حبيباتى سيدات ليبيا تفضلو لأعرف ما حالكم

هدية الخالق · 08-13-2013, 02:26 AM

اهلين وخيتي أوشي كيف حالك وهل زوجك والصغار تشرفت بمعرفتك

هدية الخالق · 08-13-2013, 02:36 AM

توا عندنا الساعة 4ونص درت الغدي او بالاحرى العشي امبطن ودجاج محمر في الكوشة
وغيرت لبنتي وتوا بترقد واني مندوش ومنرتاح حتي أني شوية بين ما جي رأجلي
الجو عندنا نوو بكل يا لطيف

dr.loly · 08-13-2013, 02:41 AM

السسلام عليكم ورحمة الله وبركاته

dr.loly · 08-13-2013, 02:42 AM

اهلا هدية الخالق ... انستينا وشرفتينا...
وربي يحفظلك بنيتك هي تقريبآ من عمر بنيتي الولي جت يوم 15.3.2013 وانتي امتي جبتي؟؟

dr.loly · 08-13-2013, 02:47 AM

اثري ياحبوبه بارك الله فيك علي نصائحك القيمة والمفيدة جدآ...
جزاك الله خيرا عليها...

القراية لزوجـــي... انا مازال توقعوا هكي بعد سنتين ممكن كان عشنا ... احتمال امريكا او مصر ههههههههه فرق صح...؟

وشكرا للتوضيح ع الكسكو .. وحلوة البصله نحن نقولوها التقليه اي حد اصوله غرباويه تلقيه عادة يدير فيها

نحن الكسكو بالبصله نديروا فيها في الحنة الصغيره اي يوم مايحنوا العروس قبل يوم الصاله ... الحنة الكبيرة

درناه ف فرحي مع عصبان وبطاطا امبطنه وشيش طاووق .. وطبعا الصاله الرز بالخلطه وانواااع موالح...

والالعااااااااااااااب اه ماتذكرينش قاعده كل شوئ نقول لزوجي فروسي فاتنه رقد وفاتنه الديناصورات
لين قالي خلاص الويك اند الجاي انعدوله هههههه

dr.loly · 08-13-2013, 03:00 AM

اوشـــــــــــــــــــي...

اول حكايه من حكايا مصراته..

ان حوش خالتي كبير بكـــــــل ومعبي بيبان باب ف المربوعه وباب ف الصاله وباب الرئيسي وباب من المطبخ ... يفتحن ع الجنانات ... تذكري بداية الحرب بعد قالو مرتزقه انتشروا والجو هذا طبعا مانرقد الليل خايفه من كثر هالبيبان رعب ههه
وكنت نرقد مع بنت خالتي عمرها 12 سنه في دارها في سرير جنبها بمسافه مدايرته خالتي للضيوف الاقارب بس زيني او خالتي الاخري ...

ف ليل مانرقد من الخوف ايامات الضرب وبعد قرب قعدنا نا وخالتي وكنتها وبنتها وبنية كنتها عمرها سنة نرقدوا ف المربوعه طبعا لو جا صارووخ مايمسحنش لان باقي الديار يطلن ع الشاؤع هههه اما المربوعه متركنه جايه في الجهه اللي لاصقة ف الحوش لي جنبهم...
وفوق في شقة .. مانبوش نتفتفتوا ع اساس من الصواريخ شوفي التفكير لعند وين وصل ...

والله في جيران قعدوا يونسوا ف بعضهم ف وقت الدق القوي يباتوا مع بعض...

...في موقف برضه متاع الناتوو اول ماضرب صواريخ التوماهووك نحن بم ان قريبين من البحر خطمن من فوقنا
والله صوتهن لتوا ما ننساه لدررجة حسينا الحووووش كانه قدم ووخر طبعا مانحسابوش الناتو بدا يضرب لان الضي منقطع 3 ايااام لعند ماجا ولد خالتي وقالنا الاخبار بصراااحة انفجعنا نحسابوهم دزولنا شئ حاجة غريبة

ف لحظة متاع الحوش لي قتلك قدم ووخر انصدمنا ومعش عرفنا شئ اصلا اشوي ومافقدنا الوعي كلنا خخخخخخخ جت كنة خالتي اضبطتني وخالتي بنتها حضنتها والبنية الصغيره اول مرة تخاف وبطت بقوة
وراجل خالتي وجهه انزرق

توقعنا اشوية والحوش يطيح علينا

dr.loly · 08-13-2013, 03:00 AM

يتبـــــــــــــــــــــع

جوهرة ليبيا · 08-13-2013, 03:06 AM

السلام عليكم ورحمه الله وبركاته

هدية الخالق · 08-13-2013, 03:13 AM

اهلين ام فراس الله يأنسك حبيبتي وربي يحفظلك بنيتك
أني بنتي جبتها في نهاية اتنين تقريبا معناها قولي عمرها خمسة شهور ونص

جوهرة ليبيا · 08-13-2013, 03:27 AM

اهلا وسهلا بهديه كيف حالك وشن اخبارك آنستينا وشرفتينا واعتبري نفسك وحده منا وفينا

كلنا وخيات هني وعلي قلب واحد

ربي يحفظلك الاموره بنوتك

شن اسمها ممكن يصير خنبه في الاسماء هههههه انا طرابلسيه وعندي بنوته اسمها ريناد وحامل ببنوته في بدايه السابع ان شاء الله

وانا اكبر منك بسنتين مواليد التسعين ومتزوجه من 3سنين و4شهور وايام بالضبط ههههه

طبعا اتحمليني لاني نعتبر اكتر وحده دوتها هلللللبه

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
دردشة بنات ليبيا , دردشة حوامل ليبيا , تجمع بنات ليبيا	ايلاف	إستفسارات حوامل من الشهر السابع إلى الشهر التاسع	3567	06-15-2013 12:57 PM
دردشة بنات ليبيا , دردشة حوامل ليبيا , تجمع بنات ليبيا	سماسم	إستفسارات حوامل من الشهر السابع إلى الشهر التاسع	24082	03-27-2013 08:08 PM
تفضلو حبيباتي	ريحانة المصطفى	منتدى أعراض الحمل والوحام	0	12-06-2012 10:41 AM
مهم لكل عضوات قسم الحوامل الغاليات.. تفضلو حبيباتي ..	xRano0x	منتدى أعراض الحمل والوحام	121	08-23-2011 01:48 PM
رسالة إلى سيدات ليبيا	أم رهوفة	ملتقى عضوات حوامل	6	01-11-2011 12:56 AM