تجمع حوامل ليبيا

[ميرنا]

اختى ام اسيل لى اقريب سنة شرية طاجين البيتزا الكهربائى ولم انطيب فيه اليتزا متجيش سمحة فاخطيت عليه بكل واليوم طلعت ودرت فيه ابراك طلع يجنن واحدات قالن انديروه فيه لقلى الدحى انتى عندك فكرة عليه

على فكرة انتى خريجت قانون ليش تركتى المحكمة وتقرى فى المدرسة وانتى من دفعة كم قصدى تخرجتى فى سنة كم

[ام اسيل]

ميرنا اولا ردي بالك من راجلك ولا تعالي معاه احسن حي عليك بنات بنغازي اسماح ههههه

[ام اسيل]

وتعرفي انا الطجين هضا مرات ندير فيه في كفتة اللحم تطلع تجنن ولا مكمور اووووووووووو مش طبيعي

[ام اسيل]

وتوا نحكيلك قصتي انا لما خشيت سنة رابعة قانون تعرفت على راجلي وطبعا اول ما تخرجت سنة 2000 تزوجت على طول وراجلي في الاول كان يغير عليا مابش يخليني نشتغل وبعدها حملت على طول ولما جبت قعدت لاهية باسيل ولما كبرت قتله نبي نشتغل قعد يمشي فيا ويقولي ساهل وبعدها لقيت روحي حامل بهيمو شوي قالي توا غير جيبي وبعدها ساهل وبعد جبت وطق عمرة سنة قتله نبي نشتغل ودورت شغل حكومي ما حصلتش شوية خشيت نحضر في دراسات عليا في الجامعة وتوا قريب نكمل غير قعدت متنبلة في الاخير وماما فاتحة مدرسة ثانوية وقالتلي شن رايك نديرو مدرسة ابتدائي واعدادي قتلها باهي وفتحت المدرسة ليا توا ثلاث سنين والمدرسة الحمد لله ناجحة والشغل قيها مش متعب واجد لاني حاطة مساعد نشيط وراجلي طبعا قعد يرضى بالامر الواقع بشوية بشوية والمحاماة الخاصة مفكرتش فيها بكل لانها متعبة لوحدة متزوجة مش نقعد مديرة في مدرستي احسن من نقعد تحت امرة حد وامتى مانبي نروح وامتا مانبي نغيب محد يقدر يكلمني

[ميرنا]

والله يام اسيل اما راجلى ما عرفت وين نجرى بيه مرات انقوله نبى نهرب بيك تمشى امعى يقولى هية وانا نفسك يقرى امعى وتخرجنا مع بعض وما فكيت من بنات بنغازى واحد يعرف واحد ولم تخرجنا يوم لى خطبنى فيه ثانى يوم خذات الحكومة ماعد ردات لى لا بعد 8سنوات ما اطلقوه نين نشف ريقى وانا نرجاء ولم طلع 2003 اجوزنا ثانى اسبوع من طلعته ونحن قرينا فى جامعة قاريونس وقعدنا فى داخلى الجامعة قاريونس وليس البركة

[ميرنا]

ام اسيل مانكش ماشتهية الحاجات المالحة مثلا الزيتون

[صابرة]

كيف حالكم يابنات
ومرحبا بخولة وعيون زوجها
نحس في روحي فاشلة ونكر في روحي كران
موعدي يوم 29 والولد قالتلي نازل وممكن تولدي ابكر من موعدك
ياعيون انا من طرابلس ونراجع عند الدكتورة اعتماد المسلاتي..ما شاء الله خبرة وعندها وسعة بال في الاجابة على التليفونات متع الحوامل اللي يطلبو استشارتها وترد على تليفونها حتى الساعة 3 في اليل مافيش مشكلة وتجي تولدك في اي وقت ليل ولا صبح

ادعولي

[ام اسيل]

[COLOR="DarkSlateGray"خير ياصابرة والله لك وحشة ان شاء الله تجيبي على خير وسلامة وردي بالك من روحك ها الفترة[/COLOR]

[صابرة]

بارك الله فيك يوخيتي ام اسيل والله حتى انتم ليكم وحشة

[ميرنا]

اوووووووووووووووووو الصابرة ايش اخبارك ربي يتمم حملك على خير وسلامة
الصابرة اوليدك حايكون اول وليد فى تجمعنا وانشالله وجه خير علينا بس يا لصابرة لم تدخلى للمستشفى اتجيبى ادعيلى انا وام اسيل وحبل الوصل بالله عليك ماتنسيناء من الدعاء وانشالله ربى يفرحك ويفتح عليك