تجمع حوامل ليبيا

[عيون زوجي]

هلا ام اسيل وحبل الوصل كيف حالكم توا
انا في مدينه اسمها بون في المانيا والكسكسي موجود في المحلات العربيه بس غالي ممكن الكيلو التونسي ب5دينار ليبي لكن امي ربي يخليهالي بعتتلي كل الحاجات الليبية يلي نبيها من اسبوعين عن طريق الشحن

[حبل الوصل]

هلا عيون ربي يخليلك امك تعرفى انى مانحبش الكسكسي بكل حاشا نعمة ربي والحمد لله حتى راجلى مايحباش لكن الصغار يموتو عليه

[حبل الوصل]

تصبحوا على خير النت مش كويس اليوم

[ام لقمان]

السلام عليكم اختى ميرنا بعد ما قريت قصتك ننصحك بالرقيه دورى حد فاهم ايساعدك وصدقينى انشالله خير دعواتى ليك من قلبى

[ام لقمان]

سلامى للجميع ودعواتى ليكن
انا انراجى فى الفجر ياريت نتفقوا ندعوا كل يوم لوحده منا تتلاقى الدعوات لنفس الشخص
ورحمة ربى واسعه
ونقترح نبدوا بميرنا ندعولها بعد كل صلاة
وبعدين ديروا طابور
شنى رايكم؟

[عيون زوجي]

صباااااااااااااح الخيراااااااااااااااات

[عيون زوجي]

من الصبح لتوا ما خش حد شن هالكسل يلا انشطوووووووووا
في الليل ما الاقيكم ولا حتى في النهاااااااااار

[ام اسيل]

خير ياخياتي . ميرنا اليوم ما خشتش شكله النفسية متلخبطة النبي خشي التجمع وطمنينا عليك ياحبيبتي . ام لقمان لاباس عليك والله شكلها الجيبة قربت ربي ينوضك بالسلامة . عيون نشيطة التجمع والله عندك حق نحنا كسلانات لكن الشغل الله غالب . حبيبيتي وخيتي الي من غير منشوفها حبيتها وخشت خاطري من جوة (حبل الوصل) احلى سبهاوية على وجه الارض كيف حالك اليوم وحال الصغار ردي بالك منهم ومعش تضربي الوليد . اه من قالي انك ضربتيه ؟ العصفورة ههههههه اصلي انا اليوم ضاربة ولدي وبعدين والله وجعني لكن شيطان الله غالب قهرني

[ام اسيل]

قصة حياتي اليوم
اليوم نضت موخر الساعة تسعة (طبعا مديرة محد يقدر يكلمني ههههه)توا نخصم علي روحي عشرة دينار ماتزعلوش الحق حق .لكن سبب التخير اني امس مارقدتش اكويس يابنات تصيرلي حالة غريبة في الليل مرا نحما لدرجة نقعد مش طايقة دبشي ومرة نسقع لين نتغطا ببطانية خطرت عليا الهبات الساخنة الي تجي للوحدة الي كيف منقطعة عليها الدورة اصلا كانت تجي لامي والله الحالة هذي لها ثلاثة ايام زعمة الدورة تبي تنقطع عليا ولاشنو ياخياتي انظني مازلت صغيرة عمري 32 سنة والله ماني عارفة .المهم روحت من المدرسة وانا مروحة قايليلي علي سوق قلت نعدي نشوفه وعديت من طريق جديدة اول مرة نمشي منها وانا ماشية في امان الله نلقى عرم سيارات هادات عليا ويديرولي في الضوايا ويبيبو وانا ياساتر نقول هضوما كنهم اخيرا فهمت اني ماشية في الطريق بالعكس لكن والله ربي ستر قريب رحت فيها وتعجنت .وبعد ها الفجعة روحت على طول وما قلتها لراجلي بكل بعدها يفتحلي اسطوانة الغشم الي لها اول ومالهاش اخر وطيبت الغداء درت مكرونة بالباشمل وكاليلوني بالخضرة ودجاج مقلي يعني فشيت غلي في التطييب ودقيتها دقة باهية ودزيت البنت لعمتها والعيل عدا للنادي يدرب عا الخيل وانا رقدت هضا وين نضت . وتوتا توتا خلصت الحدوتة حلوة ولا منتوتة

[حبل الوصل]

المشاركة الأصلية كتبت بواسطة ام اسيل

خير ياخياتي . ميرنا اليوم ما خشتش شكله النفسية متلخبطة النبي خشي التجمع وطمنينا عليك ياحبيبتي . ام لقمان لاباس عليك والله شكلها الجيبة قربت ربي ينوضك بالسلامة . عيون نشيطة التجمع والله عندك حق نحنا كسلانات لكن الشغل الله غالب . حبيبيتي وخيتي الي من غير منشوفها حبيتها وخشت خاطري من جوة (حبل الوصل) احلى سبهاوية على وجه الارض كيف حالك اليوم وحال الصغار ردي بالك منهم ومعش تضربي الوليد . اه من قالي انك ضربتيه ؟ العصفورة ههههههه اصلي انا اليوم ضاربة ولدي وبعدين والله وجعني لكن شيطان الله غالب قهرني

خيرات واجدات عليك ياأحلى وخية والله القلوب عند بعضها كيف عرفتى إنى ضاربة الولد والله صدقتى لكنه على قولتك شيطان لكن بعد نضربه يوجعنى اليوم كنت في العيادة رافعة البنت لدكتور الاسنان وانى معدتى توجع فيا عاينت وروحت وتوة نستنى في الراجل اهو جاي في الطريق ربي يجيبه بالسلامة وبالنسبة للهبات اللي تجيك حتى انى مرة جتنى وخفت زيك لكن ماعتقدش انه هذا السبب