اهلا باهل الجود والكرم **اهلا بسيدات ليبيا**

[خوله 2014]

المشاركة الأصلية كتبت بواسطة sosolibya

السلام عليكم ورحمة الله وبركاته

كيف حالكم وشن أخباركم ..

هلا وغ بأم وسونة وبأمولة وأثري الحلوة وينكم معادش تعاودوها هالغيبة هالمرة سامحناكم المرة الجاية إستدعاء ولي أمر هههههههههههه

فهمتو خخخخخخخخخ


مشكووووووووووورة عزيزتي فيفي عالطريقة الحلوة توا نحاول نجربها..


خولة ربي يوفقك بس حاسة إنك مش حتقدري بعد الجياب سامحيني مانبيش نخوفك من جديد بعد ماقررتي بس إحساسي إنك حتبدي تقولي البيبي يعيط ومالحقتش وفي أخر حلقة تشري واتي..

من توا ماتقوليش سوسو دعت عليا هههه هذا إحساسي وإقتراحي قسميهم يللي يتحمل ديريه توا ويللي مايصبرش خليه بعدين..

سلمها يا رب والله ضحكتيني يا سوسو علي كلمة في اخر الحلقة وتبي الحق والله كلامك جوااااهر وبارك الله فيك عالنصيحة يا حبيبة وباهي اني توا بنكتبلك شني قررت بادن الله تعالي وانتي بالله قوليلي شني الي تحسيه يتحمل وشني الي ما يتحملش
المقروض غريبة الحلقوم كعك التمر وكعك ملون وبالك معمول ووريدة معسلة واصوابع الكستردا مشكلطة والسليلة السابلي بالمربي
ونزيدك عالشعر بيت اني صاحبتي دارت حاجتين والا تلاته بعد ما جابت واني وجارتي درنالها حاجه لكن تبي الحق ولدها سلامته عياااط هلبا فهدا اني خايفة منه وان شاءالله ربي يسخر

[خوله 2014]

السلام عليكم ورحمة الله وبركاته
كيف حالكم يا بنات اليوم يا بنات اليوم تلبيسة اوخيي ادعو بالله معاي ربي يوفقه ويهنيه والعقبه لكل شاب وبنيه يااااارب والعقبة عندكم يا اوخياتي في المنتدي وتفرحو بخوتكم ووخياتكم
اولا رسالتي لهدية حبيبتي ربي يرزقك الصبر والسلوان وربي يغفرله ويكتبله جنات النعيم والحمد لله علي كل حال اللهم لا اعترااض
وتانيا لاخواتي كيف حالكم اليوم ان شاءالله صحيحين ياااارب وبخير انتم ودريتكم ومشكوره حبيباتي سوسو وجيجي علي تعليقكم بالنسبة للبكلاوه ويا ام اجنادين طلبتي صورة الباكو متاع العجينه الجاهزة واهو نزلتهلك كانك في امريكا حتلقيه ميه في الميه

[خوله 2014]

المشاركة الأصلية كتبت بواسطة هدية الخالق

منحكيلكم علي قصتي
احمد اوخيي الله يرحمه اكبر مني بعامين كنت نعتبره توأمي الغالي متعلقين ببعضنا اكثر مما تصوروا كأننا من نفش الجنس نهدرزوا ديما مع بعض واسرارنا عند بعض من لما صغار لدرجة خواتي كانوا يقولولي غير راك تحكيله علي الدورة ودوة النساوين من كثر مايشوفوا فيا ديما لاصقة فيه وروسنا في روس بعض وحتي كنت نمشي نبات عند خوالي فترة يفقدني ويقعد مهبي ومن لما صغار حافظين طبعنا نتعاركوا توا بعد ساعة تلقينا نهدرزوا ولما كبر كل واحد استقل بنفسه شوية بحكم هو وله راجل واني مراة في خصوصيات بيناتنا لكن في نفس الوقت قاعدين متعلقين ببعض مقارنة بالباقيين
حوايجة اني اللي نحددله فيهم ونساعد فيه في كتابة البحوت والمحاضرات في الجامعة ولما يجوه جماعته اني اللي نعول علي ضيافتهم المهم لما تزوجت تأثر عليا وخصوصا إني منسافر حتي لما سألني قداش بتقعدوا برا قلتله عام ونص قالي هللللبة ووجهه تغير وطلع من جنبي يوجع هادي وفي حاله وماتسمعوله حس حتي كان معجب ببنت خالتي ويبي يخطبها وهي صغيرة لا تكلم ولاقال شدوهلي نين انخطبت وهو ساكت وفرحلها وعول في عرسها زي وخيها واكثر
ولما يشوف في حوايج بياني زمان يقول زعما هادي قداش تكلف كان واحد بيخطب مسكين كان يخطط ويخمم في الزواج
وعرسي قامه بروحه ماشاء الله علي اصوله لين ضعف واسمر من التعويل في النو والشمس مسكين
ويوم الدخلة استقبلني واني مروحة من للمزين وفتحلي باب السيارة وقاللهم ماشاء الله عليها طالعة وقعد يضرب بالسلاح ويوم السبوع لما جيت لاهلي نادى عليا بيسلم عليا وخدينا بعض بالاحضان ونبكوا ويوم جي سلم عليا منسافر طبعا جاني في الحوش لانه وقت طلعتي للمطار بيكون مش فاضي وقتها عندها خدمة جاني وقت ظهر مستعجل لانه كان معاه صاخبه يستني فيه في السيارة قعد عالواقف ماباش حتي يقعمز والا يشرب حاجة سلم عليا بالاخضان واني نبكي وهو يحاول مايبكيش ويطمن فيا ويمسحلي في دموعي قالي ماتخافيش السنين يمروا في رمشة عين وترجعلينا بالسلامة وقعدنا فترة حاضنين بعضنا واني نبكي وزوجي واسلافي واقفين يتفرجوا عالموقف ويبكوا موقف لا أحسد عليه للحظة تمنيت نرجع معاه لحوشنا ونولوا زي قبل لانبي زوج لاسفر المهم سلم ولما جي طالع وقف في الباب وشبحلي مشوااار بدون مايقول ولا كلمة وكانوا عيونه يلمعوا والدمعة واضحة فيهم كأنه كان يودع فيا ويملأ في عيونه من ملامحي لأخر مرة وبعدها طلع يجري وسمعت صوت السيارة مشت وقلبي مشي معاها حسيت روحي غريبة ونبيه يرفعني معاه

ومنها ماعاد شفته ولاحنشوفه في هالدنيا وان شاء الله نجتمعوا في الاخرة في جنات النعيم
واما قصة كيف ماخبرونيش ومافقدتاش هذا كله تدبير من ربي العالمين سبحان الله نزل عليا حجاب الغفلة زي مايقولوا
في الفترة الاولي كان الوضع طبيعي يتصل بيا باستمراااار وكان مش اتصال رسالة واخؤ مرة اتصل بيا في العيد الصغير عيد عليا اني وزوجي وماننساها المكالمة نتفكر فيه طلعلي رقم ماعرفتاش لانه مرات تصير لخبطة في الخطوط امشي قلت من؟قالي اني الخال قصده خال البيبي اللي في بطني الله قداش فرحتني كلمته وقتها وقعد يوصي فيا علي نفسي وعلي زوجي وعاللي في بطني وبعدها بفترة انشغل معاش كلمني لعند مابعتلي اخر رسالة كتبلي ليك وحشة موت لكن هانت ان شاء الله قرييا تروخيلنا بالسلامة وديري يالك علي نفسك وعالبيبي وعلي زوجك وان شاء الله نشوفوك علي خير وفي الاخير كاتب اخوك احمد كانه حاس انها اخر رسالة وحتقعد ذكري
بعدها انشغب فترة واني لهيت بالوحم وحالتي حالة نسأل عليه في سؤال عادي عفوي ويقولولي باهي وخلاص ويوم وفاته الصبح كان عندنا ليل ماننساها هذيك الليلة عندي ارق فضيع وقلبي مقبوض والنوم طاير وانوض في زوجي نقوله ماقدرتش نرقد يقولي من الحمل عادي اقري قران واشربي حاجة دافية وارقدي قعدت نتقلب ونتنهد للاربعة بعدين اخيرا رقدت ونضت الصبح مشيت لتلفوني سبحان الله بعتله رسالة والله العظيم
وبعدها لهيت في الحمل والثقل والولادة والبيبي الجديد ومشيت في غفلة وتبوا الحق توا نلوم في روحي عالتقصيؤ في سؤالي عليه بعدين نقول في خاطري هذا تدبير وتخطيط من رب العالمين
شوفوا الحكمة سبحان الله قبل اختي بتخبرني يوم الجنازة قبل مايقرروا انه مايخبرونيش اتصلت بيا بس كنت راقدة ماسمعتش التليفون بعدها اتصلت براجلي خبراته ولحق عليها بوي قبل ماتخبرني
وقبل فترة نقلب في الرشائل اقديمة بالصدفة طحت في اخر رسالة لخوي ومنها بديت نستاقظ ونوعى من غفلتي وين عقلي اني كي هالغيبة ماحسيتش بيها كانهوا مريض راهو صح كانهوا مسافر روح وبدت الوساوس والاحلام والافكار الغريبة وكل مانسال اهلي يطمنةا فيا لكن في داخلي مانقتنعش في الاخير غيرت علي خالي ندردش معاه عالواتس اب شديتها في جرته كيف وكيف ودرتله حالة وهبلته بالاسئلة في البداية انكر وغطا المةضوع زي اهلي ي بعدين قتله كلمني بالعقل وعطيني مبررات بيش نصدق قتله اني مش طالبة غير مكالمة صغيرة منا واعرة هادي؟قالي خلاص اليوم باذن الله نمشي لاهلك ونعطيك تكلميه
مشي هو وبقية اخوالي لبوي وحكوله الموضوع واقنعوه واتصلوا براجلي قالوله روح للحوش جنبها باش نخبروها خش عليا راجلي وجهه اسود حاشاكم مايتفسرش قتله خيرك جاي توا لاباس قالي لاشي اذن الظهر قلتله ايه خش صلاه وجي اتصل بخالي وقالي هاك خالك بيكلمك كلمني وقعد يعطي فيا مقدمات انه ربي امرنا نأمنوا بالقضاء والقدر وانه انتي متعلمة وفاهمة وعاقلة فهمته طول قتله هات من الاخير قالي الخبر ورميت التيليفون لراجلي وهربت لدار النوم فشيت غلي لمدة ساعة كاملة بعدها اتصلت امي تبكي وتتجدي فيا تقولي ماتبكيش وتعدبيه سلم بنيتي نوضي صلي وادعليه قطعتلي قلبي قتلها حاضر نضت صليت وقريت قران ودعيت ومنها ارتحت الحمد لله قعدت نبكي عالخفيف دموع رحمة وفي الليل تهونت شوية نضت درت عشي لراجلي وجعني من الضبح بلاماكلة واهلي واقاربي ماخلونيش كل مرة حد يتصل يعزي ويواسي تليفوني ماهداش يومها والحمد لله مشت المحنة علي خير وارتحا وريحت اهلي من هالكايوس اللي كان علي قلبهم مثقل عليهم وتوا اخسن نفسيتي الحمد لله وخصوصا اني نشوف فيه في الحلم وندعيله ومرة مرة نبكي شوي شوي باش نرتاخ بس والحمد لله ربي ماينزل المصيبة الا معاها الصبر ربي يعوضنا فيه خير ويآجرنا في مصيبتنا ويخلف لنا خيرا منها وربي يرخمه ويغفرله ويتقبله بقبول حسن ويسكنه فسيح جناته ويحفظلي باقي عويلتس وعائلاتكم جميعا
واااااااسفة جدا عالقصة الطويلة والتفاصيل حبيت نحكيلكم التفاصيل كلها ونفضفضلكم ان شاء الله ماتملوش من قرايتها وتقولوا وتدعوا لاخي بظهر الغيب كل ماتتفكروه وعارفتكم ماتقصروش بلا توصاء ربي يحفظكم
السلام عليكم

والله قصتك مؤترة لين خلاص عزيزتي هدية والله العبرة خانقتني سبحان الله هده الدنيا ربي يمتحنك في اعز احبابك ان شاءالله ربي يرزقة الجنه يااارب

[جوهرة ليبيا]

عاشت الاسامي خوخه وربي يحفظها مارية

اهلين خوله كيف حالك وحال بنوتك وبوها

[ام معاد]

خولة مبارك علي وخيك وربي يهنيه وتمم علي خير يارب العالمين.حيجي تسلمي حبيبتي وتعيشي وتسمي وربي يرزقك بعبد الرحمان يارب ياكريم

[ام معاد]

وينكم والا ادسوا في الهدرزة الي الليل خخخخخخ نلتقي بادن الله

[sosolibya]

مساء السعادة عليكم عزيزاتي,,

عَنِ النُّعْمَانِ بْنِ بَشِيرٍ، عَنِ النَّبِيِّ صَلَّى اللَّهُ عَلَيْهِ وَسَلَّمَ قَالَ:
«الدُّعَاءُ هُوَ العِبَادَةُ».
ثُمَّ قَرَأَ:
{وَقَالَ رَبُّكُمْ ادْعُونِي أَسْتَجِبْ لَكُمْ إِنَّ الَّذِينَ يَسْتَكْبِرُونَ عَنْ عِبَادَتِي سَيَدْخُلُونَ جَهَنَّمَ دَاخِرِينَ} (غافر: 60).

[هدية الخالق]

السلام عليكم ورحمة الله وبركاته
سوسو وام معاذ وجيجي وخولة بارك الله فيك علي مشاعركم الغالية وعلي احساسكم بيا وعلي دعائكم ان شاء الله ربي يتقبل ويسمع منكم وان شاء الله ماتجربوا وتعيشوا الاسى اللي عشته وربي يحفظلكم اوخيينكم واوخياتكم وكل اماليكم احبابكم
اااااااامين ياسوسو إن شاء الله يكون حمل سبحان الله كان صدفة هوا مش مخططله
والتحليل قصدا نبي نخليه شوي لنهاية الاسبوع لزيادة التأكيد وحتي لأنه الحمل أو بالاحري الغلطه صارت متاخره مش في أيام التبويض الاولي فلهذا الحمل ممكن يكون صار متاخر ما يوضحش توا ان شاء الله خير خايفه من التجربه الجديده

[sosolibya]

مساااااااااااء المحبة والمودة على الغاليات كيف حالكم توا,,,

وشن جوكم وشن عشاكم ,مدايرة في بالي عاش نبي نتعشلى حاجة خفيفة للصغار وخلاص جي راجلي جايب قرنيطة, عشانا قرنيط مقلي ,, ودزتلي حماتي فطيرة قازول ومبطن اهىىىىىىىء قعدت نعيط هههههه نقول لراجلي مش حرام هكي هههههه بعدين كليت وماعدلتش قلت يللا هههههههه ودزتلي كنة عمي بيتزا هههههههه مش عيب ههههههههه

[هدية الخالق]

صحتين سوسو كولي وما تعدلي المهم أصحيحه وجسمك كويس مش منفر من السمن
والله حتي أني حالي يضحك دروحني نبي أنقص امشي أمس عاركتني المرأة قاتلي إنتي رايحه عود ومسلوله ما فيك ما يتنقص تشوف في روحها هيا مسكينه قاتلي ياريتني زيك بس وحتي راجلي يقولي جسمك كويس لكن أني علي أساس نبي نولي لوزني قبل الحمل والجياب
هبال حشاك