ديوانية البحرين - دردشة حوامل البحرين - البحرينيات

بنوتة حلوة · 03-09-2011, 01:43 AM

شكله بدا الطلق مال هالليلة نفس البارحة هالحزة ولا يندرى .. كل شي يتيبس جدي الظهر والبطن جنه في شي بينفجر .. جنه رابطين حزام بالزووور على كل شي .. عدل ؟

Roze · 03-09-2011, 06:29 AM

صباح الخير

بنوته هدي الولاده حبيبتي
ومعروف ان طلق البنية يمهل وبارد ويطول عشان جدي الالم يروح ويرجع بلا فايده
حاولي تقرين ادعيه وتصلين علا النبي وان شاءالله يصير لش تيسير من رب العالمين وتولدين اليوم

أحلام أم · 03-09-2011, 07:10 AM

صباااااااح الخير والأنوار على قلوبكم النيرة
ياربي لوع جبدي النت نص ساعه وأني أحاول إنه يكون في إشارة نت مافيي فايدة خفت إنقطع النت يااربي تأمن قلوبنه
ويش خبر بنات كله نوم أم الأحلام قاعده من فير والولد هيكو يطالع رسوم يااربي مته تييه النومة من قعدوا أخوته للمدرسة صحصح وتريق وياهم ناقص يلبس وأفلته في أذنات روضه على عمري
بس ألحيين بافر راسة بكم قصة من عالم اللشلخ وهو متخذر خخخخخ ياربي تضبط خطتي إهيء إهيء

حنين للماضي · 03-09-2011, 11:09 AM

صباحو يا الحلوين
طبعاً البارحة علاوي كان ولد جداً سيء من احطه على سريره يزن ومن مجرد احمله بدون هزه ولا شيء ينام
يا علي على دلاعة هالجيل بس

بنوتة ربي يسر ولادتش وان شاءالله تقومين بالسلامة\
هذه بوادر الولادة ان شاءالله

ام خليل حطيت حليب في خشمه لأان كان مصكوك من الوصخ كان مزكم
صدق شنو يعني داهية وااجد تقولونها
انتي في وين تشتغلين؟؟

ها احلام ام بشري ضبطت خطتش

اكو يصيح ابو الشباب بقوم له

أحلام أم · 03-09-2011, 12:04 PM

هلا ومرحبا بحنين للماضي
اليهال في هالعمر بسرعه يتعوذون يبون تحطينهم على اللرجول ويرتاحون لريحة الام ويحسوون بالحنان في حضنها ومن جدية ينامون بسرعة في حضن الأم ،هههههه كلهم جدية مهما حاولتين تعوذينه على سريرة يظل يفضل حضن الأم وأنفاس الغاليه وريحته ولاتنسين إنه ظل في بطنش 9 شهور فهو متعوذ على صوتش وريحتش ودقات قلبش فيضل في حنين للصاق فيش
ربي يخليه ويحفظه وشوي شوي بحس بالأمان بعد في سريرة ولو أن الأطفال يفضلوون ينامون تحت الأم
كلمة (داهيه) كلمة درازية تعلمنه نقولها من وحنه صغار وهي تعبير عن فداحة الشيء وعظمته وصار
تسألين عن خطتي نجحت لكن مته يوم صارت الساعه 9ذبحني أني غفت عيوني وهو يهدر ويحوس ويقوم ويقعد وتالي ياب تحته ولده ونيمة على فراش صوبه وغطاه وياه وحمقت علية وخوفته وتالي أخيرا نام قعدت من شوي أتسحلب عن لايقعد من رحت الصاله إلا هو ورايي ههههههه وألحيين بدت عنده تجميع السياكل من كل البيت في الصاله الله يهديه

Um Amal · 03-09-2011, 01:07 PM

مــرحبا بالجميــع ..
كيف الحال ؟؟
"حنين للماضي..ما شاء الله ولدش خفيف دم .. الله يحفظه"

Um Amal · 03-09-2011, 02:20 PM

بنات ..
بغيت اقولكم عن مشكلة ولدي .. يمكن الاقي الحل عندكم وخصوصا اهل الخبرة اللي سبق لهم التربية ..
ولدي وياه إمساك .. ولا يمشيه بطنه الا بالتحميلات الا عطوني اياها .. واحترت ناس يقولون لي اعطيه صناعي بالاضافي للطبيعي وناس يقولون يسبب الامساك ..

مع اني ما اعطيه الا رضعه وقت النوم لان احسه ما يشبع بالطبيعي بس ..
وجربت وياه ماي الحلوة ومرقدوش وكلشي نفس الشي .. وقالت لي الدكتورة احط له تمره يلحسها وبعد نفس الشي ..
واخر شي قالت لي ادا ما فاد وياه شي بحولش على دكتور جهاز هضمي ..
واني كلش خايفة عليه واحاتيه ..
إدعوا له ...

حنين للماضي · 03-09-2011, 03:10 PM

اقتباس:

المشاركة الأصلية كتبت بواسطة um amal

بنات ..
بغيت اقولكم عن مشكلة ولدي .. يمكن الاقي الحل عندكم وخصوصا اهل الخبرة اللي سبق لهم التربية ..
ولدي وياه إمساك .. ولا يمشيه بطنه الا بالتحميلات الا عطوني اياها .. واحترت ناس يقولون لي اعطيه صناعي بالاضافي للطبيعي وناس يقولون يسبب الامساك ..

مع اني ما اعطيه الا رضعه وقت النوم لان احسه ما يشبع بالطبيعي بس ..
وجربت وياه ماي الحلوة ومرقدوش وكلشي نفس الشي .. وقالت لي الدكتورة احط له تمره يلحسها وبعد نفس الشي ..
واخر شي قالت لي ادا ما فاد وياه شي بحولش على دكتور جهاز هضمي ..
واني كلش خايفة عليه واحاتيه ..
إدعوا له ...

هلا والله بأم موسى
وينه انتي الله هداش صرنه مانجوفش خير شر
ويه على عمري ميمي
انتي اشدراش مايشبع من عندش
اكيد من حليب الصناعي ماناسبه
صديقتي بعد نفسش
المشكلة هم صغار حدهم ومو لي نوعية تناسبهم
انتي تركي حليب الصناعي ورضعي من عندش احسن حبيبتي
الردي انتي شكلش ماتشتغلين يعني طول اليوم وياش
عقب اذا كبر شوي صار اربعة اشهر جدي عقب عودي على الصناعي بتكون مناعته اقوى لداك الوقت

ومشكورة حبيبتي عيونش الحلوة
يلا حطي لنا بعد صور كتكوتش

حنين للماضي · 03-09-2011, 03:14 PM

اقتباس:

المشاركة الأصلية كتبت بواسطة أحلام أم

هلا ومرحبا بحنين للماضي
اليهال في هالعمر بسرعه يتعوذون يبون تحطينهم على اللرجول ويرتاحون لريحة الام ويحسوون بالحنان في حضنها ومن جدية ينامون بسرعة في حضن الأم ،هههههه كلهم جدية مهما حاولتين تعوذينه على سريرة يظل يفضل حضن الأم وأنفاس الغاليه وريحته ولاتنسين إنه ظل في بطنش 9 شهور فهو متعوذ على صوتش وريحتش ودقات قلبش فيضل في حنين للصاق فيش
ربي يخليه ويحفظه وشوي شوي بحس بالأمان بعد في سريرة ولو أن الأطفال يفضلوون ينامون تحت الأم
كلمة (داهيه) كلمة درازية تعلمنه نقولها من وحنه صغار وهي تعبير عن فداحة الشيء وعظمته وصار
تسألين عن خطتي نجحت لكن مته يوم صارت الساعه 9ذبحني أني غفت عيوني وهو يهدر ويحوس ويقوم ويقعد وتالي ياب تحته ولده ونيمة على فراش صوبه وغطاه وياه وحمقت علية وخوفته وتالي أخيرا نام قعدت من شوي أتسحلب عن لايقعد من رحت الصاله إلا هو ورايي ههههههه وألحيين بدت عنده تجميع السياكل من كل البيت في الصاله الله يهديه

ههههههههههههه
هالحمود مو سهل حده

اتخيله طول اليوم وراش وراش

الله يخلي ليش ان شاءالله كلهم جدي ماينامون اله عقب ماينيمون الديرة كلها

واني اتغدى قلبي في يدي اخاف يقعد نفس كل يوم وعقب اروح آكل الغدى بارد
عاد اليوم سويت لي سمك مقلي ماينأكل بارد اشوه توني اقول الحمدلله بشيل الصينية اله هو قعد
الحين قاعد يطالع سفنج بوب

طفلي حياتي · 03-09-2011, 04:01 PM

السلام عليكم
شخباركم جميعا
البارحه ياني المممممممم مال الدوره وكسرني تكسر ومت من الخوف قلت ياعلي مابغي اولد الحين خل نصره تستوي عدل هههههههه ولا نمت غفت عيوني 6 وكل نص ساعه افز من نومي واخر شي قمت :(

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
توزيعات وهدايا وستاندات _ في البحرين	بنت البحرين	منتدى السوق التجاري	4	10-07-2010 11:45 PM
ديوانية حوامل البحرين	أم _ أحمد	إستفسارات حوامل من الشهر السابع إلى الشهر التاسع	3129	09-19-2010 11:26 PM
نداء الى حوامل البحرين	اشراع الهوى	إستفسارات حوامل من الشهر السابع إلى الشهر التاسع	0	06-18-2010 12:47 AM
ام البدرين الله يعطيك العافيه	عاشقة طيور الجنه	منتدى علاج العقم و تأخر الحمل	9	06-13-2010 04:37 PM
عين عذاري ( اهل البحرين )	الشوق عطري	المـنـتـدى الـعـام	2	08-18-2009 12:16 AM