير هالتعذيب في خبر كاان
ماببنساش الليلة الجمعة والوفاة ،إنتين بعد لاتنسينه من دعائش في الولادة بسلامة حملنه وأجنتنه وتمام شهورنه وولادتنه بالسلامة ويارب كل البيبيات سالميين