ديوانية البحرين - دردشة حوامل البحرين - البحرينيات

[خجول وردي]

هلااا بخواتي ، شلونكم ؟
أقبلوني " حامل " جديدة معاكم
آخر دورة كانت لي 23-9 ..
و أنا الحين كملت عشر اسابيع و يومين يعني الشهر الثالث
.
و بصراحة صايرة وسواسية غير شكل
وكله خايفة :(
و السبب فشل حملي الأول .. و متعقدة حيل ..
صاير حتى نومي غير شكل .. ماعرف انام ..

[بنت الأياويد]

الله يطمنج ويثبت حملج ويبلغج في الجنين واهو بصحة وعافيه وحياج الله بين خواتج في الديوانية، فلونة من المتابعين حق القصة

[فلونة]

خجول وردي،،، بنت المملكة ... الله يتمم لك على خير وحياكم بين خواتكم

[طفلي حياتي]

هلا والله فلونه نورت الديوانيه
كملي القصه

[بنت الأياويد]

فلونه رقدتي؟
من مساعه ننتظر

[طفلي حياتي]

؟؟؟؟؟؟؟ ساد الهدوء فجأة

[فلونة]

المهم ،، باكمل لكم القصة

تقول الدكتورة ،، ما كان عندها احد تستشيره في هالموضوع الا امها لانه ريلها توفي الله يرحمه ويرحم موتى المسلمين .. تقول تميت اسبوع وانا افكر في النهاية قررت ارد عليهم لانه كل ما تكبر البنت في رحمها تتعلق فيها اكثر .. تقول عقب هالاسبوع قررت اروح المستفشى وارد عليهم ( قالت لهم ان احنا مسلمين واجهاض الروح عمدا حرام الا اذا كان خطورة على الام لا سمح الله واذا الله كاتب لي قسمتي ونصيبي يرزقني بهالبنت انا راضية فيها وباتحمل مسؤليتها) .. طبعا الاطباء حاولوا معاها وايد عشان تغير رايها وقالو لها ان متوسط عمر الاطفال المغولين اقصر بوايد من الاطفال الطبيعين عشان لا اتعبين وتعانين معاها .. تقول عيزوا معاها بس اهيه ما غيرت رايهاا وتمت تقول لهم مابي اسوي عملية الاجهاض وابي هالبنت سواء طبيعية او مريضة..

مرت هالتسعة شهور واهي مهيأ نفسها ان بتولد هالبنت وبتكون مغولية وكانت راضية بالي كاتبه ربها وما اعترضت،، وكانت تجهز نفسها علشان تستقبل هالبنت ..
تخيلوا عقب تأكيد الاطباء وهالاشعة الي سووها وهالاجتماعات الي دخلتها معاهم وتناقشت معاهم .. ولدت وياابت بنت وكانت هالبنت طبيعيييية جداا وما فيها اي مرض ..تقول حمدت ربي على نعمته

المهم .. كبرت هالبنت راوتنا صورتهاوكان عمرها 7 سنوات صف اول .. تقول الي خلاهم يشكون ان ملامحها نفس الاطفال المغولين اذا تعرفون عينهم تصير نوع الدائرة المسحوبة واذونهم تصير اقل من مستوى العين .. ملامح مميزة تختلف عن الاطفال العادية .. وفعلا بنتها عينها صغيرة وخشمها بعد ... بس كانت البنت طبيعية نموها الجسدي والعقلي وشطوورة بعد

جوفوا شلون حكمة رب العالمين ومهما تطور العلم وهالتكنلوجيا بيتم العلم عند الله سبحانه .. واذا اراد ربنا شي ورزق حق الانسان بيعطيه ايااه

انا كل ما اتذكر هالقصة اقول الحمدلله على كل حال بس الله يثب حملي وحمل الجميع ونجوف ظنانا بصحة وعافية ... والله يبعد عنا الوسواس

[فلونة]

اصابعي شارت ،، تيبتها وطقيت بالغلط اكس .. ومرة ثانية كتبتها لكم من جذي تأخرت

[طفلي حياتي]

الحمدلله انها سليمه وتصدقين هالايام بالذات هالنوع من الوسواس ذابحني
ياربي سترك وعفوك ورحمتك ورضاك
يارب جنيني سليم معافى بعد انتظار وصبر حملت ان شاء الله سليم ياربي
اني وكل حامل ثبت حملها بصحه وعافيه

[بنت الأياويد]

سبحان الله ، صج العلم عند الله واهم شي الدعاء وحزة الي اييي الطلق حاولوا على طول تقرون سورة الزلزلة وخلوا احد يقرى عليكم سورة مريم وانتوا جريب ولادتكم سواء زوجكم او احد من اهلكم المرافق لكم
بل فلونة اكره شي اتيبين واخر شي ينمسح كلشي