دردشة بنات فلسطين, دردشة حوامل فلسطين, تجمع بنات فلسطين

[em3omar]

صباح الخير صبايا كيفكم
اذا في حدا منكم بيعرف محل بيعمل توزيعات للبيبي بالقدس برام الله بالخليل وين مكان حتى لو بالشمال احكولي
لاني ان شالله بدي اعمل لبنوتي حبيبتي
وكمان الي عبالها اسم حلو تقلي بالرغم من انو عندي كمية اسامي لا باس بها كمان شوي بحطلكم ياها بس بردو اقترحو عليي مش غلط
على فكرة صبايا مش ملحقة عليكم ما بعرف وين مشاركتي بضيع بالردود والكلام بدي فترة لاتعود على هالجو
واحكولي شو طابخين اليوم انا بدي اعمل معكرونة خضار وشنيتسل او دجاج بانيه بيتي يعني
تفضلو اهلا وسهلا ولا شي من قيمتكم

[em3omar]

وشو رايكم بهالاسامي
اقترحتهم قبل شوي لاكم من وحدة بمنتدى الاسماء
نقولي اسم على زوقكم

بسم الله

المى
تالين
تولين
جونة
جيدا
بانة
تالا
سيلا
ليم
ليديا
لارين
لونة
لياء بينلفظ بدون الهمزة
مارا
ميداء كمان بدون همزة
ميرال
ميسان
ميلا او ميلاء او ميلة نفس اللفظ بس المعنى بيختلف

[~{{ DoDo }}~]

صباح الخير صبايا

غموض وحيفا والله انا طول الليل بتقلب ومش نايمة يا ريتني فتت دردشت معكم كان تسليت من العزاب اللي كنت فيه
يلا بسيطة طمنوني عنكم انشالله بخير

لولو وبينك وام جودي كيفكم وشو عاملين ، انا بحب التطريز كتييييييير والي شغل كتير عند ماما في غزة
عملت قبل هيك شوزات ومخدات وشالات وقصص كتير شي بيسلي وحلو والله

انبثااااقة حلو التصوير ههههه انا كمان بحب اصور كتير

ام عمر كيفك حبيبتي الاسماء اللي حطيتيها كلها حلوة بس حاولي اختاري اسم خفيف ما يكونوا احرفه كتيرة
المى اسم حلو ؛))

نسمة المحبة الصبية الجديدة اهلا وسهلا فيكي عرفينا عليكي من وين وكم عمرك ووين عايشة وشو بتعملي بحياتك
نورتينا حبيبتي ؛)

باقي الصبايا يسعددددد اوقااااااتكم

[غُمُوض أُنثَى]

يسعد صباحكم بناااات

حيفا ودودو ومسك ونسيم المحبة

حيفا انا شوفي امتى نمت وامتى صحيت يا الله بالمرة.. هههه احلام رهيبة طول الليل

قال حلمت فيكو يا بنات وانه احنا مجتمعات عنجد وازواجنا معنا وقال تعرفوا ع بعض وقاعدين يحكوا ووحدة فيكو كانت زعلانة بس نسيت مين هيا ^^

دودو انتي لانك حامل الارق طبيعي الله يعينك انا في حملي كان كوااااابيس اشكال انواع وما انام بعدها.. يسعد صباحك يارب انتي والبيبي

نسيم المحبة هلا فيكي بينا ان شا الله تنبسطي هون.. انتي حامل باي شهر؟

[غُمُوض أُنثَى]

شكله عنا ام عمر جديدة كمان ما انتبهت لانه في ام عمر برضو ههه ^^

هلا فيكي يا حلوة منورانا والله
اديش عمرك

[em3omar]

اهلين فيكي غموض انثى
ما بعرف اذا في حدا تاني اسمو ام عمر على كل حال شو بدكم احلا من هيك
انا حكيت قبل هيك عمري 30 وحامل ببنوتة بالشهر التامن

دودو شكرا لالك كتير عم يحكولي على اسم المى
خلينا نشوف شو راي الباقي

[~{{ DoDo }}~]

غموض

والله بجد معك حق يعني طول الليل صاحية بتخيل اشياء غريبة
وبتضل اتقلب من اليمين لليسار
هاد طبعا غير وجع الرجلين او حتى مش وجع نمنمة يعني ما بعرف كيف من الركب وتحت
الدكتورة قالتلي احتمال نقص فيتامين د مع انه والله غذائي منيح الله يستر
لازم اعمل تحليل واتاكد لانه بجد الشي بيدايق

يسعد اوقااااااااتكم يارب

[حيفا]

صباحكم حلوووو صبايا
غموضتي حبيبتي والله وانا اشكال الخوف والرعب وطبعا زوجي حدي ونايم في سابع نومه ، لسا صحي بالليل اتطلع فيي لقاني مبحلقة في السقف هزني من كتفي بقلي مالك ههههههههه ، بقله ولا شي مش عارفه انام قال طيب ، ولف وجهه وكمل نومته هههههههههههه شفتي الاحساسيس والمشاعر الرقيقة هههههههههه

دودو حبيبتي انا بسمع انه الحوامل بتغلبو بالنوم وبتيجيلهم كوابيس ، الله يعينك ، ويتمملك ع خير يارب :)

ام عمر ، توزيعات يعني هدايا قصدك ؟؟ مش عارفه انا بسمع انه برام الله بجيبو اشياء حلوة ، ما بعرف محلات بالزبط ، بس عالاغلب محلات الشوكولاته بتعمل هيك اشياء :)
بالنسبة للاسماء انا في اسم بموووت عليه اللي هو راما
بس كمان الاسماء اللي حطيتيهم كتييير حلوين
الله يتمملك ع خير وتنور العسولة حياتك :)



انا بدي اعمل هووم ميد برجر :)

[~{{ DoDo }}~]

صحتييين عالبرجر حيفا
ويسعد صباحك حبيبتي
انا زوجي مبارح نفس الشي صحي علي وانا مفتحة عيوني وببحلق فيه خاف هههههه
سالني مالك قلتله مش عارفة انام قللي معلش حاولي وطبعا على طول كان بسابع نومة ههههه

صبايا انا بدي اروح مشوار صغير بنحكي انشالله ويسعد اوقااااتكم ؛)

[حيفا]

الله معك يا عسل ، انا بدي اقوم اشتغل البيت ، واجهز الغدا لزوجي ، وانطلق ع بيت اهلي ههههههه
طبعا معزومين ع معجنات عندهم ، بس زوجي طلب مني البرجر ما قدرتش اقلووو لا هههههههههه