اخواتى العزيزات
السلام عليكن ورحمة الله وبركاته
معلش النت كان قاطع عندى الايام اللى فاتت ومدخلتش اقولكم على اخر التطورات ،، المستشفى كلمتنى يوم الاربعاء الماضى وقالوا لى انى هنقل يوم الخميس ( يعنى تالت يوم) طبعا انا اتضايقت شوية وقلت الحمد لله لعله خير ،، رحت تانى يوم المستشفى وحجزت غرفة لأن نظام المستشفى ان بعد الارجاع بيسيبوكى نايمة على ضهرك ساعتين فى غرفة الافاقة وبعدين بتلبسى وبتروحى ، المهم حجزنا غرفة لحد 8 باليل وقبل ما يحضرونى للعملية طلبت اعرف كم جنين اتلقح ردوا عليا ان الدكتورة هتبلغنى اثناء النقل بس انا اصريت اعرف قبلها وجوزى معايا المهم اتصلت الممرضة بالحضانة وخلتى اكلم الدكتور وطلبت منه اعرف فجاب الفايل بتاعى وقالى " مدام احنا سحبنا 8 بويضات ناضجة قلت حلو اوى ، اتلقح منهم 6 قلت خير وبركة ، منهم 2 لم ينقسموا فتم استبعادهم قلت مفيش مشكلة ، قالى اتبقى اربعة دول اللى هنرجعهوملك قلت ازاى هى درجاتهم ايه قالى اجنة متقدمة رديت عليه ايوة درجاتهم ايه يعنى اولى والا تانية والا تالتة قالى لا كويسين اصل احنا مش بنحسبها كدة بظبط ، قلتله دكتور انا قارية وفاهمة كويس لو سمحت قولى وانا مش هضايق دى حاجة بتاعة ربنا رد عليا قال لى " واحد درجة تانية وثلاثة درجة ثالثة "،
اييييييييييييههههه يعنى ولا جنين درجة اولى.gif)
قالى على فكرة مفيش مشكلة خالص متوتريش نفسك دى بتبقى حسب انقسام الخلايا اللى ظاهر فى المعمل انما ممكن الدرجة التالثة يبقى احسن من الاولى عشان كدة احنا نقلنا فى اليوم الثالث لأن انسب مكان للوضع دا بيكون رحم الام وربنا هو اللى بينفخ الروح
طبعا انا استجمعت اعصابى وشكرته على زوقه وقفلت واول ما قفلت التليفون انفجرت فى العياط وجوزى قعد يقولى بصى لنص الكوب المليان وربنا هو الرزاق محدش عارف الخير فين الكلام دا كله انا عارفاه بس الصدمة بصراحة خلتنى مش عارفة اتمالك نفسى ،، المهم دخلت العمليات وانا هموت من الزنقة طبعا وكان بيتهيألى انى هعمل بيبى على الدكتورة وهى بتشتغل 
بس ربنا ستر الحمد لله وبعدين نزلت الغرفة وريحت لحد باليل
وبعدين روحت البيت وزى ما دكتورة الرعاية الطبية قالت فردت الكرسى بتاع العربية ونمت
وانتهى اليوم دا الحمد لله بس من قبل يوم الترجيع وانا عندى الم فى المعدة والقولون غريب ومستمر معايا لحد دلوقتى ومش قادرة افهم ايه السبب ،، كمان من بعد السحب وانا حاسة بألم اسفل بطنى كأن بطنى مفتوحة وبعد الترجيع بيوم الالم ابتدى يزيد فى جنبى اليمين وبعدين امبارح ابتدى فى جنبى الشمال كمان هو دا طبيعى والا كدة فى حاجة عندى مش مظبوطة افيدونى افادكم الله