دردشة حوامل أهل مكة المكرمة - دردشة بنات مكة المكرمة - تجمع حوامل مكة المكرمة

[في عيون زوجي]

مرحبا نور ..
الله يسهل ولادتك يارب والبنات كلهم ..
وبالسلامه لك وللجنين ان شاااء الله ..:)

[نلي خانم]

في عيون زوجي.. حمي حمي اجل اللي يشوفك يقول سياره تتحمى قبل المشي خخخخخخ الله يسهل لنا يارب ماشاء الله عليك شكلك بتولدي قبلي مو مهم أهم حاجه نقوم بالسلامه احيان أقول شكل راح أولد اول التاسع مدري بس أحساس بس أتمنى اكمل التاسع كامل أفضل للبيبي

هلا نور القمر أخيرا شفناكي يارب تولدي بالسلامه وتكون ولادتك طبيعيه

[Om KHaled]

ربي يسمع منكم يا غاليات
ربي يخليكم ويكرمكم ان شاء الله

أختي نلي خانم تسلمي لي يا قمر وشكرا كثير على اهتمامك , ان شاء الله ماراح اغيب

[كوكب زحل]

صباح الخير
كيفكم
مبروك كل من تم ولادتهم على خير
عقبال الباقين
ياقلبي يانلى الله يتمم حملك على خير
كل مااشوفك افتكر نفسي لانى كان حملى معاك سبحان الله احسب كل شهر كان الحين في شهر كذا الحمدالله على كل حال ان شالله افرح بحملى قريب يارب
ماقولتي حامل في بنت ولا ولد
انا احب اسم تولين زوجي مو عاجبه
اما اسم الولد خلاص موجود بس ماقولت لى احد باذن الله اذا ربي اكرمني حملت راح اسمي اسم الولد مفاجاة للجميع

أمل
اسمعي كلام نلى عيشي حياتك

[في عيون زوجي]

اختي نلي..
ايوه عليك نور زي السياره .. اسخن واحمي ..
والله مافرقت معاي قبل او بعد اهم شي السلامه ..
نفسنا بولاده من غير الم ..
وسهله وسريعه .. ممكن ياترى ..؟؟ ..
الله يرزقني انا وياكم جميعا السهوله والسرعه واليسر ..

ومراحب نور القمر ..
واهلين كوكب زحل ..
الله ياجرك ويعوضك ربي بالخير ان شاء الله عن قريب ..

حبيت اسأل يابنات فين الاقي سرير بيبي مواليد حلوه واللي فيها ستاره كذا واقدر اغير لبسها يعني ..من فين انتو اشتريتوها ..؟

[ثلجه فوشيه]

مسسساكم نور ورضا من الرحمن ..

كيفكم بنات وحشتووني ؟؟

أنا بخير وعموري يسلم عليكم يستنا اصحابو يشرفو بخير هههه

كل ما اجي ادخل اقول اسلم عليكم واطمن واشوف اخباركم عموري يبكي :(

ولا يخليني اشوف ايش عاملين .. !!!

في عيون زوجي ونلي ونور القمر ربي يتمم لكم على خيرر ..

كوكب ربي يرزقك الذريه الصالحه بأذن واحد أحد

نلي لا تفررحي أنا كنت زيك انتظر التاسع على أحر من الجمر عشان اخرج كل يوم أمشي هههه

يوم جربت المشي صررت اشوف الموت من الثقل والتعب ارجع البيت مهلووكه بموت من الألأم

آآآهـ بس الحمد لله والله يأجرنا ..

صار زوجي يقولي ثاني يوم يلا نمشي اقولو ماقدر تعب امس لسا ماسك جسمي ورجلي وظهري

وكان يخرجني بالقوه ويضحك عليا يقول فين الي تقول بخرج كل يوم امشي خخخ

والله صرت اكره الخرجه آخر ايامي بالتاسع لاني ماكنت اقدر انام بعدها بس عدت على خير

وسبحان الله اكثر شي فآدني بولادتي المشي ..

[نلي خانم]

مساء الورد
كيفكم ياحلوين
أنا مارحت مراجعتي اليوم زوجي سهران وأتصلنا على العياده وأجلناها بكره أن شاء الله كنت أتمنى أروح اليوم وأشوف قصة هالألتهاب اللي بالمسالك له خمس شهور يابنات والله تعبت أحس ماعاد لي نفس أشرب مويه أحس المويه ماتجيب نتيجه ولا المضاد أمي تقولي أنها كانت كذا مع الحمل يزيد عندها ألتهاب المسالك ألين تولد شكلي صايره مثل أمي في هالشي

نور القمر
العفو ياقلبي أحنا أخوات وأنا مأهتم فيكم ألا من محبتي لكم يعلم الله أني أفقدكم لما تغيبوا بس أعذر البنات اللي ولدت واللي ثقلت الله يكون بعون الجميع يارب بس أنا ماراح أغيب بأذن الله راح أحاول أكون دايم متواجده

كوكب
ربي يرزقك بالذريه ياقمر

في عيون زوجي
ترى اسمك بلشه كأني اقولك أنك في عيون زوجي الله لايقوله يجعل مايسكن عيونه ألا أنا هههههههه
ممكن تكون ولادتك سهله بأذن الله لكن حافظي على قرائة سورة البقره يوميا لأن أختي تقول في حملها كانت بس تقرأها يوميا ولما جات تولد تقول أنها ولدت على السرير قبل لاتروح الكشك وماأنشقت أبدا يعني ولاده سريعه و بدون توسعه تقولي أسرع ولاده مرت فيها والشي الوحيد اللي سوته أنها حافظت على سورة البقره يوميا عكس كل ولاداتها الباقيه تقولي ماقرأت سورة البقره وكانت صعبه وبطلق صناعي

والسرير حق البيبي روحي سنتر بوينت ترى السرر تجنن هناك أنا أخذت سرير كبير اللي بسياج من الجوانب بصراحه مميزاته رهيبه ولك وللزمن تقدرين تنزليه درجات كل ماكبر ولدك تنزليه درجه يعني حتى لو كبر ومشي وكنتي نايمه مايقدر يخرج من السرير ويحوس لك البيت وكمان السياج تقدري ترفعيه فوق وترخيه تحت ... وتلاقين المفرش حقه كمان في سنتر بوينت ولمفرش معاه قطع محشيه قطن تركبيها على السياج يعني لو ولدك ضرب راسه في السياج راح يكون مغطى بقطن ... وكمان الستاره تشتريها لوحدها وتقدري تركبي فيها دبدوب فوق ... أنا أشوف السرير مميز من كل النواحي مره حلو أنصحك فيه

وكمان جاني هديه من أنسانه عزيزه عليه هندول مره حلو أخذته من شارع الستين من محل أسمه كل شي للأطفال تلاقيه على الشارع العام ترى المحل حلو فيه أشياء حلوه الهندول هزاز وله ستاره صغيره ومعاه المفرش حقه وبطانيه ومثبت فيه ثلاثه دباديب نازله مره حلو وله زي الجيب أسفل ممكن تحطي الأغراض حقت النونو فيه اللي دايم تحتاجيها سعره 300 ريال بس تقدري تستخدميه ألين يكبر النونو شوي ممكن ألين ينقلب بعدين يتفكك وتخزنيه لولادتك الثانيه
أنا عن نفسي راح أستخدم في البدايه الهندول وبأذن الله بعد أربع شهور أبدأ أستخدم السرير الثاني
نسيت أقولك السرير الأول يستخدم من الولاده ألى عمر 8 سنوات وفي شارع الستين في محل كل شي للأطفال تلاقين سرير كبير بمفرش وستاره أرخص من اللي في سنتر بوينت وتقريبا يشبه للي في سنتر بوينت بسياج مع الجوانب بس أنا عن نفسي عجبني اللي في سنتر بوينت أكثر

ثلجه
كيفك وكيف النونو وكيف البابا والماما
آهـ على المشي والأنفلات وش كثر مشتاقه للمشي الأسبوع الماضي رحت لرابية مكه وتذكرتك لما كنتي تمشي فيه الحمدلله أن ربي سهل لك وجنيتي تعبك باقي أقل من شهر وأروح لرابية مكه أخذ مكانك بس لاأشوفك تجين هناك أغار من الرشيقات هالأيام ... ربي يحفظك ويحفظ عمورك من كل شر يارب

[في عيون زوجي]

مرحبا بنات مكه ..
سلامتك نلي .. الف لاباس عليك من الالتهاب ..
انا سمعت ان الحلبه طيبه للالتهابات المسالك البوليه بس اخاف مو كويسه للحمل ..
وقبل احمل كان عندي التهاب في مجرى البول وانتي بكرامه وشربة كاس حلبه بارده وحده بوحده .. بس ما اعرف للحمل زينه والا لا ..
هههه ومعاك حق في اسمي ..
طيب اش رايك.. اقلبي من ياء ( زوجي ) الى هاء ( زوجها )..
والا اريحك قولي لي عيون وبس ..ودلعيني .. ( عوعو )
واليوم انا كان عندي موعد ..
ورحت الصباح .. الحمدلله الاوضاع كانت طيبه ..وفحص سكر الحمل طلع كويس ..
ويسلمو على النصايح يا نلي .. تبع الاسره .. اليوم كنت فيه سنتر بوينت ..
بس ماشريت .. احترت .. فيه اللي كانه سله .. وله غطاء ..
وفيه الخشب بس قلت كبير .. وغويط ..
وقاعده افكر انه يناسب مستوى سريري ..
لانه لو غويط .. ومع النوم .. برميه رمي هالنونو

بس شريت من سنتر بوينت .. معقم الرضاعات حلو وعجبني .. ولي عوده له مره ثانيه ..

[نلي خانم]

هلا عوعو ههههههههه عجبني الأسم
ياقلبي السرير مو شرط يكون غويط هو درجات لو طالعتي تحت من الجنب راح تلاقين حديده فيها ثلاث مسامير متباعده كل ماكبر البيبي تفكينه من الدرجه تنزليه في الدرجه اللي بعدها وتربطي المسمار وكمان السياج تقدرين تنزليه مو شرط يكون مرتفع
ترى السرير له مميزات بس يمكن العامل ماعرفكم صح على مميزاته أنتي أذا رحتي لمره الثانيه خليه يشرح لكم كيف يتنزل درجات وكيف ترفعي السياج وتنزليه
الحلو فيه لما يبدأ ينقلب البيبي تظمنين مايطيح يمسكه السياج انا عن نفسي مره مبسوطه اني أشتريته حتى أخت زوجي مره عجبها وتبغى تشتري مثله

كمان خذي الشنطه حقت البيبي والمدس اللي عندهم مره فخمه وخطيره خامتها تجنن لها ربطات مع الجنب والشنطه لها زي العصايه من فوق توقف الشنطه وتخرج العصايه لو بتغسلين الشنطه مره حلوه أحسها من الأشياء المميزه في سنتر بوينت لاتفوتك الشنطه سعرها 199 والمدس 179

[أحلى موني]

كيفكم ياكروشااااات وحشتوني انا بخير والحمدلله بس ليا فتره احس بالام اسفل ظهري وفي بطني وحركه الجنين مره خفت جالسه بيت اهلي لي فتره شغالتي راحت وطفشت التكارين ابغى حبشيه والا جاويه في احد يعرفلي؟؟؟؟؟؟؟؟؟؟؟؟