دردشة بنات ليبيا , دردشة حوامل ليبيا , تجمع بنات ليبيا

سورينام · 05-17-2012, 05:06 PM

هذا يا حنه .. وخيتك سورينام نايضه الساعه 8 اليوم عندي صابون وبطاطين الصغار بنغسلهم و2 ممرات وفرشه صغيره . قلت انكمل قبل ما اينوضو الصغار ونلهى .. المهم كملت حوستي مع 10 ونص ودرت دوره عالشقه (فتحت الرواشن ونفضت المربوعه وكديت الحمام الصغير حاشاك ) وخشيت للكوجينه وتيت الفطور للصغار ونوضتهم وفطرتهم وضميت دارهم وطلعت حوايجهم بنديرلهم دووووش المهم شفت الساعه لقيتها 12 وتلت وأني عندي خضرا بندير محشي فلفل وانخمم شن اندير معاه وحاسه ان الوقت ما ايسدنيش وخاصة ان راجلي ايروح الواحد ونص ويبي ايصلي الضهر ويتغذي .. قلت في خاطري باهي خضرتي امقرضه من البارح والمحشي فيسع ما ايطيب ....
المهم ... كيف دخلت نوور الصغيره بنحممها قبل خوتها وايشرين تليفووووني.... جابتلي سروره التليفووون واذا بيه زوووزي ..خير ان شاءالله ...
قاللي على طوووول ومن دون مقدمات : بالله وراس عويناتك يا غزالتي جايب معاي زوز اصحابي عالغدي فتلكيلنا الأمور وقوليلي شن انجيب معاي ومع الساعه 2 ونص جايين احني .....
لاااااااااااااااااااااااااااااااااااا .. خخخخخ عيطت على طول حسي يا كبدي لاه اعليك واني الصغار قاعدين بشمالاتهم ماغيرتلهم .. وليش ماقلتش من بكري يعطيك ...... أخخخخخخخ الواحد شن بيقول توا هي ..
نفخني بكلمتين (اني عارفك اتهني حتى لما عزمتهم اماخر كنت حاط ايديا ورجليا في اميه بااارده)..
المهم يا حنه ماصارش من الدوش للصغار غيرت للصغيرين الزوز شمالاتهم حاشاك .. وغسلتلهم اطرافهم وغيرتلهم حوايجهم واني انخمم شن بنطيب ... 2 رجاله ومعاهم راجلي وعالغدي وهما من الصبح في العمل يعني جعانيييييين
ما فيش من ينقدني الا الكسكسي ....

سورينام · 05-17-2012, 05:07 PM

خشيت درت البصله عالنار هيا الاولي .. وحطيت اللحم في الطنجره مع دبايره واميه سخووووونه وطلعت عواله المحشي وكملته وحطيته عالنار وشفت الساعه لقيتها 1 وربع باااااااااااااااهي باه ربي باركلي في وقتي الحمد لله وقلت باهي اللي نفت مربوعتي عالصبح هيا وحمامها اتقول من قالي جايينك ضيوف ههههه حتى من المكتبه والكمبيوتر والتلفزيون لمعتهم... والله النوضان بكري الا رحمممممممه لربه البيت ومولات الصغار ...
المهم الحمد لله ربي استرني درت كسكسي بالبصله ومعاه فليفل محشي وسلاطه رقيقه ومخلل وزيتون .. وزوزي جاب معاه مشروب وفواكه وبعد الغذي درتلهم طاسه خضرا ومعاها مقروض والحمد لله

أم ورد · 05-17-2012, 05:10 PM

ههههههههههههههههههه الله غالب شن بديري
حتى أني إيديلرلي فيها مرات

سورينام · 05-17-2012, 05:10 PM

ريتي عمايل الرجاله ريتي ... كاني مرا فالحه راني طلعتله عيونه مش سادني صغاري وحوستهم يمشي ايزيدني هم من براااااااااا

أم ورد · 05-17-2012, 05:12 PM

ما شا الله عليك يعطيك الصحة وربي ايخليلك صحيحتك يارب

سورينام · 05-17-2012, 05:12 PM

ايه وهما ولا على بالهم يعزمو ويحلفو للناس واحني نقعدو نتعاركو مع الكوجينه والماعيييين

سورينام · 05-17-2012, 05:14 PM

الله ايبارك فيك وايخليلك صحيحتك حتى انتي وايعمر دارك عن قريب اللهم ’’آآآآآآآآآآآآآآآآميييييييييييييين

سورينام · 05-17-2012, 05:15 PM

شن طيبتي غداك انتي؟؟وشن بتعشينا ؟؟

سورينام · 05-17-2012, 05:17 PM

وين عيون معاش خشت ... شادتها عالفيس وقروب الحايسات وفايته المنتدى!!

أم ورد · 05-17-2012, 05:18 PM

اللهم أمين يارب
الغدي ما طيبتيش زوجي اليوم متغدي بره وقاعد إلى توى ما روحش
والعشي مازال ما فكرتيش فيه

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
دردشة بنات مصر , دردشة حوامل مصر , تجمع بنات مصر	سماسم	إستفسارات حوامل من الشهر السابع إلى الشهر التاسع	15243	06-15-2013 02:43 AM
تجمع حوامل ليبيا	ميرنا	إستفسارات حوامل من الشهر السابع إلى الشهر التاسع	21344	01-02-2012 10:29 PM
دردشة بنات مصر , دردشة حوامل مصر , تجمع بنات مصر	سماسم	إستفسارات حوامل من الشهر السابع إلى الشهر التاسع	32704	01-02-2012 10:16 PM
شجرة تجمع حوامل ليبيا	أم أجنادين 80	إستفسارات حوامل من الشهر السابع إلى الشهر التاسع	6	12-19-2011 10:44 PM