تجمع حوامل ليبيا

[عيون زوجي]

سورينام انتي ترضعي في فراس طبيعي ولا شنو؟؟؟؟؟؟؟؟؟؟

ام لقمان قداش عندك صغار وقداش ليك متزوجه

[سورينام]

المشاركة الأصلية كتبت بواسطة عيون زوجي

وايعينك على هم الصيانه انا مايجينيش النوم الا في حوشي حتى في حوش اهلي مانرتاحش نرقد فيه مابعدك شهر تام برا حوشك قداش بترفعي من شناطي

واااااااااااااك ... ماتفكرينيش ياعيون بالله عليك .. لاني متكدرة من طلعتي من حوشي لين خلاص .. وحتى اني مارتاح الا في حويشي .. لكن الله غالب ..

[ام لقمان]

عاد ياعيون مااديريهاش بكل
طاسة حليب وشوى شاميه!!!!
ياريتك اقريبه رانى جبتلك الجغوم ابروحى
خلى باللك من نفسك على الاقل على شان الصغار
ديرى دحى الكمون وكولى حويره ساهل ديرهن ويقون
اوعدينى تهتمى بروحك

[عيون زوجي]

اليوم جتني عزوزتي تبيني انطيب طبيخة حلبه لان عمات زوجي بيجوا العشيه كلمتها بالدلاله والضحكة قلتلها طيبيها انتي انا مريضة سهرانه ليل تام على ميدو وراسي بينفجر وخياطتي متعبتني و لان صحتها ماشاءالله وديمه اطيب لبناتها
ردت اعليا وقالت لا لا فكيني
حرجت من كلمتها وما بينتش اني زعلت ولما جوا عماته قدمت عصير وشكلاته وقهوة وحلويات وفواكه وخلاص وهي مش عاجبها وتنفخ اعليا

[ام اسيل]

رورورورورووررووورررووورررووورورورورورورورورورووووو وووووووي

احلى زغروته لاحلى ميدو وامه والف حمدالله على سلامتك وسلامته ربي يحفظه لكي انتي وبوه وتشوفي اولاده يارب
وردي بالك من سارة مش تخطي عليهاوالله فرحتلك من قلبي ربي يدوم عليك الهنا

[سورينام]

عن اذنكم يالغاليات .. نمشي نغير لفراس .. عاملها حاشاكم

[ام اسيل]

اهلا بالغالية ام لقمان كيف حال الاولاد وشن دايرة الحلوة جنان هدت ولا مازالت عياطة ربي يحفظلك عويلتك يارب

[عيون زوجي]

صحيتي يا ام لقمان ردك جاني زي الرحمه حسيتك اوخيتي جديات
يارب يفرح قلبك بلي تتمنيه
هلا وغلا بالغاليه ام اسيل والله يسلم زولك ويسلملك اسيل وهيمو وبوهم يارب

[ام لقمان]

عيون انا عندى ثلاث اصغار ربى يحفظهم لي
اوليدين وبنيه
ونرضع فى ابنيتى طبيعى ونعاون بالصناعى

[ام اسيل]

ميرنا يارب بكرة تبشرينا بالحمل يارب يارب بجاه النبي ياربي

حبل الوصل وينك والله مشغولة عليك