عروسة و حايسة و متوترة

[Rawano]

السلام عليكم ورحمة الله و بركاته

أنا ليا فترة طويلة بتابعكم حتى قبل زواجي ..
متزوجة من 3 أشهر و نص لكن متلهفة للحمل بشكل مو طبيعي ( لحد يقول بدري فترة خطوبتي و ملكتي كانت قريب 4 سنوات ) خلاص أبغى بيبي يملى عليا دنيتي ..

فمحد راح يفهمني قدكم عشان كده جايا أفضفض .. فعذراً على الإطالة ..

المهم .. أنا التلاتة الشهور اللي فاتت كل مايقرب ميعاد الدورة تتهيألي أعراض و أنخبص و تطلع دورة ( أصلاً ماكنت أعرف حاجة عن التبويض ولا فاهمة شي كنت ع البركة ) ..

ده الشهر الحمدلله أتعلمت أحسب طول دورتي 27 يوم تقريباً .. و حاولت يكون فيه لقاء مع زوجي في أربعة أيام من أيام التبويض ( يومين قبل يوم التبويض و يوم بعده ) .. طبعاً حسبت أيام التبويض من خلال موقع وزارة الصحة السعودي ..

وحافظت على الفوليك أسيد من 3 أسابيع تقريباً ..

دورتي اللي فاتت جات يوم 5-9-2012 .. و استمرت 7 أيام ..

وانتظرت علامات التبويض وحصل لقاء يوم ( 12,17,18,19,20 ) يعني اليوم الثامن من الدورة و اليوم 13 و ال14 و ال15 و ال16

الآن باقي على دورتي 5 أيام المفروض تجيني يوم 1-10-2012 .. للعلم دورتي منتظمة الحمدلله جداً ..

قبل كم يوم لاحظت إنتشار حبوب مثل الحساسية في وجهي و طلعت لي كم حبة في لساني ..

مادققت قلت يمكن من الكيماويات و التنضيف حق البيت .. ( الآن بأفكر ممكن من ارتفاع حرارة الجسم الطفيفة وقت التبويض !! صح كده ولا دي معلومة خاطئة !! )

عملت تحليل منزلي فيرست ستيب قبل يومين يعني قبل الدورة بأسبوع أو 8 أيام يمكن ( ماكنت أحس بأي أعراض لكن متفائلة ) .. و طلع سلبي طبعاً .. أكيد مرة بدري و أنا استعجلت ..

اليوم يعتبر اليوم التاسع بعد الإخصاب في حال ربنا أذن و تكرّم عليّ ..

الأعراض إللي بدأت أحس فيها من أمس الليل :

أمس الليل بعد 12 بدأت أحس بآلآم غير طبيعية في أسفل ظهري و صدري جداً يؤلمني لدرجة ماقدرت أنام إلا بعد جهد جهيد و دحين خف ألم الصدر لكن ألم الظهر باقي حتى فالصلاة يؤلمني ..

أحس لعابي مرّ

شهيتي مسدودة

الله يكرمكم إفرازات غير مائية بيضا مائلة للصفرة ( مو كثير ) بس أحس برطوبة أوقات و أوقات

نغزات في الجنب الأيسر من الحوض أو فوقه ( ما أعرف الوصف )

ألم في الأرجل و الجسم عامة أحس مهدود حيلي وتعبانة جداً حتى ماقدرت أشتغل في البيت أمس و اليوم .. ماعندي طاقة و خملانة

نووووووم

دوخة خفيفة لمن أوقف

أحس إني تقيلة رغم إنو وزني نازل

مالي نفس أقرب من زوجي

إمساك الله يكرمكم

مني طايقة الملابس عليا + تعرق

ألم عند التبول ( مرتين سارت لي بس )

و دحين مسخنة و دايخة مو قادرة أقوم من السرير ..

ممكن يكون بيتهيألي صح ؟ قاعدة أعشم نفسي ؟!

ربنا كريم بس حبيت تفيدوني بخبراتكم .. حتى لو ماعندكم فكرة عن الأعراض بس أدعولي إنو ربنا يجبر بخاطري ده الشهر و يفرحني أنا و كل المنتظرات ..

و أكيد أنا كتبت لكم لأني ما أقدر أكلم أحد تاني .. الكل حيقولي أستني 5 أيام و يبان معاكي ..

الإنتظار شعور سيء جداً .. بس نفوض أمرنا إلى الله و ربنا كتير الخير سبحانه مايعجزه شيء ..

و آسفة على الإطالة بس إللي تشوف موضوعي تدعيلي حتى لو ماكتبت ردّ تدعيلي بينها و بين نفسها