تجمع حوامل ليبيا

[ام اسيل]

ياميرنا اول مرة نفطن ان تجمعنا مثبت ولا التثبيت جديد ؟

[الهندية]

أم اسيل كيف حالك ... انتى تسكنى فى بنغازى صاح

[حبل الوصل]

أم أسيل خير عليكى ياحلوة والله استاحشتك واااااااااااااااااااااااجد
انى بنتى تقرا روضة السنة الجاية تقرا صف اول ان شاءالله وفي الروضة تجيب فيها الاول وربي يعاونك ياحبيبتى وبنتك نجحت ولاكيف صاير حنى اللي نبو الزردة نستنى في خبر حملك قولي آمين

[ام اسيل]

هندية : كيف حالك انا من بنغازي من ارض بلعون بالتحديد شوفي انا اول ما تزوجت كنت مش متريحة وفكرت كم مرة نطلق لان راجلي يبي يثبت وجهة نظره واهله يدخلو وانا طبعا مسكرة راسي لكن بعد ما تمر السنين وبشطارتي خليت راجلي خاتم في صبعي وحتى اهله قعدو يحلفو براسي لاني قعدت نعامل فيهم كويس واية كلمة شينة ندير روحي ما نسمعش فيها لغاية ما قعدت احسن كنة عندهم الزواج كل ما تمر سنة تلقيه احسن من السنة الي قبله . انا قبل كل عركة مع راجلي نلم دبشي في شنطة ونقوله طلقني توا تشيلني لحوش هلي توا تصدقي ليا قريب اربع او خمس سنين معش قتله طلقني بكل اصلا معش قعدنا نتعاركو وحتى لو تعاركنا نتعاركو على حاجات تافهة واغلبها على العيال . وسعي بالك وخليك شاطرة وحافظي على حوشك خير ما تجي وحدة ثانية ماتسواكش وتقعد مكانك وتاخذ حوشك وراجللك وانتي يقعد يضرب فيك الندم وما تديريش مانع وكثري العيال بيش هله معش يقدرو يحكو ونحنا خواتك اي فضفضة نحنا قاعدين

[ام اسيل]

حبل الوصل : تعرفي عندي شعور الوحم بشكل غير عادي مش عارفة كيف التحليل طلع سلبي قريب نهبل ونرجا توا موعد الدورة وخلاص .
انا بنتي في سنة ثالثة وطلعت الاولى وكلهم يعلقو عليها يقولولها طبعا امك المديرة اكيدة تنجحي الاولى هههههههه وهي والله شاطرة وابلتها هي الي حطت الدرجات وانا والله ما عمري قريتها تقرا بروحها نصدقي توا 8 سنين وتقرا في قصص بروحها وفصص اكبر من سنها زي نوادر جحا و قصص الانبياء وقصص اخرى واجد وحتى تقرا لخوها حتى تصرفاتها اكبر من سنها انا توا نحكي معاك وهي تضم في المطبخ شافتني تعبانة قالتلي تريحي ربي يخليها ليا . وزردة النجاح توا نعزمكم على دجاج محشي في التجمع .
انا نحساب بنتك عمرها سبع سنين قلت اكيدة في سنة ثانية هي مواليد كم وعمر مواليد كم ؟

انا اسيل في 30_10_2001
ابراهيم 25-1_2005

[الهندية]

ماشاءالله ام اسيل ربى يحفظلك صغويرتك ...
انا بالعكس صابرة بس الاهانات كل مرة تزيد ومشكلتى مع خواته بالتحديد ونشوف فى متزوجا ت واجد يقولن هكى الغيرة العادية والكلام الساهل عادى لكن الموجعة واعرة ...
انا تو معتبرة نفسى فى معركة ولازم نفوز ليا اسبوعين معاش نزلت بعد ماجردوا عليا امه وخواته فى حوشى وسمعونى كلام منقدرش نقوله وقالوا لراجلى انه طرطور ومرتك حاكمة فيه
وانا ماشية معاه بنية صافية ومدايرتله كل شى على أكمل وجه فى البيت ...
توتوفى خو مرت عمهم وهيا جيتنى فى اسبوع وهم عدو عزو وطبعا انا مش عارفا هل نمشى خايفة نلقاهم عادى والا نخلى نين تفضى الزحما والا منمشيش بوكل
محتارة الحق
ياريت تنزلينا اكلة الدجاج المحشى خاطرى انديره بالحق

[ام اسيل]

الدجاج المحشي :اخراج ام اسيل :خيرة خمس سنوات

اول حاجة تجيبي هذك الدجاجة الباهية تغسليها كويس وتخليها تسقطر ويعدين تديري قيها شقوق من كل مكان بيش تخش التتبيلة ةتخلي الجلد طبعا ويعدها تحطي في الخلاط بصلة كبيرة وكمشة ثوم واجد وطماطمتين وفلفل خضر و زيت وملح وبهارات وليم وابشري عا الخلطة شوية من قشرة الليم وزعتر واكليل شوية وتضربي هضا كله في الخلاط وتاخذي قريب نص الخلطة هذي وتتمسحي بيهاالدجاجة من جوا ومن برا من كل مكان حاولي تخشيي فيه الخلطة وخاصة بطن الدجاجة وبعدين تكوني موتية طنجرة زز بالخلطة يعني فيه كبدة ولوز وزبيب واية حاجة اخرى تحبيها وتحشي بطن الدجاجة و(الرز طايب طبعا) وتخيطي الفتحةوبعدها تحطي قزير خليه طويل بيش يسد يغطي الدجاجة كلها تحطي القزير في طاجين وتحطي فوقه الدجاجة وتصبي عقاب الخلطة الي ضربتيها في الخلاط فوق الدجاجة عشان هذي الصلصة الي حا تطيب فيها وتغلفيها بالقزير كويس وتحطيها في الكوشة من ساعة ونص الى ساعتين حسب كبر الدجاجة وبعدين حلي عليها من فوق ورديها في الكوشة بيش تتحمر حتى من فوق وبعدها افطني لصوابع راجلك راهو ياكلهن ورا الدجاجة وبالهنا والشفا مع تحيات الشيف ام اسيل

[أم أيسم من ليبيا]

أهلين وسهلين ....أنستكم والله بس مافيش واحدة من مصراتة ...عموما مافيش فرق أنا من مصراتة وانراجع في مصحة الحكمة عند الدكتورة نبيهه لكلوك وتوا في الشهر السابع وما تسألونيش عالموعد لأني فطارة رمضان بالله عزوني على قلة صيامي وربي ايقدرنا على طاعته

[ام اسيل]

المشاركة الأصلية كتبت بواسطة الهندية

ماشاءالله ام اسيل ربى يحفظلك صغويرتك ...
انا بالعكس صابرة بس الاهانات كل مرة تزيد ومشكلتى مع خواته بالتحديد ونشوف فى متزوجا ت واجد يقولن هكى الغيرة العادية والكلام الساهل عادى لكن الموجعة واعرة ...
انا تو معتبرة نفسى فى معركة ولازم نفوز ليا اسبوعين معاش نزلت بعد ماجردوا عليا امه وخواته فى حوشى وسمعونى كلام منقدرش نقوله وقالوا لراجلى انه طرطور ومرتك حاكمة فيه
وانا ماشية معاه بنية صافية ومدايرتله كل شى على أكمل وجه فى البيت ...
توتوفى خو مرت عمهم وهيا جيتنى فى اسبوع وهم عدو عزو وطبعا انا مش عارفا هل نمشى خايفة نلقاهم عادى والا نخلى نين تفضى الزحما والا منمشيش بوكل
محتارة الحق
ياريت تنزلينا اكلة الدجاج المحشى خاطرى انديره بالحق

عدي عزي ما كأنه ما في شي عشان يعرفوك بنت ناس وحتى كان غلطو فيك قدام الناس ماترديش عشان يبانو هما الي قليلين اصل

[ميرنا]

ام اسيل اوووووووووو جايبتنا اخبار حلوة صار اسولى نجحت قوليلها انشالله الف مبروك بس مانوصيك اشريلها هدية وقوليلها هذه من خالتك ميرنا باهى راكى تنسى
واما على الدجاج اكتبيلى طريقة لاشلت يمينك

على فكرة امنعى جماع نين اديرى تحليل راه اشعيب يخرب الدنيا