.·¤ تجمع الحوامل اللي ولادتهم في محرم¤·.

[Marawy]

دلع ،، الدورة شكلها اشتاقت لج هههههههه الله يعينج على اعراضها والله افكر بعد الولاده بتتعبنا كثير ،، 9 شهور مرتاحين منها ،،

[Marawy]

روعة النسيان ،، فديتج تسلمين ياقلبي ،، وحياتي انا البنوتات ،، ربي يحفظها لج ان شاء الله وتشوفينها بين احضانج ،، انا من دخلت الاسبوع 25 ولين خلصته وانا اتعب من روحتي الحمام الله يعزكم ،، كل دقيقه ،، حتى النوم يطير من عيوني ،، واوقات اروح الحمام مافيني الا نقطتين بول الله يعزكم هههههه اقول لها تلعبين علي يالنتفه ! لكن شنسوي هذي ضريبة الامومه على قولة ملكتني ،،

انا حامل ببنت واللي احس فيه مدري شنو ههههههه لاني بكريه ،، بس بشكل عام الحمام ذبحني بالدقيقه لاني احسها تضغط على المثانه ،، اوقات احس وكأن رجول بتطلع من تحت من كثر الضغط ،، بطني نازله لتحت مو مرتفعه ورايحه بالعرض اكثر شي ،، يعني كل اللي يشوفوني يقولون شكلج دبدوبه لكن ما يبان انج حامل لو احنا مانعرفج نقول عنج دبه وبس ،، والتشنجات ما جاتني الحمدلله الا مره وحده في الشهر الثالث ،، ممكن لأني امشي واتحرك كثير ،، صرت رياضيه هههههههه رياضيه دبه ياسلام ،، غير اني احس بالحركه في كل مكان ،، يعني مرات يمين ومرات يسار ومرات وسط ،، بس اغلبها فوق السره بشوي ،، واوقات احس بألم في خاصرتي اليسار وكان على بالي اني احتاج سوائل لكن لما زرت الدكتورة طلع هذي النونو تتخبى على جنب وتضغط ويألمني ،، لأنها تدخل راسها في خاصرتي هههههههه وهالشي اللي خلاها ما تكون واضحه في السونار الرباعي ،،

[Marawy]

مشاعل ،، فديت روحج يالغاليه ،، وربي يحفظج ويحفظ النونو لج وتشوفينه يلعب قدامج ،، والله من جد انا احس نفسي مافيني صبر ،، بس تصدقين اصبر روحي كل ما اشوف شريط الحمل ههههه الايام الباقيه تونسني ،، يعني الحين قربت من ال 100 احسها تقلل شوي صبري ،، خصوصا لو ما ادخل التجمع كم يوم وارجع الاقيها طافت عليها ايام هههههههه ادري هبله بس شسوي اتعلق بشي لو تافه يخفف شوقي للنزغه الصغيرونه ،،

مبروك دخولج الاسبوع 25 ،، يعني مافي فرق كبير بيني وبينج يومين بس تقريبا ،، بس عندي سؤال فضولي ليش ماتسوين شريط حمل ؟

[Marawy]

ملكتني ،، مشكووره ياقلبي على المعلومات المفيده ،، انا بخاطري ارضع النونو طبيعي ،، ان شاء الله ربي يجبر بخاطري ويرزقني البنوته اللي ترضى تشرب من صدري وما اواجه صعوبات ،،

بالنسبه لفقر الدم ،، والله ما اعرف لو ممكن تاخذين حبتين ،، اسألي الدكتورة افضل لا تجازفين ،، بس اتوقع ما يضر لو ما يفيدج ،، انا استخدم حبوب foliciron شي جي اسمه ،، وهو كبسوله كبيره لونها اخضر واحمر وفيها الحديد مع الفوليك اسيد في كبسوله وحده ،، اشوفه نافعني ،، ولما يكون دمي ناقص تقول لي الدكتورة اوقفه واستعمل كل حبه لحالها اخذ فوليك اسيد الحبه الصفره وحبة الحديد اللي لونها وردي على احمر ،، ويرجع دمي مثل الفل ،،

وشريط الحمل صح ،، جربت اسويه لج وطلع نفس الشي ،، 19 اسبوع ،، بس بشكل عام انا ما امشي على شريط الحمل كثير ،، يعني اعتمد على حسبة الدكتورة ان كل تاريخ 16 من كل شهر ميلادي ادخل شهر جديد ،،

[Marawy]

نوقا ،، يؤ يؤ يؤ لا فديت قلبج والله ما تهونين تزعلين ،، الا انتي يالغاليه ،، ههههههه هو بجد انا سويت خيانه عظمى لكن مثل ما قلتي ظروفي شفعت لي هههههه والا كنت واقفه بنص التجمع وترجموني بالحجر ههههههههه
بس بجد شي حلو انتظرج تسوينه ،، احسبيني ما سويته هههه عشان ارجع اسويه معاج >> طماعه هههه

فديت قلبج لا تزعلين مني يالغلا تراني ما اقدر على زعلج ،، اي والله (نبعه) مختفيه ،، واخر مره دخلت كانت تقول بيسوون عمليه لولدها سعودي وقالت بتدخل تطمنا شنو يقولون لها عن الجنين ،، ربي يحفظها ويكون المانع خير يارب ،،

[Marawy]

مسك ،، هههههههههه اي والله هذا نفسه الشعور اللي يجيني لما اشوف السونار ،، هو ضحك هو بكي هههه كل المشاعر تختلط فيني ،، اول مره شفت النونو كان بعد تحليل البول بيوم ،، وكانت امي معاي وزوجي ،، واول ما شفنا النونو كان صغير (بالاسبوع 7) وامي صارت تضحك وتبكي وزوجي يضحك ويبكي هههههه والله اشكالنا تضحك ولما سمعنا النبض صرت ابكي والمخده تبللت دموع هههههه حتى زوجي كان عنده دوره مع الشغل يسافر شهرين للاردن ،، بعد ما طلعنا من الغرفه قال لي انا ما بروح ههههههههه خلاص بكنسل الدوره ،، فديته تحمس ،،

[Marawy]

شذا ،، ربي يتمم لج على خير ان شاء الله وتولدين بالسلامه ،، ان شاء الله البنات يفيدونج ،،


مريم ،، ربي يعطيج الصحه والعافيه ،، الحمام المغربي مضر للحامل ،، اذكر صديقتي راحت ل 4 صالونات وكلهم رفضوا يسوون لها حمام مغربي لانها حامل والبخار والفرك مو زين للحامل على كلامهم ،، نصيحه خليه لبعد الولاده والاربعين ،،

[Marawy]

اللهم سترك ،، يالله بجد شي يحطم ،، المفروض يعطونج لها رضعه ،، احنا بالمشفى يعطون رضعه كل كم ساعه يخلونها بسرير النونو ،، واشوف صديقاتي وخواتي يحاولون بالرضاعه الطبيعيه حتى لو ما يطلع للبيبي شي ،، بس اهم شي يمص لحد ما يتحفز الصدر ويطلع الحليب ،،

[دلع الأحساء]

ميشو اي والله مساكين ارجالنا حر ورطوبه وشمس وصوم
ولجا الليل قضو مشاويرنا
احس يتعبون بصوم اكثر منا صج حوامل ونتعب بس اهم اكثر
ميشو بخصوص حمام مغربي انا لبغيت اتدعج عدل خليت زوجي يدعجني
واطلع من الحمام الق ونظيفه ههه
اما انا لتدعجت ابروحي اخربط امرر الليفه والمط تملمط
يعني قبل العيد بيوم خلي رجلك يدعكك بليفه عاديه وصابون بس مو يشمخك خخخ بشويش

[دلع الأحساء]

مراوي انا مافتكيت من اعراض الدوره كل شهر تجيني
مخرفه دورتي حييل ههه