دردشة بنات فلسطين , دردشة حوامل فلسطين , تجمع بنات فلسطين

[Snowwhite-90]

اعتقد زوجك بيشتغل بالجامعة يا ام عبودي صح ؟؟

[ام عبدالله لولو]

تسلمي حبيبتي اكيد زاكي وخاصة ورق العنب هههههههه زاكية وكمان هيك اللمة مع الاهل والخوات والاقارب حلوة
زوجي استاز جامعة بس لا نو المسافة بعيدة بطلع بكير شوية
شو ناوين تعملو اكلات

[ام عبدالله لولو]

ام جودي باي شهر صرتي حبيبتي الله يقومك بالسلامة حكيتي اسم ابنك الله يخليلك اياه وتفرحي فيه وهو عريس محمد جودي اسم مين

[Snowwhite-90]

اسفة حبيبتي اتاخرت عليكي لانه رحت اعمل فطور لحمودي ،، الله يعينه زوجك بيزكرني بزوجي لما كان يدرس بمنطقة غير منطقتنا كان يصحى لصلاة الفجر ويبدأ يجهز للدوام ،،،

احلى شي عالبحر اللمة ،، طول الصيف بنقضيه يا عالبحر يا منتجعات او منتزهات او بنزور اماكن معينة بغزة ،، اهلي واعمامي بنروح كلنا جماعة بننبسط كتييير هناك ،، او كمان لما اخوات زوجي يزوروا غزة بنطلع بردو ،، السنة اخواته الي بالامارات هينزلوا زيارة بس الي بالسعودية لأ للاسف :(
بخصوص الاكلات راح تكون مشاوي لحم ودجاج لانه مو الكل بيحب اللحم وورق عنب وتبولة ومقبلات وهيكون فيه بيتزا ومعجنات بأنواعها اذا حدا جاع لانه هنسهر هناك كمان وطبعا الشغلات الحلوة هتكون كيك بالشوكولا وكيك بالفواكه ومكسرات ومشروبات باردة وساخنة ،، بتعرفي دايما لما بنروح من البحر بيرجع معنا نص الشغلات هاي سبحان الله لما بنكون عالبحر بننسى الجوع هههههه ،،

[Snowwhite-90]

الله يسلمك حبيبة قلبي ،، انا هلأ بالشهر الخامس ،، كل 25 من كل شهر بفوت بشهر جديد ،، جودي هاد اسم بنتي الله يرحمها توفت بعمر 7 شهور

[ام عبدالله لولو]

ريتو صحة وهنا ع قلبو للحلو تكيد حلو ودمو خفيف زي امو هههههه خدومي معكم غ البحر
اسفة حبيبتي الله يرحمها يارب ويجعل شفيعة اليك ولابواها .. بس يعني ليه اتوفيت ازا بتحبي تحكي واسفة مرة تانية لاني زكرتك فيه الله يرحمها

[Snowwhite-90]

على قلبك يا قمر ،، هههههه حبيبة قلبي تسلميلي هو ما شاء الله عليه اموور بس مو طالع شبهي طالع على زوجي ،، جودي الله يرحمها كانت فيها شبه مني ،، راح انزل صورته باقرب فرصة ،، لانه حبيباتي عيون المها ودودو كتير حابين يتعرفوا على حمودي ،، يااااا ريت تيجي معنا يا مية اهلا وسهلا فيكي حبيبتي بنتسلى انا وانتي هههههه ،، والله يا ام عبودي الحمدلله على كل حال ،، لا حبيبتي ما زكرتيني فيها لأنها ما بتغيب عن بالي اصلا ،، قبل ما ييجي حمودي على الدنيا كانت الدموع ما توقف بعيوني بس هلأ الحمدلله اهون من قبل والايام مصيرها تخفف جروحنا ،، هي توفت فجاة ما بنعرف كيف لو بتحبي احكيلك شو الي صار معها بالزبط باخر اسبوع بحكي

[Snowwhite-90]

شوفي يا ام عبودي ،، هلأ قبل ما تتوفى باسبوع لما كنت اشربها عصير برتقال او اطعميها سيريلاك كانت الله يكرمك تستفرغه ،، يعني تقريبا مرة باليوم تستفرغ ،، انا كان ببالي انه برد لانه كان الجو شتا وقتها ،، تاني يوم نفس الشي تستفرغ بس السيريلاك او عصير البرتقال ما بعرف ليه ،، الحليب عادي ما تستفرغه ،، المهم اخدتها للدكتور على طول كتب الها على دواء واعطيتها منه يوم واحد بس الاستفراغ زاد بدل ما كانت مرة صارت مرتين وثلاث واربعة وبعدين صارت تستفرغ كل شي حتى المي ،، وراجعت الدكتور تاني يوم ع طول اعطاها ابرة هاد كان يوم اربعاء وحولها على المستشفى باتت ليلة بغرفة عادية وتاني يوم الخميس ع 11 صباحا دخلوها عالعناية المركزة لانه التنفس عندها تعب ،، ويوم الجمعة الصبح حكوا اتحسنت وهنرفع عنها التنفس الصناعي ورفعوه عنها ساعتين ورجع التنفس تعب تاني ورجعوه لالها تاني وحكوا انه يوم السبت هيصوروها ويعرفوا شو عندها بالزبط بس للاسف ما لحقوا يعرفوا شو الي عندها توفت يوم الجمعة العصر ،، الحمدلله نصيبها هيك راحت لشي احسن من الدنيا وما فيها الله يهنيها يااا رب ،، بتعرفي يا ام عبدالله لما ولدتها كان اذان العصر ،، اول ما المؤذن حكى الله اكبر جودي طلعت للدنيا ،، ولما توفت بردو توفت على اذان العصر بالزبط ،، توفت قدامي انا كنت عندها بغرفة العناية لما ربي اخد امانته ،، كنا انا وزوجي وماما وبابا ،، يا الله شو صعبة ،، ربي لا يحرم حدا من غالي

[حلا الماس]

صبااااااااااااح الخير

ام جودي وام عبد الله .. يا برامات على هالصبح ما في حد هون وعم تسرحوا وتمرحوا وتحكوا براحتكم اه !!

يسعد صباحكم يا رب منورات كتير كتير

ام عبد الله اشتقتلك يا دبة .. وما تعاودي اتغيبي حبيبي اوكي ؟؟

[حلا الماس]

شو يا صبايا .. انا جيت وانتوا رحتوا !! ازعل :(

ام جودي شميت ريحة رحلة عالبحر .. ان شاء الله بتتهنوا حبيبتي .. اتزكريني هناك لانو كتير مشتاقة للبحر انا

ام عبد الله .. وين غطستي ؟؟

لولو .. ليش اليوم مش نشيطة انتي ؟؟ سبقناكي اليوم

دودو .. وينك يا حلوة ؟؟ مما بنستغني عنك ولا عن كلامك العسل

جارة .. حمد لله على السلامة .. وين كنتي غايبة ؟؟متى بدك تنزلي عالخليل تتسوقي ؟؟ ولا انزلتي !!

فوفو .. شو اخبار المكبوس ؟؟

حيفا .. غموض .. دموع .. احساس .. حواء .. لولو حمادة .. بيبو .. اية .. وكل الصبايا يسعد كل اوقاتكم

سؤال اليوم يتكرر : شو طابخين اليوم ؟؟