ديوانية البحرين - دردشة حوامل البحرين - البحرينيات

[حنين للماضي]

السلام عليكم
شخباركم حبيبات قلبي؟؟؟

بنت الاياويد يااااارب تولدين بسرعة وترتاحين من التفكير والثقل
الله يسهل عليش ان شااءللله

شموس شخبارش الحين؟؟؟
راحت النساة لو للحين؟؟
الله يكون في عونش؟؟

احلام ام طمنينا على صحتش حبيبتي؟؟

ام السادة هلا فيش حبيبتي
يمكن وضعية البيبي ما كانت عدلة ومابين شيء في السونار من جدي بعيدونه ليش لا تحاتين حبيبتي

طف طف وبنوتة وفلونة وروز والذهبية ودمع الحنين و فرح عمري وام خليل و حبيبة حسوني بروفكشن وام امل شخباركم حبيباتي؟؟؟

ام حماني وحروف وحشونا عددل
يااارب يكونون هم واولادهم بخير

فتاة شكله حلمتش بتضبط بإذن الله
اني كله عندي احساس اني بقدم اسبوعين مادري ليش
بشتغل على اغراضي وشنطات المستشفى من هالاسبوع
اخاف اجيني الطلق من بداية التاسع واني مو مكلملة شغلي وغشال ثياب مي مي

[أحلام أم]

المشاركة الأصلية كتبت بواسطة حنين للماضي

السلام عليكم
شخباركم حبيبات قلبي؟؟؟


احلام ام طمنينا على صحتش حبيبتي؟؟

هلا وغلا حبيبتي مشكورة لسؤالش عني أم ميثم
أني الحمدلله صرت أحسن بس الكحه ياخوفي منها البارحه نزل مني إفراز وخفت وقمت أكتم الكحه بس لمته بكتمها لأنه كل ماكحيت أحس بظغط من الأسفل ومن جديه ينزل الإفراز الله يستر وتخف عليي وتروح عني
يالله ضبطي أمورش وأمور الحلو ميثم وإحزمي الشنط وكتبي عليهم إكتملت التجهيزات بس خلاص أني من الثامن أجهز أغراضي وحطهم كلهم في زاوية مع التوزيعات وأخلي الشهر التاسع للراحه والمشي والإستعداد ومن أولد أبو الشباب عليه بس يحملهم لي الأغراض ولايدري ويش فيهم خبرش كله أشتغل بالسكيتي عنه

[أحلام أم]

باقولكم قصة ولادتي بحمود ولدي مختصره كلش لأني بعدي دايخه من مرضي
كنت هذيك الأيام عندي شغاله إندنوسية وأني وياها تج وحسوووودة وتجسس عليي في كل شي وتنقل أخباري بيت عمي وطالعني في كل حركه وتنعت جسمي ماتشيل عيونها تقولوون رجال يغازل لوما متأكده هي مره قلت رجال وطول حملي ملفوفه بالمشمر عنها ولاكني في بيت بروحي ولو مو الحاجه قشعتها في الشهر التاسع ليي أخره قبل إسبوعين من موعدي حسيت بألم خفيف في الظهر وأني من عادتي من يهل التاسع أستجن أمبى أولد رحت الطوارىء وراح أبو الشباب الشغل لأنه ماعندي طلق وقال بجي المغرب وكان وداني الساعه يمكن 4 العصر وبس ضلينه على إتصال أني من قلت شكله عندي طلق من كذبي وراحوا يشوفون عنق الرحم إلا صدق متوسعه 4 سانتي ويمكن الهندية النحيسة وسعتني زيادة وحبسوني وودوني الولادة وأني أضحك على روحي وأقول كذبت الكذبه وطلعت صدق وتجي أمي وأخواتي ومرة أخويي ويدخلوون غرفة الولادة يصيحون ومرة أخويي مصممه فيي بنت وتقول ألحيين بتولديين وبنشوف البنت طردوهم اللسسترات وأبو الشباب يدري أني في الولادة بس مشغول في الشغل وقصبوني زاد الطلق وحمى وبطو الكيس وضربوني إبرة توسع في الورك المهم ولدت وجبت حبيبي حمودي في الليل وأخذوه من عندي للفحوصات والتنظيف وهم بره مايدرون ولدت دخل أبو الشباب وإستفسر من إستعلامات جناح الولادة قالوا ماولدت وجى وسلم وحب راسي ويقول بعدش الله يساعدش مسكينه سامحيني تويي مخلص الشغل وأني أطالعه وأضحك وهو متوتر وضايق خلقه ،قلتله مبروك وبدون إهتمام قال الله يبارك فيش وهو يعدل السرير متفرغ وبعدين إلتفت لي وقال هاااااااا يعني ويش قلتله ولدت قال صدق وهو يطالع بطني وفي قمة العصبية على الجناح وبس إتأكد من إني صدق ولدت وسأل وينه قلتله أخذوه ينظفونه وراح ركض ليهم وهاوشهم هوااااااش يقول زوجتي ولدت وخلصت وأنتون تقولون ماولدت وتالي فرح بالبيبي وشاله وهو بعده وياهم ودخلو الباقي ومرة أخويي عندها حره تقول ولد هااا معنها مخطوبه كاانت وبس ضحكت سحبت أخويي وقالت ألحين نتزوج ونجيب مثله مجنونه وبعدين جابت بنت عمرها سنه ألحييين وبس
إدعولي ربي يتمم حملي هالمرة وأجيببه سالم أو سالمة في الشهر التاسع

[بنت الأياويد]

الله يسمع منج حنين ، احلام ام خوش قصة الصراحة ان شاء الله ولادتج هالمرة تكون جذي بعد انا فيني الم في ريولي وايد وظهري وتحت بطني بس خايفة اروح بسبة هالكشف الي يسوونه واهمه اوردي قايلين لي فيج طلق يبين من التخطيط بس لين زاد تعالي فالحين محتارة مادري اروح ولا انطر لي الليل لان من اربع ونص الفجر كل شوي اقحص من النوم على الم

[طفلي حياتي]

السلام عليكم
هلا احلام ام خوش قصه والله هههههههه
بنت الاياويد ربي يسهلها عليش مابقى الا لحظات وتشوفين احلى شيخه ان شاء الله ولا تنسينا وقت الولاده بتسهيل الحمل والولاده لانها لحظات مستجاب فيها الدعاء
وبنوتتي مادخلت مادري وشخبارها

[طفلي حياتي]

اي صدق بسألكم
اني طلع مني سائل شفاف من صدري والحين ارعص في صدري ما يطلع شي لاكون مابينزل حليب لولدي؟؟؟
وش السالفه ليش بس يوم واحد شفته؟؟

[أحلام أم]

هلا عجبتكم قصتي هاااا نكته قصة ولادتي بحمود
بنت الأياويد مشكورة حبيبتي على دعواتش ربي يسهل عليش الولادة وترتاحين بشوفة شيخة البنات بحضنش يارب العالميين
حبيبتي شوفي إذا تتحمليين الألم صبري وإلا روحي المستشفى وشوفي إذا الألم قاعد إيي كل 10 دقائق أو 5 دقائق يعني منتظم روحي والبكريه تطول في الولادة بس يعتنون بها أحسن من إللي والده من قبل يارب كل أمورش ميسرة
طفلي حياتي
خوش قصه هاااا بس صدق ذكريات حلوة يارب نسمع منش قصة ولادتش بفرحان أو فرحااانه وتطلع أحلى قصة
شوفي باقولش لاتعوريين صدرش ولاتعصريين هذا إللي ينزل مو حليب هذا يسمونه كلستوم كأنه وهذا عاادي يتكوون في الصدر في حوامل يطلع من الحلمات في الحمل وحوامل مايطلع كلش لين الولادة
أني ببنتي طلع من الرابع كأنه ويصير ينزل مني وأني تايمه واايد وصرت أوسوس وأقول الحليب بيخلص هههههه،وباقي حملاتي مانزل ولاشي طواااال الحمل وخفت وتأكدت إن مولازم ينزل وعاادي بعدين ينزل الحليب بعد الولادة إنتين بكريه ولازم تحاتييين عاااادي ولاتوسوسين مولازم ينزززززل بس نظفي الحلمات أثناء السباحة ولاتعصريين

[طفلي حياتي]

مشكوره احلام ام طمنتيني وايد
اني قلت حقويش وقف جان مو مابيطلع للبيبي حليب خبرش خباله فيني والوسواس على طريف
وقصتش عجايب ويى ريلش ومرت اخوش هههههههه هي حقويش ماتبغي تييبين ولد؟؟؟ وليش مصره الا بنت خخخخخخ نكت

[أحلام أم]

طفلي حياتي
الظهر حاولت أنام بس وين وهذيله عندهم عطله
مرة أخويي ههههه كنت حامل وياإختها وكل مرة تييي بيت أبويي تقول إختها فيها بنيه وإختها كل إسبوع تقريبا تتأكد تسوي سونار في الشفاء ومستجنه من الفرح لأن فيها بنيه لأن قبل عندها ولد وكل مرة تحاول تعرف ويش فيي وأني لوويش ماأعلم لين أولد بس أمي وأخواتي وزوجي يعرفوون وظلت يختش فيها حووومه تبى تعرف وكل ماشافت شكلي بس تتحزى فيني وصار عندها تحدي وياخطيبة أخويي الثاني إني خلاص فيي بنيه وتبي تغلب خلف الله ،وهيكي إختها هالمرة حاامل بعد ويش هالحاله ومادري شلوون درت أني حامل ماحد من بيت أبويي قال لحد ومن ألحـــــــــيين فيها حومه تراقبني في قومتي وقعدتي وترمي حجي تبى تعرف أي شي عني الله يستر عليي منها أمبى أنخش عنها لاكن وين أنخش مانشوف إلا بطبتها

[أحلام أم]

يمكن أروح المستشفى عن الكحه ذابحتني