تجمع الكروشات اللي ولادتهن في رمضان 1433ه

[مناير999]

ام حماده
بقولك قصتي بالتفصيل لانها عجيبه



انا متزوجه بكمل 4سنوات واحنا سليمين
والسبب مجهول كان قلبي يتقطع كل يوم من الهمز والغمز والله بعض الاقارب مادريت عنهن الا بعد ولادتهن بمده
حتى ام زوجي تخبي عنا خبر حمل سلايفها وبناتها
ويمكن هذا سبب التوتر اخر الحمل عندي

رحت لسمير عباس وقرر الدكتور تلقيح صناعي قال انتم سليمين ماله داعي انابيب
وسويناها وكنت احسبها تنجح بقووه ونزلت الدوره وتعبت نفسيتي
في نفس الشهر عرفت ان سلفتي والده من شهرين ومخبين عني واجتمعت علي من كل جهه
رغم ان زوجي مو مهتم يقول مادمنا سليمين خلاص ليش نتعب وعلاج وبلاوي
بس لما شاف وضعي وعرف عن اهله تضايق وتعاطف معي بقوووه
وقالي بشعبان وقتها تبين نبدا الشهر الجاي انابيب (حقن مجهري) قلت له الحين بيجي رمضان خليه بعده لان لازم راحه وابي استغل الشهر الفضيل
وبعدها الدوره تجي اول الشهر لما جاء موعدها اتصل على المستشفيات قالوا اجازه اسبوع فتره العيد مانستقبل الا اللي عاملين عمليات ونتابع حالتهم الحالات الجديده بعد اجازه العيد
وقتها تكون الدوره خلصت ....بكيت وقلت وش هالحظ

شهر 11 قلنا نبدا فيه وكنت خايفه زوجي يكون عنده استلام وقت الحج لان المساله تاخذ وقت ومراجعات ومابي اهلي واهله يدرون
لكن طمني ان اسماء العسكريين اللي بينزلون للحج نزلت وهو مشارك في السنه اللي قبلها وهالسنه الدور مو عليه
فرحت واستبشرت خير
وفجأه ويصير فيه شغب بالقطيف اكيد سمعتوا فيه بدعم ايراني وهددوا ليعملوا مجزره بالحج وقتها
وطبعا تغيرت الخطط الامنيه
وبما ان زوجي ضابط ومسؤل عن قطاع عسكري ونزلت اوامر انه يكون مسؤل عن مجموعه عسكريه فتره الحج
نزل الخبر علي مثل الصاعقه
والله جلست اصارخ واهلوس رغم ان زوجي بطبيعته شديد لكنه مانسى نظرته لي وقتها كانت نظره شفقه وراحمني بقوووه
لدرجه جاب لي اوراق اللي من الداخليه وقال شوفيها مو بيدي حاولت بس انا مسؤل ولازم اكون متواجد
قلت ماشاغبوا الا على حظي

وراح نهايه 11 ورحت اهلي نفسيتي بالحظيظ وكلمهم يمزحون معي كل هذا حزن على فراق الحبيب وانا اسوي نفسي عادي بس مبين علي هم مايدرون عن السبب الحقيقي

وكان ماراح يجي الا نهايه 12 وجاء يوم 15 باذن خاص من اللواء وجاء ضابط بداله صار الموضوع فجأه سبحان الله
هو تفاجأ بالقرار قالوا له تبدلت الخطه الامنيه انت ترجع للاداره بالرياض وضابط ثاني يحل مكانك ..
وفجأه احصله يرن جرس اهلي كانت مفاجأه بدل مافرح فيه فرحت بسوي انابيب وانا بالسياره اقوله بروح مركز ذريه لاتنسى بكرا
وهو يضحك يقول والله لو اني مو عارف وضعك ونفسيتك لانزلتك من السياره وتركتك عند اهلك
فيه وحده تستقبل زوجها الغائب بهالكلام ؟؟؟
وفعلا استحيت حسيت اني زودتها حبتين بس هو عارف وضعي وظروف التأجيل اللي صارت غصب عنا

والله يابنات ماصار بيننا لقاء الا مره وحده بالشهر فقط كانت اخر يوم بالتبويض وماهتميت
بالعاده اتابع تبويض وبعد مايصير اجلس على ظهري ساعات وارتاح
هالمره شايله الفكره من بالي ...قمت واشتغلت ورحنا لمركز ذريه اخر الشهر قبل موعد الدوره بايام
اخذوا تحليلات وقالوا اول يوم تنزل الدوره تجين نصرف لك منشطات ابر وتنشيط قوي قلت خلاص
واتصلت الدكتوره قبل موعد الدوره بيوم قالت اسفه يامناير تحليل هرمون الحليب مرتفع عندك لازم تاخذي العلاج وحسب استجابتك للعلاج قلت تكفين لاتقولين بنأجل الله يخليييييييييييك لاتقولين
رحمتني قالت لو سويناها مابتنجح لازم ينخفض ...
سكرت الخط منها وبكيييييييييييييييت الين قلت بس ...
وكان موعد الدوره بكرا وجاء بكرا وبعده ومر 3ايام والدوره ماتنزل
قلت ياربي رحمتك بدت دورتي تتخربط من الهرمون وكنت اخذه علاج قوي لهرمون
ولما تاخرت الدوره قلت العلاج ماناسبني بس مابي بروح احلل عشان اقول للدكتوره ان الدوره تاخرت بسببه تغيره لي
وجبت تحليل رخيص ابوعشره ماهتميت بالعاده اجيب بلوكلير ومايطلع شي
الصباح عملت تحليل انتظرت دقائق ماطلع شي ماهتميت لاني عارفه تركته على جنب وقلت بكرا اكلم دكتورتي اقولها تغير العلاج لانه يوم الجمعه ومافيه دوام ...
ولما دخلت الحمام الله يكرمكم بعد ساعه تقريبا برمي التحليل واشوف خطين والله احولت اعيوني اناظره معقول خطين
طلعت اركض انفض زوجي نايم وادخل التحليل بعينه اقوله خطييييييييييين
وهو صاحي من النوم مايدري وش السالفه ؟ّ
وقال لاتصدقين وتتاملين خلاص العصر نروح نحلل دم وكان راحمني ومو مصدق يقول يابنت الحلال لاتصدقين هذا تحليل رخيص مو معتمد
وجاء العصر وبعد الصلاه مباشره لقاني بالسياره استناه وهو ضايق صدره يقول لاتتاملي كثير
رحت لمستوصف قريب لنا قالوا الجمعه اجازه وجلسنا ندور بين المستوصفات وكلهم اجازه لحد ماحصلنا مستوصف
واعمل تحليل دم وراح زوجي للسياره قال امشي وناخذ النتيجه بالتليفون قلت ابد ما اطلع نهائي
ماتتخيلون وش كثر راحمني
ركب السياره وانا بغرفه الانتظار مرت نصف ساعه كأنها قرن من الزمان
واخر شي اسمع الممرضه تنادي باسمي واقوم ارتجف مابي اسمع النتيجه ولما صعدت السلم اخر درجه وصلت لها
قالت ببرود وهي مكشره مدام انتي هــــــــامل
بغيت اطيح من الدرج فقدت التوازن ومسكتني الله يعافيها
لاتسألوني وش سويت بكيت صارخت قدام الناس رحمتني وقالت مدام مافيه بيبي؟؟
قلت لا انتي متاكده انه حمل ومن كثر ماتعاطفت معي جرتني من يدي ودخلتني المختبر وورتني النتيجه قالت شوفي هذي المدام اللي قبلك مافيه حمل وانتي حامل
واطلع اركض تخيلوا شكلي لابسه عبايه واركض بالممرات ادور البوابه واطلع والقى زوجي جالس على السياره وخاف يوم شافني اركض عرف اني منهاره وفاقده عقلي
قلت له حاااااااااااااااامل والله حاااااااااااااامل
هو وقف مكانه ماتحرك قال وش تقولين والله يابنات شفت دموعه نزلت لاول مره المحها ...انهرت
ركبنا السياره بحاله ذهول انا اهلوس وهو صاااااااااااامت اشوف دموعه
قعدنا نصف ساعه او اكثر
بعدها وداني مستوصف ثاني والحمدلله طلعت حامل ....




هذي قصتي بالتفصيل ...ادري طولت عليكم بس ابيكم تعرفون رحمه ربي الواسعه ...

[ام حماده1]

ازيدك من الشعر بيت يا مناير اللفات الي بسنتر بوينت قصيره مو مره كبيره الي بالهرم كبيره وثقيله
تعلمت هالمره خلاص احس اخذت ثياب مره كثير في بعضها مانزلت صورها ممكن ملابسه تجي اربع اكياس كبار ياويلي
بس لاحظت اني ماشريت ملابس لونها ابيض كامل

[ام حماده1]

وربي دمعت عيني يامناير حبيبتي الله رحيم بعباده يابعد قلبي اكيد البنوته هذي بتكون لها غلاوه غييير
ياشيخه خذي لها شنطه ب 5000 تستاهل بس سؤال ومعليش القافه متى علمتي اهل زوجك بحملك واش كان ردت فعلهم ( بتفصيل لو سمحتي )هههههههههه

[ام حماده1]

زوجي جنبي يشوف المباراه شاف الدموع يقولي وش فيك
حكيت له قصتك وحركات اهل زوجك معاك
تأثر كثير لاني انا وياه قلوبنا تقطعت وحنا نتظر 6 اشهر وسبق وجبنا ولد وحملت بعده واجهضت
كيف عاد 4 سنوات بدون عيال
ودعالك بتمام حملك وبدرزن عيال وانا اقوله حرام عليك بتجننهم ههههههههههه

[مناير999]

تسلمي ام حماده
الله لايذوقك الحزن ولايحرمك من غالي
اهل زوجي عادي بس ام زوجي علمها ضروري امه لازم تدري وابوه ...ويقول انهم فرحوا مدري عن قدر فرحتهم
وانا ببدايه حملي نزل علي دم والمشيمه نازله فاتذرت منهم اني تعبانه وماقدر اقابلهم ولا اقابل غيرهم وممنوعه عن الحركه
والحين الحمدلله زال الخطر بس مابي اخالطهم اتعذر بالحمل وهم مقدرين بس مدري وش سوو وكيف انتشر الخبر بينهم اتصلوا يباركون وكانت اتصالات رسميه
ماهموني اهم شي ربي اكرمني...وخليهم يعرفون ان اللي رزقهم قادر يرزق غيرهم ومو بطوله منهم انهن حملن هذا رزق من رب العالمين



ياعمري ان شاءالله مانشوف دموعك الا دموع الفرح
والله يخلي لك زوجك واولادك وتجيبوا درزن بنوتات ودرزن اولاد

[اميره باوصافها]

ياقلبي يا مناير والله قصتك تحزن
الحمدلله الله اراد لك الطبيعي
الله يتمم حملك ويفرحك بشوفتها ويرزقك باخوان لها واخوات

[ام حماده1]

تسلمين ياقلبي
والله لو انا بدالك ما اخلي وحده تشوف بنتي الا بزول
وكل ما احمل مايدرون الا وانا ولاده ناس ماتقدر انا بعد وفاة ابني كل ما اطلع عند احد قريب او بعيد
يسالني حامل اقوله لا يقول مسكينه الله يعوضك وبنظرات شفقه حرقت قلبي بس الحمدلله الله كريم

[مناير999]

اميره باوصافها
ان شاءالله ماتشوفي حزن
اشكر لك مشاعرك الطيبه


ام حماده
والله افكر احيانا كذا
بس اتعوذ من ابليس واقول بكيفهم
اتعامل معهم برسميه مابي مشاكل ووجع راس معهم لانها بتنعكس سلبا على حياتي مع زوجي لانهم اهله
وانتي تعرفين الرجال اهلهم خط احمر لو غلطوا مايشوف خطاهم ...
انا احمد ربي على نعمته وهم جزاهم لى الله

[انثى من عطر]

مناااير
الف مليوووورن مبروووك


الله يتمم حملك

وييسر ولادتك

لو تشوفي دمووعي
تبطلي تكتبي تفاصيل
من جد اسلوبك روووعه
في الوصف
و رحمة ربي فيكي اروووع

انا تاخر حملي 6 شهور اول ما تزوجت و تازمت

كيف انتي 4 سنين


الله يتمم لنا كووولنااااا

[ام حماده1]

امين يا انثى
مناير لاصارت كرشتك كبيره حق 8 اشهر البسي لبس حمل ماسك على بطنك
وروحي عندهم ويدك على ظهرك وه تعبانه ياربي مادري على اش الناس متشوق على ذا الحمل كله تعب وثقل
هههههههه طبعا وهم يسمعون خخخخ

انا جارتي كان لما اروح عندها ماتبي زوجها يشوف ابني نهائي كل ما طلع تسحبه عشان هي عندها 6 بنات
وبعد وفاة ابني كل شوي تقولي يارب تجيبي بنت هالمره ولا وش فيك ما حملتي
الحين تقولي ليش وجهك مصفر كذا اقولها ماعندك فكره حمل الاولاد كيف يهد الحيل ههههههههههه
حركات نص الكم هذي موهبتي