ديوانية البحرين - دردشة حوامل البحرين - البحرينيات

[أحلام أم]

المشاركة الأصلية كتبت بواسطة حروف عاشقة

صباح الخير

مشكورين كلكم على السوااال ما تقصرون فيكم الخير ،، وادا جيت اقول لكم سالفتي لازم اول احمد الله على كرمه ونعمه وعطاياه فالحمد الله على كل حااال ..

ما ادري من وين ابتدي هل الحملة من بدايتها كلها اكشنات سبب غيابي يا خواتي اننا صادنا حادث انا مع زوجي وتكنسلت السيارة وزوجي تعور وانا بعد بس الحمد الله الاجنه ما صادهم شي وهذه من لطف الله فينا .. ما ادري شلون اوصف الموقف بس معجزة من الله اننا طلعنا سليمين انا وزوجي بإصابات طفيفة الحمد الله الحمد الله الحمد ..

وبعدين صارت دوخت المستشفى ويه الاترساونتد والمتابعة عشان اطمن على الاجنه محتاجة دعواتكم خواتي عشان اكمل هل كم اسبوع وادخل التاسع بسلاااام ..

ماعليش شر حبيبتي حروف عاشقة
ومثل ماقلتين في الحديد ولا في العبيد وبعدين كل شيء يهون يارب تدخلين التاسع وتولدين بالحلويين بأحسن صحة وسلامة ويارب قدمهم الخير والرزق الوفير عليكم والله يرزقكم بسيارة أحسن منها
حاولي تطلعيين صدقات على طول
مابنساش من دعائي وإنتين بعد على طول طمنينه عنش يالغالية

[طفلي حياتي]

السلام عليكم
شخباركم
ام علي: هلا وغلا فيش وحياش ويانه وان شاء الله نكون فال خير عليش

ام امل يا هلا وغلا ان شاء الله صرتين اشوه الحين من الالم اللي تحسينه؟

بنت الايادويد هلا وينكم هالغطه كلكم مره وحده غطيتون بس زين اللي رجعتون بالسلامه

حروف عاشقه تصدقين فز قلبي ماعليش شر واسم الله عليش وعلى اليهال من كل مكروه طلعي صدقه باستمرار واقري آية الكرسي والمعوذات يوميا وانفخيهم عليش بالاضافه الى قول الله اكبر كلما تشوفين هالمره كبري في ويهها والله يكفيش شرها ويكفينا وياش شر الحاسدين اني يختي عندي ناس من قرايبي هالكيني من المطالع والحين يوم دروا عن حملي طاحنين عمري والستار الله منهم باجر بيكبر بطني وتعالي للتشبيهات والحجي منهم ويم اللي اولد ان شاء الله بالسلامه خايفه على البيبي منهم بس ربش الحافظ والكريم


روووز ويش صاير عفر ما تطبين عدلي جهازش لو اشتري غيره عفر خخخخ

شمس وينش ماتبينين عسى المانع خير

فلونه شخبارش؟ على طاري الشباصه اني اذا ربي قومني بالسلامه ويى جنيني باخذها وبخليها في البوم القمر ويى كل شي يخصه

حنين شخبارش ان شاء الله بخير

ام خليل هلا والله بالطش والرش اني يختي ماعرفتيني راعية وسواس من الزين حسبالش اني اشتريته مني والدرب حققت ويى راعية الموضوع اللي حطت عنه تحقيق كامل وهي محذره من شراء اوميغا3 يحتوي على فيتامين أ لان يسبب تشوهات للبيبي
ووقفته لان يسبب لي حموضه ودقات قلبي تصير زلزال من الحموضه فتركته
وبالنسبه للحفله اشتري في كارت بلانش دراعات يهبلون وفيه دراعه كانها فستان تقدرين تشترين
وبالمبارك للمعاريس
احلام ام طلاتش اشوفها خفت علينا من قطعتنا ام عايشه عساها ان شاء الله بخير

[om khalil]

طفلي حياتي
باروح أوايق جان فيه شي عدل عندهم..
عن الاوميغا 3 اني افكر هاليومين اروح الصيدلية اسايلهم عن نوع زين وباخذ، اللي عندي خفت اخذه لانه مكتوب عليه اسالي الطبيب قبل الاستخدام..

[طفلي حياتي]

هلا ام خليل
اني اليوم اخذت وحده الحين توني لان الشيء اللي موزين تاخذينه على يووع واني قمت اكل وانسى اخذه مباشره عقب ما ينفرم الاكل ابلع وحده واحترقت معدتي حراق فأحسن طريقه انش تبلعينها مباشره بعد الاكل او اثناء الاكل وبالتوفيق ان شاء الله

[الفتاة الذهبية]

طفلي حياتي وام خليل شلونكم؟
ام خليل يعني شنو أوايق؟
اوميغا  مال شنو ليش تشربونه؟

[الفتاة الذهبية]

بروح ارقد تعبانه حدي

[بنت الأياويد]

مـــــــــــلل وضلوعي تعورني وايد ماقدر اعطس ولا اقدر اكح فيني الم قوي :(
صج الحمال تعب

[أحلام أم]

المشاركة الأصلية كتبت بواسطة طفلي حياتي

السلام عليكم
شخباركم
احلام ام طلاتش اشوفها خفت علينا من قطعتنا ام عايشه عساها ان شاء الله بخير

هلا بيش خيووو طفلي حياتي
إنتين ويش أخبارش أحسش كأنش أني من الوسواس من أشوف ردودش أقول هيكي في وحدة أزيد مني
يختيي الظروف إللي أمر بها قاهرة ،سفر زوجي ووحشتي بروحي وياليهال في البيت وفريقنا صخة ولاحد يدخل يشوف أحد لا أطلع ولاأشوف عتبة الباب ومسؤوليتهم بروحي والمدارس وتعب الحمال ربي يثبته ويطمني علية ،النفسية دمار
أدخل أقرأ أخباركم وليين ليي خلق كتبت رد وقمت

[شمس الصباح]

شخباركم وحشتوني

ومشكورين على السؤال وما تقصرون

الايام اللي طافت الصحة زفت صار عندي شد ومن قوته صاارت اريولي صوب البطه ازرق ما اقدر حتى امشي وفوق هذا الم الظهر دابحني يجيني الم مثل الطلق ودوار من نقص الدم كل على بعض وايد تعبانه احس حتى نفسيتي كلش وامتحانات بعد يعني ما في راحه

قلت ادخل اشوف اخباركم واطمئن عليكم

حروف ما تشوفين شر في الحديد ولا فيكم والله يعوضكم بدل السيارة بأفضل منها

اخليكم تعبت بروح اريح شوي

تصبحون على خير

[الفتاة الذهبية]

ما تشوفين شر شموسه