حبيباتى سيدات ليبيا تفضلو لأعرف ما حالكم

[هدية الخالق]

السلام عليكم ورحمة الله وبركاته
كيف حالكم كلكم ليكم وحشة هللللللبه
جنوده الحمد لله على السلامة سفرة موفقة إن شاء الله ماشاء الله بتقري حتى إنتي كويس
اكيد توا بتقري انجليزي هو الأول ربي يعاونك ويوفقك إن شاء الله
ومعليشي اكيد الأيام الاولي بتحسي بوحدة ومش متعودة عالمكان هذا علاش تنوضي بكري
لكن شوي شوي تو تعودي وخصوصا إنك بتقري وقتك حيمتلى كله وتقعدي تتمني في الفضوه والكساد

[هدية الخالق]

فروسة اهلين ومرحبتين انستينا من جديد ليك وحشة حتى لو ما فقدتكش بخطي فقدتك بقلبي
رحلة تهبل ممتعه ماشاء الله ربي يخليلك زوجك يعيش ويدهورك
تعرفي بكيتيني لما حكيتي على لحظات الوداع في ليبيا حتى أني نوعيتي زيك مايهونش عليا عشرة الاماكن حتى منهبل خاطري نروح لليبيا لكن في نفس الوقت مش هاين عليا عشرة حوشنا والاماكن والناس اللي اهني مانحبش حتى نغير وننتقل من حوش لحوش نوعي نكبد عالحاجة هلبة وزوجي زيي قال حتى تليفون مايهونش عليا عشرته فما بالك أشخاص والا أماكن معاشرهم سنين
وهو بالذات تعود هلبة عالعيشه اهني قريب يسكر عالخمسه سنين روح مره وحدة لما تزوجنا بس تعرفي كان مش لحقت عليه راهو راحت منا اللغة العربية او بالاحرى الليبية ههههه لأنه كان عايش بروحه وفي الجامعة يتكلم انجليزي واصحابه العرب قال الأغلب نتكلموا انجليزي خير من كل واحد مايفهمش كلام الثاني ويبي توضيح شن معنى هادي وشن معني هادي وووو
لدرجة لما روح لليبيا أهله قالوا الكلام الليبي معاش يسقم فيه مرات يقعد يهدرز وبيقول كلمة يقعد يفكر فيها ويقول نعرفها بالانجليزي لكن راحت مني بالعربي ههههه
لكن توا باهي الحمد لله أني جيت وبديت نرغي معاه صبح وليل لين ينسي الانجليزية بكل هههههه

[هدية الخالق]

أموله وجيجي بدي العد التنازلي ربي يسهل عليكم وينوضكم بالسلامه وتشوفوا بنياتكم على خير يارب
باقي البنات شن اخباركم كلكم وحشتني وحدة وحدة والله أني هاليومين رقبتي حالة الواز ولما نبلع في ريقي كأني نبلع في موس وحبيبتي سوما زايده عليا الله يهديها كل يوم تنوض فيا من الفجور وترقد فيا متأخر وطول اليوم نجري وراها من مكان لمكان وكانى فالحة نحطها في الجراي والا القعماز تبدأ فيها عياطات يا لطيف لين نخاف نقول تو يسمعوها برة يجوني يحسابوني نضرب فيها ياخدوها مني ههههه الله يهديها ويعيني عليها وخلاص
سلاااامات

[جوهرة ليبيا]

السلام عليكم ورحمه الله وبركاته

[جوهرة ليبيا]

كيف حالكم ياحلوات كلكم

خيره التجمع بدي كساااااااااااد وينكم ياهدرازات

[ليبياقلبي]

هلا جيجي كعادة تفنصي امتى موعدك

[ليبياقلبي]

ام فروسة ربي يوفقك امتى مروحة انت
جنودة ربي معاك وربي يفرجهاعليك
هدي وينك انا خمسية زيك وطلعنا معارف فوتني \
اسمعوا انا احتمال مصر مصرليش علشان تاشير راجلي بشن تنصحنوني الاردن ولا ماليزيا

[هدية الخالق]

المشاركة الأصلية كتبت بواسطة ليبياقلبي

ام فروسة ربي يوفقك امتى مروحة انت
جنودة ربي معاك وربي يفرجهاعليك
هدي وينك انا خمسية زيك وطلعنا معارف فوتني \
اسمعوا انا احتمال مصر مصرليش علشان تاشير راجلي بشن تنصحنوني الاردن ولا ماليزيا

أهلين ام نوزة شن أخبارك والله الا في القلب وتخطري عليا ديما

بالعكس اني زعلانة منك انتي معاش عدلتي قداش مرة نقرأ في ردك تسألي على كل البنات إلا اني وآخر مرة بعتلك رسالة عالخاص مارديتيش عليا

[هدية الخالق]

ربي يسهل اموركم وتتسخر السفرة ونحس فيها ماليزيا خير

[sosolibya]

السلام عليكم ورحمة الله وبركاته