من قالو لها جنينها بيموت وولدته سليم ..!

[اروي يقيني]

ام اسكندر
مشكوره حبيبتي
بس مو راضين يولدوني الخاص يقولون ماعندنا اجهزه للطفل بعدين الحكومه افضل والحكومه مو راضين يولدوني الا بتوقيع الدكتوره اللي انا عليها من بداية حملي والدكتوره مناحسه مو راضيه تقول بيموت طلع او ماطلع
الله يهديها


بنت دار بو راشد

ان شاءلله يااختي الله يسسمع منج ياااااااااارب

صعب تنساني

مشكووووووره حبيبتي لوقفتج معاي والله مادري شسوي وياهم خليته على الله

وهذاني ادعي ليل نهار ان شاءلله اشوفه في حضني ويخيب ظن الدكتوره

الله كريم والله تعبت وانا من مستشفى لمستشفى

ان شاءلله مابيضيع تعبي

مشكوره حبيبتي مره ثانيه

حبيت حبيبي

مشكوره اختي

توكلت على الله واللي يتوكل عليه مايخيب

الله يسمع منج يارب

[جلنار2]

اشربي موية زمزم لانها تزيد الموية حول الجنين

الله يهون عليكِ وربكِ كريم ..


,,

[&الريحانه&]

والله تأثرت لقصتك

ربي يسهل امرك ويحفظ جنينك من كل سوء ومكروه

والله يبلغك فيه وبشوفته

واذا له حياه بيعيش لأن كل شي بيد رب العالمين

توكلي على الله وماراح تخيبين

[اروي يقيني]

جلنار

حبيبتي مانحصل ماء زمزم في البحرين بسهوله

وهذاني اهلي يدورون لي ومن يحصلون لو شوي يجيبون لي والله كريم

مشكوره اختي


الريحانه

مشكوره حبيبتي والله يسهل عليج

ويعطيج على قد نياتج يارب

والله يقر عيونج بشوفة جنينج معافى سالم من سوء وبلاء

مشكوره اختي


اللهم ياماسك السماء بلا عمد امسك مافي رحمي

وابعد عنه كل بلاء ربي ان في قلبي حاجه لاتعلمها الا انت فقضها لي يارب العالمين

الله يرزق كل محرومه يااااااارب الذريه الصالحه

[صعب تنساني]

اروي تصدقين انه ما دخلت الا علشان اتطمن عليج تاثرت بسالفتج واايد مبين عليج انج وحده صبوره ومؤمنه بالله لو انه مكانج انجان اقلب الدنيا من البجي والنواااح انه احس فيج لانه انه خسرت جنيني بس انه اهووون لانه كان بالشهر الرابع وانتي بالسابع انه ادعي لج الله يقر عينج بشووفته انه من البحرين انتي باي مستشفى تتعالجين؟؟ وشو اسم دكتورتج ؟؟؟؟ اتمنى نكون على تواصل ؟؟؟ خبريني اول باول انه راح ادخل كل يوم اتطمن عليج سمعت انه الحلويا ت تكثر الماي لانه اتذكر دكتوره اختى كانت تقول لها لا تاكلين حلويات وايد لانه راح يزيد الماي حول الجنين الله يتمم لج تعالي مستشفى الهلال بالمحرق وايد زين والكل يمدحه

[صعب تنساني]

اروي بس حبيت اسالج ليش ما تروحين يحطوا عليج مغذي(سيلان)لحد ما ينمو البيبي ويكمل شهوره انه يوم نزل علي الماي حطوا علي سيلان علشان ما ينشف الماي ويختنق لا سمح الله شلون المستشفى ساكتين عنج ؟؟؟؟ ما حطوا ماي يعوض الماي الناقص ؟؟؟؟؟؟؟؟؟؟؟ عجيب وايدددد

[اروي يقيني]

هلا اختي مشكوره خيوو

انا ساكنه في عراد
وكنت اتابع في مركز محرق لان عنوانه على البيت الثاني الا بمحرق
حولوني السلمانيه عشان السالفه
واهناك صعقتني دكتوره نعيمه
يقولون هذي استشارية كبيره

وماخلت شي في الجنين قالت مو صاحي كل شي فيه وان مستحيل يعيش يعني مايصير نولدج الحين قيصيري ونعرضج لها وجذي جذي بيموت
قلت لها ماقدر اشوفه يتحرك في بطني وانتي تقولين بيموت
واغمى علي اهناك بالسلمانيه اهي ولامفتكره
مو راضيه حتى يخلوني عندهم عشان يتابعون حالتي
تقول ماله داعي
كل شوي وقالت لي بيموت

رحت لزوجة عمي اهناك في السلمانيه تشتغل دكتوره اشعه وقلت لها شوفي لي حل وياها غيروها لي او سكتوها عني لان اهي مو الله تقول بيموت
مو على كيفها وانا عندي احساس بيعيش والله يختي عندي احساس ولاعلي منها
وراحت لها تقول اذا موعاجبنكم كلامي طلعوها برا وسوو اللي بتسوونه
وكل ماقالت لها انا شفت عنده كله ثانيه وعنده مثانه ورئته سليمه اهي تقول لا انا ماشفت
ومستحيل يعيش الجنين

والله بتذبحني شسوي
وبعدين راحت زوجة عمي بتغيرها لي مارضو السلمانيه يقولون لان عندي مشكله الحين في الجنين مايصير نبدلها المفروض من البدايه

يالله اللي الله كاتبه لي بشوفه والله كريم


ورحت الخاص قالو كل شي زين بس كله وحده متكيسه بس الخطر مافيه حوالينه ماي وكلهم مستغربين ان شلون للحين عايش وان لازم يولدوني السلمانيه الحين

ومايرضون يولدوني الخاص يقولون ماعندنه اجهزه للبيبي لين ولدتي لانه عنده كله وحده متكيسه


ماخليت ولامستشفى رحت التخصصي عطوني ورقه اوديها السلمانيه عشان يرقدوني يولدوني او على الاقل يتابعون حالتي قالو احنه مانعترف في المستشفيات الخاصه

ورحت الهلال عندي دكتوره اتابع معاها تقول شلون ساكتين عنج و بعد عطوني الرساله اروح السلمانيه ورحت بعد مثل الشي يقولون لي اذا دكتوره نعيمه ماتقول رقدوها او ولدوها مانقدر نسوي شي لازم توقع اهي

ورحت عند فوزيه كمال بعد تقول لازم يولدونج

ورحت ابن النفيس طلعت اللي اهناك تعرف دكتوره نعيمه اللي في السلمانيه

تقول لي سمعي كلامها اي شي تقوله ترا صدق بيصير
اقولها تقول بيموت اصدقها
اهي تقول ماعنده الا كله وحده وماعنده مثانه والرئة مادري شفيها قالت

والخاص كلهم قالو عنده كلتين وبس كله وحده متكيسه وفي امل يعيش وفي ناس عايشه بكليه وحده عادي

تبيني اصدقها

وعطوني ورقه بعد اروح السلمانيه ورديت رحت وقالو مانقدر انسوي لج شي لما تقول دكتوره نعيمه عصبت وفلت الاوراق في وجهم وطلعت قلت لهم انا مابدعي يصير لها مثل اللي قاعد يصير لي عشان تحس بس بقول الله كريم والله يهديها

واذا صار اي شي في اللي فبطني بحملها المسؤوليه

لانه نبضه زين وانتو مو راضين تطلعونه عشان يعيش تبونه يموت في بطني

وبس طلعت عنهم وحتى مواعيدي تخيلي يعطوني بعد ثلاث اسابيع للمراجعه شوفي لاي درجه مستهترين

اخر شي رحت العسكري عند دكتوره موزه الله يعطيها كل خير يارب

هداتني وطمنتني وقالت لي اذاالله كاتب يعيش ماعليج منهم بيعيش

وقالت الحين كل عشرة ايام بتسوي لي سونار من تشوف نزل راسه بتولدني طبيعي بطلق صناعي وتقول اي شي تحسين فيه تعالي احنه موجودين اهني

وكلت امري الى الله وخليت كل شي بيده سبحانه جل جلاله اذا الله كاتب لي فيه رزق بشوفه
الله يقر عيوني بشوفته ان شاءلله


مشكوره اختي وايد والله يعطيج اللي في خاطرج يارب ويرزقج من رزقه الحلال
وان شاءلله الجنين اللي راح من عندج بيوقف لج عند باب الجنه
الله يرزقج خير الدنيا والاخره

[حِلمْ الأُمـوُمَـهـْ]

الله يحفظ جنينك من كل مكرووة يآآآرب ,

دخلت أتطمن عليك حبيبتي ومآرآح أنسآكِ من دعوآآتي ,

[اروي يقيني]

هلا حبيبتي مشكوره وماتقصرين

تسلمين

واذا كنتي حامل الله يسهل عليج

واذا محرومه الله يرزقج الذريه الصالحه اللهم امين

مشكوره مره ثانيه اختي

[حِلمْ الأُمـوُمَـهـْ]

^^^

لآ حبيبتي مو حآمل توي من أسبوع اجهضت بالشهر الرآآآبع ربي يعوضني خير ,

أسمعي قلبو قريت إنو أكل البطيخ الأحمر يزيد من موية الجنين وتعرفي البطيخ كله موية أصلآ ,