دردشة بنات مصر , دردشة حوامل مصر , تجمع بنات مصر

[malak ahmed]

ايه حبيبتي هي اروي باينه اوى الصفرا عندها ؟؟

ولون بياض العين ايه ؟؟ بتتعرف نسبتها م العين بردو

بصي متخافيش رضعيها كويس وعرضيها للشمس زي ما البنات كانو قالو وان شاءالله مش هتزيد وهتتطمني عليها

انا ملك كنت بوديها المستشفي اللي كنت والده فيها كانت بتروح الحضانه الي هناك وبتحلل نسبه الصفرا بس مش بياخدو منها دم كان عباره عن جهاز بيحطوه علي راسها وصدرها وتحت البامبرز وبيكتبو الرقم وكنت بقول للدكتورعالارقام

عملناها 3 مرات واظن التحليل ده اسمه قياس نسبه الصفرا الدكتور كان كاتبو كده

[malak ahmed]

يا نورا مانا مش بلاقي عبايات بزراير من قدام هبقي اتصرف في كام واحده من عندي واعملها حاجه

ماشي انزلي لتتسفلتي من ابو احمد

[malak ahmed]

بصي يا ايه هي مكانتش اول ما اتولدت باينه عندها الصفرا بس لما راحت للدكتور تالت يوم عشان وضوع البلغم وكده الدكتور قال تابعوها وفيه احتمال تجيلها الصفرا فبعد يومين فعلا لما قال لقيناها اصفرت

وكنا بنتابع النسبه يوم بعد يوم زي ما قالنا بس مدانيش علاج ليها وقالي اهم حاجه رضعيها كويس

متخافيش والله هتبقي كويسه . قوليلي انتي قستي حرارتها اصلا ولا مجرد تخمين وبالايد كده

اصل ممكن تكون عاديه وانتي صهدانه وحرانه وشايفاها كده

[malak ahmed]

انا بردو ساعات بحس ان ملك دافيه بس بقيس حرارتها بالترمومتر الرقمي ده عشان اتاكد والحمد لله بتكون حرانه وساعات بردو الاقي وشها دافي واديها ورجليها تلج بتخض اوى بس الحمد لله بتكون الحراراه عاديه

[أم إياد]

ما انا يا ام ملوكة ماقريتش البنات كانوا كتبين ايه عن الصفرا

انتي عارفة طبعا هي كده لسه ماتمتش 24 ساعة من الولادة
اول ما اتولدت ماكانش ظاهر عليها حاجة والدكاترة طمنونا وقالوا كويسة
بس لما روحنا وبيتنا صحيت لقيت لونها متغير
وماما معايا كمان لاحظت وقلت دي صفرا زي اللي كانت عندي انا وانا مولودة

ولون العين بصراحة لسه مالاحظتش فيه تغيير
بس مش عايزة استنى لحد ما الامور تتطور

اللي قالقني انها اتغيرت كده على طول في خلال اقل من يوم
وكمان حرارتها عالية ربنا يستر

يعني يانهاد تقصدي التحليل ده مش بيتعمل في معمل ؟
يعني اروح فين بالظبط اعمله؟ دا ان لقيت حاجة فاتحة اصلا

[malak ahmed]

بصي يا ايه انا كنت بعمل التحليل لملك في المستشفي اللي كنت والده فيها بالجهاز اللي بقولك عليه ده

لكن لما جيت هنا سما قالتلي ان تحليل الدم اللي بيبقي ف المعمل بيبقي ادق في النسبه وكده بس انا معملتش التحليل ده لاني كنت بعملها التاني يوم بعد يوم فطبعا مينفعش ناخد منها دم كده كل شويه

ولا حظنا الصفرا دي من لون وشها لقيناه بيصفر واتغيرت اوى فعرفنا ساعتها بقي كمان لقينا نقط صفرا كده عند مناخيرها

ربنا يطمنك عليها ومادام لون العين كويس مش اصفر يبقي متقلقيش خير ان شاءالله ولو لقيتيها نايمه صحيها ورضعيها يا ايه عشان تشبع .. الست اللي عند الدكتور قالتلي ان الصفرا بتنيم العيال وبتكسلهم وقالتلي اصحيها ارضعها


متهيالي يا ايه شيماء هي اللي عملت موضوع تحليل الدم ده لانس

[أم إياد]

بالنسبة يانهاد لاني ارضعها كويس فانا مش عارفة ارضعها اصلا لسه مانتي عارفة ماجاش لبن وعمالة اديها في اعشاب اللي هي بيبي درينك
مش عارفة بقى صح ولا غلط
اصلها صعبانة عليا من كتر العياط جعانة ولسه اللبن مانزلش

وبالنسبة ياحبيبتي للحرارة انا حسيتها الاول بايدي حسيتها عالية وفعلا قست بالترمومتر لقيتها داخلة على 38
ومش عارفة برضه والله اديها لبوس خافض ولا بيدو ايه مش عارفة

وبالنسبة لملك كويس ان الدكتور توقع ان الصفرا تجيلها ونبهكم
انا امبارح بعد الولادة قالول كويسة وصحيت لقيتها متغيرة

طيب يانهاد لما بدأت تظهر على ملك كانت ايه الاعراض؟
وكنتي بتعيدي التحليل على الجهاز اللي بتقوليه؟
والاقيه فين ده طيب؟

فيدوووووووني ياجدعااااااااان

[أم إياد]

معلش يانودي ماخدتش بالي انك رديتي
خير ان شاء الله
هي لونها اتغير فعلا جاااامد عن امبارح وبقى اصفر في خلال الكام ساعة اللي فاتوا بس
مش عارفة بقى ايه التطورات الل هتحصل
ربنا يستررررر

أديني مستنية سما تقولي على اسم تحليل الدم لو لقيت معمل فاتح نعمله
ويارب يارب مايزيدش عليها وتبقى كويسة قريب

تم جميلك ياااارب بخير

[أم إياد]

يعني انس ابن شيماء كمان جاتله الصفرا
اظن برضه عائشة بنت سمية كمان جاتلها
بس ما اعرفش اخبارهم ايه وعملوا ايه
ربنا يطمننا على ولادنا يارب ويجيب الشفا من عنده

نهاد استأذنك حبيبتي مش قادرة اقعد نهائي من الخياطة والبواسير

هاحاول ادخل تاني اقرا الرد
السلام عليكم

ودعواتكم ياحباااااااااااايبي لما تدخلوا
وكل سنة وانتم طيبين

[أم إياد]

المشاركة الأصلية كتبت بواسطة نولارا

ايه انا بتصل عليكى موش بتردى ليه

يانهااااااااااار ابيض هو ده رقمك اللي عمال يرن
والله لسه واخده بالي حالا
اصلي ماصدقت اروى نامت شوية وموطية صوت الموبايل
ماسمعتوش

هو ده رقمك ال011 واخره 95 ؟