تجمع حوامل ليبيا

[أم ردينة]

مشالله تبارك الله علي وليدك ياآيه يهبل راهو حتى اني عندي بنت راك تنسي هههههه .. بالنسبة للوصفه التمر في اي عمر نعطيها ؟ قصدك التمر منغليشي مع الميه نغلي المية الاول بعدين نحط فيه التمر شويه ولا؟؟

[سورينام]

السلام عليكم ورحمة الله وبركاته
يومكم سعيد ومساءكم مبارك انشاءالله

[سورينام]

عيوووووووووون .. مادام الموضوع فيه عريس .. خلي الصحبة على جنب ...واني بما اني جبت ولدي قبلك .. معناها لازم نسقد بنتي قبلك... (شن علاقة الموضوعين ببعض مش عارفة)

[سورينام]

آية أني موافقة خلاص ... قوولي لولدك يوتي روحه ويتفضل ..اني عجبني ايوب بصراحة ههههههههههه انشاالله غير ما يطلعش اصغر من سروراتنا يا عيون .. وكانه اكبر منهم نعطوهمله الزوز وخلاص

[سورينام]

عيوون .. انشاءالله تجيبي قبل الاثنين .. عندي احساس انك بنتجيبي يوم الاحد في الليل زي ولادتي بفراس وانشاءالله طبيعي

[سورينام]

بالنسبة لحلاقة شعر البنت يا عيوون .. والله نحس فيه مافي فايدة منه .. لأن اني لما جبت سرورة كان شعرها خفيف هلبة وبالذات من قدام .. سمعت كلام الناس وحلقتها وهيا عمرها 3 شهور والله حتى بوها قاللي مقوى قلبك تقربي موس الحلاقة لبنيتك وما تخافيش تنوشيها ... والحق مافي فايدة من حلاقتها لانه لما طلع .. طلع زي ما كان لازاد ولا نقص .. وعطل في النمو واهي قاعدة لتوا عمرها عام و5شهور تقريبا وهيا زي الولد لا توكة ولاربطة .. والله كان نقولك عبيت الدنيا بالتوكات كل ما نشري لبسة نشريلها عليها توكات .. والشعر ايجيبه ربي .. حتى اللي طلع جانا ناااااااعم ومسبسب ما تقعد فيه توكة ولا هم يحزنون

[سورينام]

أم أسيل .. شن مانعك من الدخول للمنتدى .. والله استاحشناك واستاحشنا طلتك .. انشاالله المانع خير

[سورينام]

هاااااااااااااتو.. وام رفيدة .. شن مدايرين فيكم مواليدكم الجدد .. خشو خلي نتشاركو في التجربة ونستفيدو من بعض

[سورينام]

أم ردينة حتى اني زيك نبي نعطي لولدي الشيشة لكن فيه صعوبات .. هو توا كيف ربعن واني نرضع فيه طبيعي ويشبع الحمد لله .. لكن لازم ايجي وقت الواحد بيضطر للشيشة .. والدنيا فيها كل شي وما نندرو على ربي شن مقدرلنا .. في بنتي خليتها لبعد الاربعين ترضع طبيعي وجيت بندخل الشيشة في برنامجها ما قبلتهاش على ما درت .. خليتها ترضع مني لحد ما ربي سخرلي بالحمل بخوها رغم اني مدايرة مانع طبيعي زعميتك .. ولما حملت خلاص ماعاش فيها لازم نفطمها تخيلي وهيا عمرها 7 شهور بس وعلى مادرت ما بت تاخد الشيشة .. وعذبتني .. بعدها بديت نخلطلها في الحليب مع العصير بيش قبلاته وبالشوية بالشوية خليتها حليب من غير عصير والحمد لله اهي لتوا مستمرة عالشيشة .. لكن ولدي رضعها مش مارضعهاش .. بس بعد الرضعة يقعد شوي ويرجعها كلها .. والله ماني عارفة كيف ندير ؟ زعمة نغيرله نوع الحليب ؟؟

[عيون زوجي]

السلاااااااااام عليكم
كيف حالكم توا يا احلى ليبياااااااات
انا هادي وصلتي من ميدان فروسية بوسته وتعبت من المشي وانشاءالله يجيب نتيجه
سوريناااااااام..بنسئلك وين تقعمزي في سارة في السيارة بعد ولادة فرااس لان بنتي ديمة في حجري ومش عارفه كيف بندير معاها نفكر نشري كرسي سيارة وخايفة انها ما تتقبلاش لانها كبرت على العوج مع انها في المانيا تركب في السيارة في الكرسي متاعها ويسموه ماكسي كوزي بس هنا مش عارفه دليني