تجمع حوامل ليبيا

[عيون زوجي]

السلام عليكم
هلا ام لقمان انشاءالله تنوضي بالسلامة وماتخافيش حتى انا في بنتي نقصت امية الجنين لانها بدت تنزل معاي في اخر اسبوع من الثامن واضطروا يعطوني وجع صناعي اول يوم في التاسعوتقريبا كان اخر يوم في الثامن

[عيون زوجي]

ام اسيل شدي حيلك اختي اتاخر حملها بعد ولدها حوالي 5سنوات ونصحوها بالاناناس لانه يساعد على تنشيط البويضات عليك بيه والميراميه ملعقة ميرامية في كاس اميه مغلي خليها ترتاح واشربيها عالريق مدة 20يوم ووقفي منها شهرين هادي خبرتي من اختي وخوذي 7حبات الحبة السوداء مع ملعقة عسل كل يوم وربي يرزقك بالعيل السليم

[ساجدة]

خيرات يا عرب ليبيا....شن قصتكن كل ما انخش تطلعن وكل ما نطلع اتخشن ديرولي حل انا جهازي عاطل ومره مره نسرق في الجهاز من راجلي وندخل التجمع يعني ما انحصلش فلجهاز وربي عالم بحالي مريضة وعندي برد وكحة وزكمه وماناقص خير البلاد هنا مايعرفو الحمو بكل مطر مطر مطر وصقع صقع صقع

[ساجدة]

المشاركة الأصلية كتبت بواسطة ام اسيل

سجودة سجودة وينك ياحبيبتي طولتي الغيبة والله وحشتينا نحسابوك جبتي

حلفتك بالله اول ماتجيك لية الجياب خشي التجمع وقوليينا عشان ندعولك وانت في اي شهر توا وياميرنا بالنسبة للعصيدة انا راني ما تعرفش نعصد ندير في العصيدة في الخلاط هههههههه خلو علي الموالح شاطرة فيهن وعلي شطانة العيال انا ولدي مش شيطان غير يقول للجن انزل ولا نرقالك قريب يهبلني

تسلمي يا خيتي وحتي انا ان شاء الله هدا اللي عابيه عليه تبي اتجيني الليه وقاعدة بروحي لاهلي ولاوسط بلادي اكيد ندخل التجمع وانعيط فيه وانتن تحملن العياط

[ساجدة]

ام لقمان سامحيني يا حبيبتي معش رديت عليك لكن والله ماعندي جهاز ....انا ان شاءالله موعدي يوم 25-6 لكن مش عارفة وليد والاابنية هنا مايديروش في الصورة الافي الثالث والخامس بس ...وفي الخامس قالولي الكرعين امسكرات ما عرفوش...والله مش مهم اهم حاجة نبقي بخير وخاصة قاعده بروحي في هالغربة لا ام ولا اخت ما امعاي حد امفيت الله -سبحانه وتعالي-خير من كل شئ

[عيون زوجي]

السلام عليكم
ماشاءالله ام لقمان وساجدة عن قريب تفتكوا من هالثقل والتعب عقبالي يارب ماانخش التاسع بالصحه والسلامه
وعقبال الولادة على خيرررررر وبالسلامه انشاءالله

[ساجدة]

مششششششششششششششششششششكورة اختي عيون زوجها ومرحبتين واهلين وسهلين نورتينا............

[ام اسيل]

اهلييييييييييييييييين سجودة هلا والله حيا الله اي والله بعيد السو عليك ياخيتنا والله شاغلة بالي الغربة صعبة ولكن هانت عدى الواجد ومازال الشوية وانت شكلك تبي تجيبي غادي نحسابك توا تجي عا الجياب يس متخافيش انا مرات خالي تجيب غادي قالت تجيها ممرضة كل يوم بعد الجياب تساعدها ردي بالك من روحك وادفي كويس واشربي حاجات ساخنة وان شاء الله لاباس

[ساجدة]

اسمعن يا صبايا لازم لازم اتديرن حل...... عشان انتلاقو مع بعضا في التجمع شن رأيكن انحددوا وقت معين انتلاقو فيه خير من لعبة القطوس والفار هذي اللي نلعبوا فيها......

[ام اسيل]

تعرفي يا ساجدة عندي سلفتي توا حامل مسافرة لبريطانيا في شهر 7 عشان تجيب غادي قالت الجياب في ليبيا خطر مع انها تبلط في عيالها بلط حتى خياطة ما يخيطو فيها اهو كل راس وعليه حكمة