تجمع حوامل ليبيا

[لولى2010]

السلام عليكم انا عضو جديده ونبي ترحيب حلو انا من المرج وعربي من بنغازى متزوجه من سنتين وسبع شهور وحامل فى السابع وربي يتمم عليا بالخير يارب

[ام اسيل]

يامرحبا بعرب مصراته انا خوالي مصراته ونموت فيهم وان شاء على خير وسلامة واعزمينة عا العجة .واحكينا كم عندك عيال وكم بنات والي في بطنك شنو وتشتغلي ولا لا تقريييييير مفصل

اهلييين عرب المرج جيراني انت ساكنة مع عربك في بنغازي ولا في المرج والي في بطنك وليد ولا بنية. حتى انتي نبو تقرير مفصل

[ام اسيل]

حبل الوصل رحم الله والدك واسكنه فسيح جناته وهذي حال الدنيا والغالي فراقه واعر لكن الله غالب وهذا حال الدنيا

[ام اسيل]

ميرنا تعرفي مرات نحس في روحي المرأة الحديدية كل حاجة فوق راسي تعرفي راجلي دارلي سيارة عشان هو ضابط ومش فاضي ديمة شغل والله حتى الخضرة واللحم انا نجيب فيهن وايام القراية نروح من المدرسة الساعة 2 الظهر نقعد مطيبة غدايا نص تطييبة وخيتك ام بطينة متقتنعش يشكل واحد لازم نوعين على الاقل مع السلطة المشكلة المهم بعد نكمل غدايا ونتغدى نخش نضم المطبخ مانطلع الا اربعة ولا اربعة ونص نقعد نبرم في الحوش ومرات كان ماعنديش طلعة نقعد لعند الليل نضم هضا خاطي الماجستير الي معش يبي يكمل مرات يجي الليل نحس روحي منهارة لكن توا مفيش قراية نروح بدري واموري اريح

[ميرنا]

المشاركة الأصلية كتبت بواسطة لولى2010

السلام عليكم انا عضو جديده ونبي ترحيب حلو انا من المرج وعربي من بنغازى متزوجه من سنتين وسبع شهور وحامل فى السابع وربي يتمم عليا بالخير يارب

يا مرحبتين بعرب المرج مرحبتين با مدينة الارقام والحروف نورتى التجمع ابطلتك يا مرجاوية

[ميرنا]

ام اسيل انقنك عطك ربى وانشالله ربى يدوم عليك

[حبل الوصل]

صباح الخير يابنات
مرحبتين بيك يالولى نورتى التجمع ان شاءالله وجهك خير علينا وربي يتمملك حملك على خير

[ميرنا]

حبل الوصل انشالله نحملو انا وانتى وام اسيل وماعد نخشو واذا كان خشينا ندلعو عليهم ايشوى ونطلعو بس ابشرط نحن ثلاث لم نحملو انقولو امعنا 4 تؤام ههههههههه بيش يخشن ويقعدن يجرن فى جرتنا ويقولن كيف درتن وعطن الطريقة على قولت عرب بنغازى انشفطو عليهن اشوى مثل هن
على فكرة ياحبل لوصل شكلى انا وانتى متزوجين فى نفس السنة الان موليد اعويلتك ربى يطولك فى عمرهم نفس اعويلتى طيور الجنة انا بكريي 2004/9/22 وبنيتى 2006/3/13 *

[حبل الوصل]

انا متزوجة في سنه 2003
وانتى في اي سنه

[لولى2010]

شكرا للترحيب الحلو انا ساكنه فى بره فى قطر (الدوحه) وقالو بنيه معايا انا قصتى انى حكلت بعد الزوج بسنه وتمان شهور ودام حملى خمس اشهر وبعدين اجهضت وربي يعوضنى خير وتو الحمد لله حامل لكن ياما صار فيا ديما العيل نازل ومن بدايه الحمل وانا راقده ع ظهرى وغربه لاحد يخش ولاحد يطلع وفى الشهر الخامس مشيت للدكتورة وقالتلى رحمك مفتوح والعيل يبي ينزل وحولتنى ع الطوارى ودارولى عمليه ربط عنق رحم وقالولى معش تتحركى لين التاسع وتخيلى الماسه لكن الحمد لله كله باجرة عند الله سبحانه وتعالى وربي يتمم ع لى خير والعقبه لكل وحده خاطرها فى بيبي ربي يجبر بخاطرها ويعوضه واى استفسار انا حاضرة