تجمع حوامل ليبيا

[ღॐ آية ღॐ]

انا من راي ام سعد يا ام ردينه
رزاطة وعبمبر احسن
وانا بصراحة ما عنديش معاهم روح
وان شاء الله كل شي بلبركة وربي يعاونك

[ღॐ آية ღॐ]

المشاركة الأصلية كتبت بواسطة ليبياقلبي

يسعد مساكم انا نفسيتي تعبانة هلبة هلبة ومن مبكري نبكي الدكتور قالي مياه البيبي ناقصة واعطيني دواء والله نفسيتي تاعبنة ادعولي بالله عليكم

ليبيا قلبي ما تتغشيشيش ولا تزعلي عمرك بادن لله ترجع كمية المياة
بس ماقالكش شن سبب نقص المية ..
ضروري تساليه ...
وربي يسهل عليك وتولدي في موعدك
دومي على العلاج وديري بالك على عمرك

[حنين88]

السلام عليكم كيف حالكم يابنات ليبيا قلبي ، تيمو ليبيا، عيون زوجي ، سورينام، نسرينا ، حبل الوصل ، راجية ، ام رودينة، ام اسيل ، اية ، ام سعد ، بوسي، لولي والجميع ان شاء الله مانسيت حد اني تعبانة يابنات مع اني نهاية الثالث والصداع زايد والماكلة معاش فيه نية والغربة حتى هيا دايرة فيا حالة ماتلقيش حتى من يمدلك طاسة المية راجلي ديمة مشغول ويروح موخر والحمد لله وخلاص نتمنى نروح لليبيا ونقعد عند امي والله تعبت تعبت وعندي وجع فم المعدة شوره من الترجيع تعرفو نقعد بروحي في الحوش زي الغولة والله نستاحش في صوتي والصداع اليوم اربع ايام مستمر نرقد ونوض عليه يارب صبرني وكوني معايالف لاباس عليك يا ليبيا قلبي ماتشوفي شر

[ليبياقلبي]

مشكورة سورينام واية وربي يشفيك ويصبرك ويكون معاك حنو والله استاحشناك ويا اية الدكتور قالي من المشيمة موصليتش الدم هكي قالي واعطاني دواء وقالي ولي بعد اسبوعين كان هدا بنولدك مبكر والمشكلة زيدي الطين بلة عندي شوية زلال في البول والتهاب مسالك رجعلي لانا حملت بيه من الاول والله ربك يستر

[حبل الوصل]

السلام عليكم كيف حالكم كلكم ولاباس عليك ياحنين وليبيا قلبي وعيون
اية ان شاءالله تحولى وتجيبي في بيتك الجديد على خير انتى وام سعد
معراج وين هالغيبة والاالوحم جايك علينا ربي يسهل عليك
سورينام الك وحشة وشن حال صغارك

[حبل الوصل]

يابنات نبي نسالكم ولدى عندى التهاب في اللوزات وديما يشكى منهم وبطل حتى الماكلة ودواء الدكتور مش نافع فيه وقالولى لازم من العملية لما يسكر 5سنين لكن بوه مايبيش يديرله العملية وانى مش متحملة نشوفه هكى لوعندكم علاج غير علاج الدكتور بالله قولولى عليه

[أم سعد]

السلامـ عليكمـ

ليبيا قلبي .. ألف لاباس عليك إن شاء الله وماتتغششيش روحكـ راهو حتى النفسية تأثر

حنين .. فترة وتفوت إن شاء الله مع الرابع كله يمشي تقولي كذب هذا اللي يقولو فيه الجماعة اللي تتوحم اصبري هانت إن شاء الله

حبل الوصل .. حل ولدك العملية أنا كنت هكي وخوتي كلنا نتعبو هلبه منهم ومارتحناش إلا لما نحيناهم وتوا صغار أختي نفس الشي ومارتاحوش إلا بعد مانحوهم اللوز فرق كبيييييييير بكل

آية .. إزيك النهاردة عامله ايه

سورينام .. نورت التجمع

عيون زوجي .. كيف حالك اليوم إن شاء الله أحسن

[حبل الوصل]

اهلين ام سعد
انى عارفة ان هذا الحل بس شن يخلي البو يقتنع والله قريب نهرب بيه ونديرله عملية

[أم سعد]

خليه يمشي للدكتور ويقتنع منه

قوليله هذا كلام دكاترة ويسأل أكثر من دكتور لو هو خايف

وبعدين العملية هذه ولت حاجة عادية بكل عندنا

توا الأسبوع اللي فات دارها صاحب زوجي لبنته والحمد لله أمورها تمام

ودارهالها في شارع الزاوية وتوا الحمد لله تمام التمام

[ام اسيل]

تسلميلي ياعيون وان شاء الله حتى عشرة والله ماني كارهتهم
تعرفي وقسما بالله امس حلمت بيك جايتيني في الحوش وشكلك يهبل ورشيقة خالص وانا نقول خزي على نسرينا وسورينام يقولو دبة وهي تهبل صورتك اللي في الحلم هي اللي نتخيل فيها عليك توا

حبل الوصل لاباس على عموري ولازم تقنعي بوه انا منبيش نخوفك بس عندي صاحبتي ولدها جاته فترة يطيح وبعدها معش قدر يمشي ولما شالوه لتونس قالولهم هذا من التهاب اللوز دايرات صديد ونازل على الرجلين
توا الوليد كويس بس انتي ردي بالك



رجاااااااااااااااااااااااااااااااااااااااااء؟؟؟؟؟؟ ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

وينك ياحلو ليك وحشة ان شاء الله المانع خير وتكوني طلعتي حامل يارب