تجمع الكروشات اللي موعد ولادتهم شهر * رمضآآن * 1432

[ام روينا]

انا مررره صرت عصبيه على عيالي خاصه من اول رمضان المهم رتبت اليوم كمان واحد من دواليب المطبخ اللي فيه الاسلاك وكان فيه جهاز dvd صغير حق السياره المهم هو مافي شحن وما لقينا الشاحن وبعد مارتبت جا ولدي عمره 6 سنوات واخذه وانا جيت للمطبخ معصبه والله العظيم تغير وجهه من الخوف وقال خذي بس لاتضربيني
ما تتخيلي هذي الكلمه كيف هزتني ( والله الحين اكتبلك الحكايه ودموعي تنزل )
المهم اخذته منه وسكت بعدها بعشر دقايق رحت بوسته وضميته وحطمني للمره الثانيه على طول قال ليه ياماما ؟؟ قصده ليه بوسته
المهم جلست وقت بعدين ناديته هو واخته اللي اكبر منه
وقلت انا اوعدكم معاد اعصب عليكم او اضربكم مهما كان بس ابغى توعدوني تسمعوا كلامي واتفقنا وبعدها جاتني راحه غرييبه

[شجر الدر]

ياشيخه العصبيه لا بد منها بس حلو انك راجعتي نفسك وما ضربتيه لانه وقت الغضب الواحد يتصرف بتصرف وما يحس بنفسه بس متى يصحى بعديييييييييين ويندم
والله انا زيك مع اختي الصغيره واقول لازم اتعلم اضبط اعصابي

[ام روينا]

وينك شجوره بعد ما كتبت قصة حياتي رحتي لا تكفييييين

[ام روينا]

اشوا توني اشوف الرد
والله انك صادقه يطلعوا الواحد من اعصابه بس انامررررره مع عيالي طبعي غريب تصدقين اذا ضربتهم او حتى خاصمتهم ابكي بكى مو طبيعي

[ام روينا]

حتى زوجي يقول انتي غريبه يقول كل الناس يضربون عيالهم وعادي مع انه هو ماعمره مد يده عليهم او يقول لعاد تضربيهم او تعصبي عليهم بس انا ما اقدر ابغى كل شي بالمسطره

[شجر الدر]

ياقلبي انا عالحنيه عادي ترى حلو انك حنونه عليهم

[ام روينا]

تتوقعي هذي حنيه
لاني اقولك اخاصم واضرب احيانا

[شجر الدر]

اجل زي ما قال زوجك طبيعي الواحد يفقد اعصابه ويضرب ويعصب
بس انتي شكلك حساسه مرررررررررره

[ام روينا]

نصيحه لك وحطيها حلقه في ادنك
لا ترفعي صوتك على عيالك حتى لو انتي معصبه يعني حاولي يكون صوتك منخفض لانهم يقلدوا كل اللي تسوين معاهم مع بعضهم او مع اصحابهم

[ام روينا]

اكيد تقولي بدأت العجوز في النصايح ههههه والله احس اني اكبركم في هذا النتدى اغلبكم بكريات ورورو 3 بس