يسعد صباحكم صبايا
عزيزتي جمان ان شا الله ربنا يكتبلك الافضل ويحفظلك الجنين او الجنينين لكن من باب اثراء المعلومات (بما اني طبيبة) حابة احكيلكم انه في متلازمة طبية اسمها (متلازمة اختفاء الجنين الثاني) وهاي المتلازمة مش نادرة يعني تقريبا بين كل 10 حوامل بتوأم ممكن وحدة تمر بيه واختفاء الجنين ممكن يصير بأي مرحلة من الحمل مش شرط بالبداية ولكن كل ما كان الحمل متقدم اكتر كل ما زاد احتمال انه يضل في علامات لوجود بقايا جنين ولكن ممكن انه يختفي كليا وكتير من الحالات بتصير من دون ما تلاحظها الام او حتى الطبيبة. على كل وضعك مختلف ان شاء الله والمهم انك ترجعي تعملي التراساوند داخلي مش من البطن لأنه أدق. والف سلامه
أميرة الحب...بصراحة انا كنت زيك بالاول خايفة احكي للناس وكنت دائما اقول لحالي "استعينوا على قضاء حوائجكم بالكتمان" ولما قلت لأبوي اني حامل بتوأم وحكيتله انه ما يقول لحد حكالي "هو احنا سارقينهم سرقة؟؟!! بالعكس اللي بيحبوكي رح يفرحولك وبدل ما تخبي هالموضوع ويزعل ناس ويصير موضوع حساس اتوكلي على الله واستمتعي بدعوات الخير من الناس اللي بيحبوكي وفرحتهم معك" لكن لأن احتمالية الإجهاض بوجود توأم أكبر للأسف فيفضل انه ما تعلن الحامل الخبر الا بعد مرور عالأقل الثلث الأول من الحمل. انا صارت معي اني ما حكيت لبعض قرايبنا ووصلهم الخبر من ناس تانيين وزعلوا مني كتير وحسوا كأني ما بثق فيهم لا حول ولا قوة الا بالله.
اختي عطر فواح...عملية ربط عنق الرحم ما بتنعمل لكل وحدة حامل بتوأم أو أكتر هادي عملية الها شروطها يعني مثل ما حكيت قبل هيك بتنعمل في حال وهن بعنق الرحم او تكرر الإجهاض بثلاث مرات متتالية او اكثر وكل مرة يحصل الإجهاض على عمر أقل للجنين. ما في داعي انه بما انك حامل بأكتر من جنين انك تعملي العملية لأنه كل عملية مصحوبة بمخاطر الا اذا كان في سبب واضح والله يحميكي ويحميلك الأجنة الكتاكيت
عزيزتي سآره ...اولا الف مبروك الولاده مع اني متأخرة بالتبركة وبالنسبة لترهل البطن والصدر فالسبب واضح نوعا ما وهوي انك نزلتي وزنك بسرعة وما اعطيتي لجلدك فرصة انه يشد حاله بحاله...ينصح للحامل انها تراقب وزنها خلال الحمل علشان ما تنصح مرة وحدة وكمان بعد الحمل علشان تنزل الوزن الزائد على مدى" سنة " تقريبا مع لعب تمرينات لشد البطن طول الفترة
بنات عندي سؤال بالنسبة للوزن...انا هلا بنص السابع ووزني زاد 12 كيلو من بداية الحمل وهاد اول حمل الي...حابه اعرف تجربتكم الخاصة مع زيادة الوزن كم زدتي ولأي شهر؟ وظهرت تشققات ولا لا؟ انا لسا ما ظهرت عندي تشققات والحمد لله وان شا الله ما تطلع لأني بستخدم كريم خاص كل يوم على كل المناطق المعرضة للتشقق، بس المشكلة انه نسبة ظهور التشققات عند الحوامل بتوأم 90% بينما الحامل بواحد 50% !!!
06-06-2011, 11:10 AM
رد: 【ツ】أحلى تجمع لأحلى حوامل التوائم 【ツ】 الجزء الثالث
maha8181 
سووووووووووووووووري لاني تاخرت عليكم بس لاتلوموني
جديد منتدى منتدى أنواع الحمل
العرض العادي
