تجمع حــوامل التوائم

[ميمي الاموره]

السلام عليكم
ابشركم نتوفتي امس طلعت من المستشفى وطلع فيها ارتجاع مريئ
بس يقولون انتبهواااااا عليها مررره خل عينكم عليها لان محتمل وهي نايمه تشرق
سووا لها تحاليل وفحوصات
مافي تحليل ولا اشعه ولاشي بالدنيا الا سووه والفحوصات الحمدلله سليمه
بس كنت عايشه الفتره اللي فاتت بقلق ونفسيه مررره شينه والحمدلله طلعت بنتي سليمه وتنومت بالعنايه ثلاث ايام وكانوا يعطونها مضادات بهالفتره وصرفوا لها حليب خاص
واخوها الله يصلحه مجنني مايرضع ابد من صدري وهي بعد المستشفى صارت مثله
ماادري ايش اسوي معهم تعبت والله خايفه تقل عندهم المناعه من هالسبب
سويت كل اللي اقدر عليه اصبر عليهم يحطونه بفمهم ويجلسون مايرضعون تقولي امي يمكنهم حنكهم توه ماتقوى لانهم توهم ماكملوا التاسع يعتبرون خدج
بس والله ضايق صدري ودي يرضعون مررره
ماادري شالحل
وسوسو الرضاعه العاديه بعد يطووول وهو يرضع ماادري وش فيه
الله يصلحهم

نجي لرد على الردود..
توامي..
ميمي
والله قلقت يوم قريت الكلام ان شاالله ماعليها إلا العافيه
الله يحفظها ويسلمها من كل شر وتفرحين فيها يارب
بس انتي طمنينا عليها

الحمدلله على كل حال يارب الله يخليهم لي ويصلحهم

نـــارا..
ما تشوف شر ننوفتج.. ربي يقومها بالسلامة وإن شاء الله ما عليها إلا العافية.. طمنينا عليها بليز

الله يسلمك ياقلبي

رنده ..
يا حبيبتي ما تخافي انشالله خير توكلي على الله بس ونحنا كلنا بندعيلك انها تكون بنتك سالمة يارب

مشكوووره على الدعوات

ملاذ الطي..
ميمي حبيبتي الله يقوم بنتك بالسلامه و تفرحينىفيها فيها عروس ياقادر ياكريم
بس انتي و لدتي باي اسبوع

اميييييين
والله ماادري ياقلبي بس مااخذت من التاسع الا اقل من اسبوع يمكن 5 ايام

البرنسيسه ..
ميمي فديتج انتي ماقريتي على ولدج وبنتج,,
ياختي انتبهي والله عيوووووون الناس ماترحم,,,
وسلامة ياسر والله يشفي لج نووووووف وتطلع بالسلامة انشالله,,,,
ميمي طمنينا ع تحليل نووووووووف

والله قاريه عليهم من وانا بالمستشفى بس اعوذ بالله عيون الناس كانها ماشافت خير
والحمدلله التحاليل كويسه وسليمه

ام البنين..
ألف مبروك .. ميمي تتربى في عزك وعز ابوهم جعلهم الله من عبااده الصالحين
والله قلقنا عليك بس الحمد لله على سلامتك وربي يخليهم لك ان شاء الله00
والم العمليه طبيعي لابد منه اجر وعااافيه ياااااااااااااارب
سلامت نوف ماتشوف شران شاء الله تكفين عوذيهم كل شوي وسمي عليهم الله يحفضهم من كل شر طمنينا عليها تكفين

الفال لكم ان شاء الله
امين يارب
والله انا اقراء وامي ابوهم وجدهم كل ماحد يفضى يقرا عليهم

نواعم النعومه..
ميمي حمد لله على سلامتك وعلى البركه الحلوين
يارب يطمنك على نوف بالسلامه ياقادر ياكريم وتفرحين فيها وباخوها .......امين
وافرح انا ولك وحده حامل بضنااااااها امين يارب

عقبالك ياقلبي الحمدلله نوف اللحين طيبه

كوثريه..
ميمي ألف ألف ألف ألف مبروك الولادة والحمد لله على سلامتج
فرحت لج من كل قلبي
بس تأذيت من دريت أنها عملية
بس انتبهي زين زين للعملية ولا تتحركين واجد عشان لا تلتهب زي حلاتي
وسلامة نووفة ما تشوف شر والله يطمنج عليها قريب غير بعيد ان شاء الله
ولا تخافين عليها ترى مشاكل الأطفال حديثي الولادة كثيرة وأغلبها تنحل بسرعة
أنا بنتي قبل يومين اتصلوا علينا قالوا نسمع صوت في قلبها وضاقت بي الدنيا وظليت مدة وااجمة ولا أتكلم بس أفكر فيها
بعدين جا الأخصائي قال عندها ثقوب صغيرة بالقلب بس مو مخيفة نوعيتها بسرعة تقفل لوحدها إذا استعملوا الها الدواء >> ادعوا لفطومتي حبيبتي
قولي الحمد لله يا ميمي أنا إلى الآن بناتي في الشيشة وفطومة ولامرة مسكتها، مرات إذا أتذكرها أقعد أصيح الحالي

اهلا بالزعيمه الله يبارك فيك عقبال مانبارك لك بطلعة العرايس بناتك ياعمري انتي تراني خطبت وحده لسوسو ولدي من اللحين اقولك
اي والله عمليه ياشينها والله مافي بالي الا انتي واشوا اخذت نفسك نصفي ذكرت كلامك يوم قلتي احسن وسويتها مثلك الله يعافيك ويعافي بناتك
ان شاء الله بانتبه لنفسي امس فكيت الكبس واليوم احس بالمه يعورني مكان الكبس
ياعمري انتي حاسه بشعورك والله يوم جيت اشوف ياسر اول مررره وانا بالمستشفى عورني قلبي الاطفال اشكالهم تحزن وصرت احمد ربي عالنعمه
وولدي معهم حتى اني جلست شوي عند ولدي وقلت لزوجي خلاص طلعني لغرفتي معاد اقدر من ضيقت الخلق
تدرين ماهداء بالي الا اليوم ولا الايام اللي فاتت كله ابكي على توامي لايجيهم شي بسم الله عليهم

متلهفه لحظوركم..
يارب تشفي بنت ميمي ياااارب والله ضاق صدر عليهااا الله يطمنكم عليها لاتنسين ياميمي الاذكار والرقية الشرعية شغليهااا دايما شوفي عندك في tv quran فيه رقية مره حلوه والله يحفظهم ويحفظ بنات كوثرية يارب...
ويفرحنا جمعيا بأجنتنا سليمين كاملين معافين ...

ان شاء الله ياعمري ومشكوووره على الدعوات الحلوه

حنان الهاجري..
يالله ربي يعافي بنتج ميمي يا رب
بس بسالج كيف القيصريه اثرت على بنتج؟

امييين
لا مااثرت هذي مشاكل خدج

خوخه..
ميمي الله يقوم بنتك يالسلامه يارب

امييين مشكوووره حبيبتي

لمياء..
ميمي الله يقوم بنتك بالسلامه
وماتشوف شر
حصنيهم كل صباح ومساء ولاتنسين ابد
انا سمعت مقوله ماادري هل هي صحيحه او لا
اول مايطلع الطفل من بطنك وتشوفينه وقبل مايغسلونه
حصنيه قولي اعيذك بكلمات الله التامه من كل شيطان وهامه ومن كل عين لامه
تحفظه طول العمر
انا اسويها اول مااولد بس مو مقتنعه ان هذي تكفيه طول العمر
بس بارادة الله ماانسى اني احصنهم صباح ومساء
وهو طفل واحد فما بالك بطفلين
الله يحفظ ياسر ونوف وتوأم كوثريه
وكل توأم حبيباتي فهالتجمع

ليتك قلتي لي هالكلام قبل لا اولد اللحين امي تحصنهم كل صباح ومغرب وانا اذا كنت ارضعهم اقرى عليهم

حزن..
ميمي شكلها عين صادتك اذكري الله عليهم وداومي على القرآن والله يشافيها يارب ...

الله العالم مااقول الا استودعنا انفسنا الله

نونه..
ميمي الله يطمنج على بنيتج والله هذي عين وماصلت على النبي

الله يكفينا شر الحاقدين والحاسدين والشياطين

شازل..
الأخت ميمي ... أسعدك الله بوجدود طفليك بصحة وعافية ...
لا بأس طهور إن شاء الله ، الله يكتب لبنتك الصحة والعافية بس دايم أرقيهم حتى لو كانوا عندك أو بعيد عنك ، ترى المولود يجنن من يوم ولادته فما بالك عن التوأم ، الله يرد لك بنتك بصحة وعافية ... خبرينا وش صار عليها شغلتي بالنا عليها نحس فيك ونحس بدموعك بس ما بيديننا إلا الدعاء ... وربي ما يخيب الظن ولا يرد الدعاء ...

الله يعافيك مشكوووره اختي شازل
الحمدلله على كل حال والله دمعتي ماوقفت من ولدتهم لين طلعت نتوفتي من المستشفى

توامي..
ميمـــي
طمنينا عليك وعلى نوف
وحصني بيبياتك واقري عليهم اكيد الناس الحين بدأوا يسمعون انهم توأم
اول ماكانوا يدرون لكن الحين صعب يتخبى الخبر
عشان كذا داومي ع الاذكار وحصني نفسك انتي برضو
ولاتطلعينهم قدام احد أبــــــــــداً
والله قلقانه مرة على ميمي ودي تطمنا على بنتها يارب تكون بخير..

اسكتي الكل منجن لاني بكر وتوام وناس من سنين ماكلمونا دقوا يباركون ويستفسرون كيف ومتى وشلون هي تاخذ منشطات
لا الحمدلله بنتي طيبه وتوها معصبه علي ليش ابوسها وهي نايمه خربت نومتها عليها

[أستاذة ذوق]

اهلين اهلين ميمي
والله فرحت مره بردك طمنتينا طول الوقت افكر في بنتك وادعيلها
الحمدلله ع سلامتها بس كيف ارتجاع بالمريء يعني المريء صغير صح؟

عموما الحمدلله ان الفحوصات كلها سليمه
وانتبهي من الناس طنشوهم ولاتردون عليهم والله ينخاف من عيون الناس

[احمر الورد]

الف الف الحمد لله على السلامه والله يخليها لك وتشوفينهم عرسان يارب
توامي مافهمتي حبيبتي كل شهر اربعه اسابيع موثمانيه فهمتي

[أستاذة ذوق]

احمر الورد
اهاااااا يمكن صح 4 اسابيع بس انا حسيت السابع طويييييل وثقيل مدري ليه

[لمياء]

هلا بك ميمي

والله استانست لمن لقيتك متواجده

الحمد لله على سلامة نوف والله يخليهم لك ويقر عينك بشوفتهم طيبيين ومتعافين

[لمياء]

المشاركة الأصلية كتبت بواسطة نورة نايف

اتمنى من بكره الحماس يرجع لكم يالغاليات انا عندي موعد كل اثنين عشان تثبيت الاجنه لمدة شهر فيه وحده خذت تثبيت من السادس

الله ييسر لك نوره ويثبت حملك وتفرحين بشوفة البيبيات

بعد ماترجعين من موعدك طمنينا عليك

[ميمي الاموره]

قصة ولادتي لعيون توامي

بعد ماسكرت من المنتدى طلعت ارتب اغراضي والاشياء اللي احتاجها طبعا شنطة الولاده ببيت اهلي وبتجي مع امي بس هذي احتياجات للعمليه اوراق وخرابيط وفلوس ورتبت بيتي ودقيت على زوجي وقلت له اني دقيت على المستشفى ولقيت سرير جاني ورحنا للمستشفى ودخلت لتنويم اول ماجيت لبسوني اسوارتين عشان توامي وفيها ارقام لكل واحد رقم
بعدين قاسوا وزني وطولي وسوو لي تحليل دم
وطلبوا اثنين يسوون تبرع بالدم عشان لاقدر الله لو احتجت دم بالولاده
وبعدها ودوني لغرفتي ومعي زوجي وامي قلنا نبي مرافق رفضوا وقالوا لا مومسموح
الا باذن الطبيب وركبولي جهاز قياس الطلق ياشينه يخووف مدري يمكن لاني انا خايفه احسه يخوف وقاسوا ضغطي وحرارتي وترا على فكره الصباح كان الدكتور معطيني ابره ماادري وشو بس يقول هذي للاجنه مو لك عطاني اياها الساعه 11 ونص وقالي اذا تنومتي خلي الممرضه تعطيك اياها الساعه 11ونص بالليل واخدتها بنفس الوقت اللي قاله الدكتور وركبوا ابرة المغذي بيدي وقالوا لي صيام من الساعه 12 حتى عن المويه بعد شوي جاني دكتور البنج وجلس يسالني ايش افضل كامل ولانصفي وذكرت كلام كوثريه انها تمدح النصفي قلت ابي نصفي شجعني وقالي عن ايجابيات النصفي وسلبيات الكامل وعطوني حبه عشان الحموضه وقالوا صومي عليها راحت امي وزوجي بهذيك اللحظه حسيت انهم تركوني بسجن ابو غريب وراحوا عني جلست اقرا قران واذكر الله الين جت الساعه 7 الصباح من الخوف ماقدرت انام جوني قالوا لي عمليتك الساعه 8 بهاللحظه وقف قلبي فرحانه وخايفه ومتوتره مشاعر مظطربه وقالوا لازم تتروشين وتلبسين لبس العمليه تروشت مع اني كنت متروشه قبل لا اجي ولبسوني شراب عشان التجلطات وركبوا المغذي
دقيت على اهلي وجوني الا زوجي ناااايم بالعسل ماجاني الا 9 اشوا ان العمليه تاجلت الى الساعه 12 ولا كان ذبحته
يوم جت الساعه 11 قاسوا ضغطي وحرارتي مره ثانيه وركبوا قياس الطلق وشوي وركبوا لي قسطرة البول ياحياتي ياامي وهم ماخذيني بالسرير امي معاهم تركض يالبى قلبها ودي اقول ركبوها بدالي ماتقدر على هالركض بعدها اخذوني لتحت عند غرفة العمليات عشان يجهزوني بنفس الغرفه ركبوا اجهزة قياس القلب والتنفس وثبتوا يدي وطهروا مكان الجرح وركبوا لي الاكسجين جاء دكتور البنج اول شي ضربوني ابره بنج عشان يضربوني ابره الظهر بعدها ضربوا ابرة الظهر والله انها مولمه شوي بعدها حسيت ان جسمي كله تخدره من الصدر الييييييين اطراف اصابعي معاد احس ولا اقدر احرك شي ابد
بدات العمليه وقلبي ضرب طبووول من الفرحه والخوف والرهبه بعد شوي اسمع صوت عصفورتي نتوفه وشوي بعد اسمع صوت سوسو يالبى قلبهم قلت وش طلعوا بنات ولا ولد وبنت قالوا انتي وش تتوقعين قلت مدري بس الدكتور يقولي واحد بنت والثاني مو مبين قالواماعليك من الدكتور انتي شتتوقعين قلت احساسي بنت وولد بس الناس يقولون بنات قالوا لا احساسك صح بنت وولد قلت طيب ابي اشوفهم قالوا طيب بس ينظفونهم
شوي وجابوهم لي وبست نتوفه وسوسو واخذوهم مني وودهم للحضانه وودوا ياسر للعنايه عشانه كان تعبان بس وانا بغرفة العمليه ماقالوا لي شي قالوا انهم سليمين
بهذيك اللحظه يوم تطمنت على عيالي اني شفتهم جاني نوووووم موطبيعي ابي انام مررره بس ماقدر قالي دكتور البنج نعطيك منوم قلت لا بشوف فرحة اهلي
وطلعوني غرفة النقاهه
دخلت امي علي وجلست تبكي ياحبيبتي سالتها عن عيالي قالت طيبين بس الله يقومك بالسلامه وكانت عارفه ان ياسر بالعنايه
بعد ساعه رجعوني لغرفتي وجابوا نتوفه عندي وركبوا لي جهاز التجلطات زي الدفايه برجلي وبدات بعدها معاناة الالم يوم خف البنج وبس

وتراني دعيت لكل اللي بالتجمع ان ربي يهون عليهم ولادتهم ويقر عينهم بشوفة توامهم وانا بغرفة العمليات
وانتهت الحتوته

[ميمي الاموره]

توامي احمر الورد ولمياء
مشكووووووورين حبايبي
اسمحووا لي على التاخير بالرد ودعواتكم ربي يحفظ لي توامي

[احمر الورد]

ميمي الله يحفظهم ويحميهم ويقرعينك فيهم استودعيهم الله الله مايضيع وداعته

[شازل]

السلام عليكم ورحمة الله وبركاته ... وبعد :
أهليييييييييين حوامل التوأم ... الله يحفظهم لنا ويبارك باعمارهم ويسعدهم وعن كل شر يبعدهم ...
نورة ... أنار الله حياتك وقبرك ...
كنت مستانسة مع موضيعك أقراهم وبعضهن بعد الولادة إن شاء الله أرجعهن - حشى صارت مذاكرة - ، شو أخبارك ووشلون الحمل وإياك ، أنت كنت عاملة قبل سنة قيصرية ، كيف العملية معك هالحين توجعك أو لا أنا برضو قبل سنة عملت قيصرية وبسبب ظروف لم استطع العناية بنفسي من ناحية الأكل والشرب وأمس كان مكان العملية يوجعني خاصة إذا لمسته مرة قلقت عليه ...

الأخت توأمي ... رزقك الله توأ بصحة وعافية من غير زيادة أو نقصان ...
يالله هانت ما بقي لك إلا القليل ، يعني تعديتي مرحلة الخطر الأكبر وهالحين أنتي بالثامن ، بس إرتاحي كثير واعتزلي جميع أنواع الأعمال المنزلية ، علشان يعدي الشهر بخير وتولدين بالتاسع وعيالك يطلعون معك ، أنا بعدكثير أحس برأسهم تحت بس أنا العملية بي بي لأني عندي قيصريتين قبلها ووحدة قبل سنة ، بس الحمد لله على كل حال ربي ما يكتب إلا اللي فيه خير ... دعواتنا معك عليك وأم البنين الدور ...

الأخت حنان ... زادك الله حنان وودا ...
أنتي في أي اسبوع وأي شهر ، وكيفك مع الحمل ...

البرنسيسة ... حفظك الله من كل مكروه ...
أنتي قبلي باسبوع تقريبن ، كيف إحساسك في هالمرحلة من الحمل ... وهل تحسين بتعب وثقل ، وشو الأدوية اللي تستخدمينها ، و جنسهم بنيات صح وش تبي تسمينهن ...

الأخت ميمي ... جعلك الله دائما سعيدة ...
الحمد لله على سلامة نوف الله يسعدك وأياهم وتشوفينهم عرسان بس نصيحة لا تطلعينهم جميع عند الناس دائم واحد والثاني خليه داخل ... - وهاذا يعقوب عليه السلام قال لعياله لا يدخلون على الناس من باب واحد خوف من العين - الناس تضرب بالعين ولا تحس ودائما إرقي أولادك توهم صغيرين ودائم خلي أهلك بعد الصلاة ينفخون عليهم لأنهم أكيد دعوا وتعوذوا فبإذن الله ما تصيبهم عين ...