ديوانية البحرين - دردشة حوامل البحرين - البحرينيات

فلونة · 07-23-2011, 06:24 PM

ما شاء الله من متى صارت ديوانيتنا جذي .. ليش هالجفاء؟؟؟؟
لا تقطعون صلة التواصل بيناا ابدن ومهما يصيرر حركوا اصابعكم وكتبوا رد يطمنا عليكم وعلى احوالكم ..... معذوررين ويا مشاغل الدنيا بس توحشنا طلاتكم كتير كتيرر

توقعت ادش واجوف صفحات عقب ردي بس على قولة احلاامي صاروا البنات يدشوون ومايكتبون شي الا لين تدخل طفلوووو وتعطيهم قرين لايت
تعالي يمة كتبي اي شي وخلي البنات يتحفوونه بردودهم

ماظن ردي يحرك ساااكن ولكن لا تقطعونه جذي لانه حلات الديوانية بتواجدكم فيهاا و رووح الديوانية تكون بسوالفنه وضحكاتنا واتمنى من البنات ما يبخلون بدقايق من وقتهم علينااا .... القاااكم على خير وسلاااام أحبتي

حنين للماضي · 07-23-2011, 06:56 PM

السلام عليكم
شخباركم
صار لي جم من يوم مااقعد على النت كلش
كله مزحومة ومافي وقت
قلت ادش الحين اطمن عليكم على السريع

ام علي ماعليه شر حمود شخباره الحين؟؟

روز سول اني بعد ولدي من يوم صغير من يرضع من صدري اليسار يطلع اصوات
ماادري ليش حتى تمللت من محاضرات عمتي اقول لها هو جدي تقول لا يمكن بلاعيمه يمكن صدره ووو.....هههههههه ما صار هذا اول حفيد

فلونة غبتي واااجد هالمرة
شخلار نور الصغيرة؟؟؟

فتوت طعمتي لولو؟؟؟؟
اني تطعيمه يوم الثلاثاء والله يستر

طفطف شخبارها الحلوة من عقب التطعيم؟؟؟

اروى افا عليش حبيبتي حددي اي يوم يناسبش قبل شهر الله وتعالي بسوي ليش ولا اجيبين معاش شيء غير دبتش
لاتستحين حبيبتي ترى البيت بيتش وزوجي يكون مو في البيت الظهر

مس توته طمنينا عنش حبيبتي
الله يواليش العافية ان شاءالله

وياقي البنات الله يرزقكم الذرية الصالحة بحق هذا الشهر الفضيل

ام فتومة وام السادة وام خلي وحزون وام بنين وام حسين وباقي الشعب شخباركم

الليلة يازعم بلف سمبوسة ان شاءالله بس علوان يصخ عشان افتك من اللفاف

فلونة · 07-23-2011, 07:17 PM

اخيرررررن حنووووون نووورتي :d
اي انا هالمرة طولت غيبتي شسوي اعتب على البنات ما يدشوون وانا ترررى اول وحدة ماطل عليكم
وبدأت تجهيززاتكم حق شهر الله وان شاء الله يكون هلال هالشهر خير على الجمييييع
شهيتيني على سمبوسة جبن وذرة ..

يالله يقولون اول الغيث قطرة وننطر الباقي

ام حسين الدار · 07-23-2011, 07:21 PM

فديت اهل البحرين والله
اخباركم وش هل قطيعه ياحافظ ابد لاحس ولاخبر
اتمنى الجميع ابخير
فلونه نورتي ياعمري
والله اسهل ويرزق كل من له حاجه
دعواتكم قربت ولدتي باقي 3اسابيع ويارررب اقل
من اصدق سبحان الله عرفتكم واني في شهر3وبسوي عمليه وخايفه وعن جد وقفتو معاي وقفه ماانسها يااحلى واغلى خوات على قلبي
اشوفكم على خير ان شالله

طفلي حياتي · 07-23-2011, 10:39 PM

السلام عليكم
شخباركم؟ عساكم بخير يارب
فلونه مابغيتين !!! شخبارش وشخبار النور
ام علوان كل شوي اقول بتصل وانسى مالي حل
بنات مادري وش فيني هالجم يوم كله ضيقه في صدري وقلق لايوصف وتعبانه نفسيا واااااااااااااايد بطريقه مو طبيعيه مادري وشفيني دعواتكم لي بالفرج
اللهم صل على محمد وآل محمد وعجل فرجهم وفرجنا يهم ياكريم

أجييين · 07-23-2011, 10:48 PM

سلامتج طفلي حياتي هو اكو احد هالايام مرتاح ادا مو من برا من داخل الله يسلمج الله يفرج عليج وعلينا كلنا يارب ويجي شهر رمضان بخيره على الجميع بحق صاحب الزمان عجل الله فرجه

سوهان · 07-23-2011, 10:51 PM

السلاام عليكم

شخباركم ياحلوين

عساكم بخير؟

الله يفرج عنكم جميع ان شاء الله

طفطوف وحنين وفلونه وأم علي شخباركم حبيباتي

من زمان عنكم

الحمل هذا تاعبني كثيييييييير وكارهه كل شي

>>>> زين بعد ماكرهتكم خخخ

الله يخلي لكم عيالكم ويرزق المنتظرات للحمل في القريب العااااجل ياااارب

اتمنى اشوفكم بخير

لاتنسوني من الدعااء

أجييين · 07-23-2011, 10:51 PM

بنات حوامل ابي اسالكم ادا عنكم خبرة مغلي الشعير او ماء جوز الهند او البابونج او شاي التمر الهندي امنين اثناء الحمل يعني عادي تششربهم الحامل او لا؟؟؟
لان انه اشربهم الحين لانهم مفيدين للالتهاب البول والضغط العالي وخايفه اني احمل وانه مستمرة عليهم وانه ماادري ياريت الي عندها خبرة او معلومه تفيدنا وتسلمو

أحلام أم · 07-23-2011, 11:14 PM

السلام عليكم
هلا والله بأخوات الروح
فلونة
وحشتينه ووحشتنه أخبارش
وحنين للماضي أم علاااوي
ألحين كأني بش تلفينه السمبوسة ورجولش تهز كرسي علاوي ،الحمدلله خيو على كل حال
وأم حسين الدار
ربي يقومش بالسلامة وتراوينه صور حسون
وفتوت
تسلميين أم آلاء ربي يحفظ لش آلاء
وآجييين
هلا ومرحبا ربي يرزقش الحمل وحالتش تشبه حالتي مع إلتهاب الأبوال المزمن إللي مايفارقني ودائما مرتفع ومافي مضاد حيوي يروحه مني ولاشي أني ماء جوز الهند يألم كليتي عدل ،أني لأنه مسوية عملية كلى مفتوحه 3 مرات الله لايعود الشروطول حملي أبر وأدوية ومضادات وسيلانات
ميعاد
الله يعوضش خيو بالحمل التام يمكن تحتاجين ربط
وطفلي حياتي
ماعليش شر خيو ضيقة الخلق مي مخليه أحد في حاله

ربي ييسر أموركم ويبعد الشر والضر عنكم أشوفكم على خير

أجييين · 07-23-2011, 11:48 PM

تسلمين احلام ام والله يعطيج العافيه اني عندي مشكله بالكليتين عندي ضمور في الكل اليمين وتكيس عل الكلتين والتهاب مزمن والله كريم اشافيني واشافي كل المرضى يارب

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
توزيعات وهدايا وستاندات _ في البحرين	بنت البحرين	منتدى السوق التجاري	4	10-07-2010 11:45 PM
ديوانية حوامل البحرين	أم _ أحمد	إستفسارات حوامل من الشهر السابع إلى الشهر التاسع	3129	09-19-2010 11:26 PM
نداء الى حوامل البحرين	اشراع الهوى	إستفسارات حوامل من الشهر السابع إلى الشهر التاسع	0	06-18-2010 12:47 AM
ام البدرين الله يعطيك العافيه	عاشقة طيور الجنه	منتدى علاج العقم و تأخر الحمل	9	06-13-2010 04:37 PM
عين عذاري ( اهل البحرين )	الشوق عطري	المـنـتـدى الـعـام	2	08-18-2009 12:16 AM