دردشة حوامل أهل الكويت - دردشة بنات الكويت - تجمع حوامل الكويت

[أم ياسمين]

ها زود الغلا اشلونج؟

[زود الغلا]

المشاركة الأصلية كتبت بواسطة أم ياسمين

ها زود الغلا اشلونج؟

انا تمام ...........روحي لتجمعنا ......مشاركتي تخصك :)

[الريانه333]

مبروك ام ياسمين
انه الريانه من الكويت ودي اتعرف عليكم واصير صديقتكم
انه الحين بالشهر التاسع
ادعولي

[أم ياسمين]

الريانه حياج الله و الله يرزقج بالولاده السهله يا رب.

[زود الغلا]

الريانة 333. الله يهون عليك وحياك الله معانا .
ام ياسمين ............شلونك وشلون النفاس وشلون حموودي..مارحتي حق بنتك .؟؟؟

[مودي قهوه]

مرحبا بنات الكويت.. انا من السعوديه من الشرقيه.. وان شاءالله ناويه ازور الكويت بعد عيد الاضحى علشان اتقضى للنفاس يعني قمصان مرتبه وثقيله لاني بولد في 1فبراير يعني عز البرد وبعد ابي ملابس استقبال بس ابيها تكون ناعمه وبنفس الوقت مو معتاده وابي ملابس للبيبي ومن محلات تكون اسعارها معقوله..
حبيباتي ياليت تفيدوني بأسماء محلات لملابس النفاس لي ومحلات تجهيز ملابس البيبي ومحلات مفارش بس مابي اللي تكون معها اطقم ..ومثل ماقلت لكم ياليت تدلوني على اساس انها تكون اسعارها معقوله..

فديتكم بنات الكويت انا بأنتظار ردودكم.. وياليت تذكرون اسم المناطق اللي راح تكون فيها المحلات..

جزاكم الله الف خير

[زود الغلا]

مودي قهوة ..........حياك الله وتنورين الكويت بزيارتك ..
والله يا اختي كل شي عندكم بالشرقية وفي محلات عندكم مو موجودة عندنا تهبل للبيبيات في مجمع الراشد .
بسالك انت تبين ملابس كشخة للمناسبات والا عملية استعمال يومي ؟؟؟؟؟؟

[أم ياسمين]

هاي زود الغلا صايرين ما نتصادف كلش على الصفحات خخخخخخخخخ
والله تدرين بالنفاس نفسية الوحده لج عليها اشويتين و 24 ساعه دايخه صدري يعورني و خيوطي تعورني و بلاعيمي تعورني وراسي يعورني وبدايه نشله والله يعين.
بنتي العوده فيها صخونه من ولدت صارلها اسبوع احطلها تحميله تنزل واشوي وترتفع مره ثانيه والله خايفه عليها الحراره توصل 40 ما ظل مستشفى ما وداها ابوها اخير شي اليوم وداها الراشد سوولها تحليل دم قالو ما عندها مناعه و مافي جسمها فيتامينات فيها نقص بكل شي لان اكلها خربوطه و كثر ما احن عليها تاكل ماكو فايده طبعا كل ما احد يزورني يمرض على طول لأن البيت كله فايروسات ما قام احد اييني وخايفه على حمود ان يمرض بروحه نتفه بس شسوي.
بنوتي رحتلها من يومين و رحتلها مره ثانيه امس قالولنا لا تييون لأن انا وابوها مرضه عشان لا نعادي اليهال اللي بالحضانه بروحهم حالتهم حاله مساكين بس طمنوني عليها شالو الدرب بدت تشرب من حلجها واحتمال يا اليوم يا باجر يودونها الحضانه العاديه والله كريم انشالله.

[زود الغلا]

الله يعينك .........والله انا هالموسم لاعت كبدي صارلنا شهرين عيالي مراضى واحد يخلص ويعادي الثاني و3 مضادات بشهر واحد والحين عطوهم ابر كحة ونشلة وبلاعيم وحرارة .....واااااااااااااااي تعبت والله العظيم زهقت من الادوية ملييييييييت والنشلة صارلها شهرين مستمرة مانفع معاهم ولا شي يقول الدكتور مناعتهم ضعيفة وعطاني فيتامينات على دب .... والله يشفيهم ويشفي بنتك .......... ويطلعلك الحلوة بالسلامة يارب .

[أم ياسمين]

الله يسلمج الحال من بعضه شكله عيالنا شرق ورق بس انا خايفه على الصغار لاني جربت اودي حمود الطبيب ما يستقبلونه بدون اثبات و الميلاديه يبيلها اسبوعين على ما تخلص يقولون السيستم خربان عندهم.