دردشة حوامل مصر - دردشة بنات مصر - تجمع حوامل مصر

[د×و]

اهلا اهلا بيكى روان نورتى الشات

تحسي انه فعلا مش باين انا كمان لاقيته بعد فتره من تسجيلى

وكمان اقولك سر

البنات الحوامل المصريات دول طلعو كسوللييييين بشكل

بيدخلو كل فين وفين :(

بلاقى الشات بتاع كل البلاد عمران كده ومليان وانا لا
بس ممكن هم معزورين اغلبهم فى الشهور الاولى وطبعا الوحم عامل عمايله :)

المهم اتشرفت فبيكى وربنا يتمم حملك على خير ياااارب

[dr.princess]

د×و الكيكة مش ممنوعة ولا حاجة
بس انا عايزة اعملها بالشيكولاته وطبعا ممنوعة فى الحمل فيها كافيين زيها زى الشاى والنسكافيه والقهوة والكاكاو بالظبط
عملت الكفتة امبارح طلعت تجنن

روان نورتى المنتدى واهلا بيكى معانا وربنا يكمل حملنا على خير
معلشى احنا كسولين شوية او انا اتكلم عن نفسى بس زى ما قالت د×و اول حمل ولسه فى الشهر التانى ومتبهدلة نوم ودوخة وطبعا كله كوم ومعدتى المقلوبة طول اليوم دى كوم تانى مبقتش عارفة اكل حاجة ربنا يصبرنا ويتمملنا على خير

[د×و]

بنات نادونى دودو عشان تسهلو على نفسكم :)

برنسيس مش ممنوعه لدرجه انك ماتكليش الكيك انا باكل شوكلاته عادى لما نفسها تروح لها وسعات اشرب نسكافيه بردو بس كل فين وفين
وكنت بعمل كده فى بنتى عادى والله
بس لو انتى طبعا حابه كده ومش مسببلك ازمه خلاص تمام

وعلى رايك ربنا يعدى شهور الوحم دى على خير الواحد تعب بجد:(

[dr.princess]

دودو والله فى الاول كنت متضايقة بس دلوقتى بدأت اتعود
انا بس مش عايزة اقرب منها لان اختى فى حملها الاول كانت بتشرب شاى ونسكافيه كتير و ابنها طلع عصبى جدا ونشاطه زايد اوى بتهيألى انها من المنبهات دى والعلم عند الله
فقلت بلاش احسن انا هنا لوحدى مين هيساعدنى
وهانت ان شاء الله كلها ايام وشهور الوحم تخلص

[د×و]

ههههههههه يا عينى خايف البيبى يطلع عصبى
لا ربنا يارب يديكى نونو جميل وديع وهادئ يارب مع انه فى زماننا ده الاطفال ربنا وحده يعلم بيهم ههههههه

انتى مغتربه يا برنسيس زيي يعنى
انا عايشه فى السعوديه بقالى سنه ونص اهو
فعلا الغربه صعبه اوى
ربنا يعين

[حبيبة الرحمن]

السلام عليكم ورحمة الله وبركاته
أنا حامل فى الشهر السادس وتعبانة جدا
عندى حرقان فى معدتى لو حد عنده فكرة عن
فوار اسمه رانى هو بيريحنى جدا لكن مكتوب
انه بيوصل للجنين وانا خايفة جدا
لو حد عنده فكرة يطمنى

[dr.princess]

هههههههههههههه دودو والله عندك حق العيال اليومين دول بقوا صعبين اوى بس اعمل ايه انا قلت اخد بالاسباب وخلاص
طيب اختى فى الولادتين كانت بتفضل عندنا فى البيت بالشهور قبل الولادة وبعدها وحتى لما كانت ترجع بيتها انا مكنتش بسيبها وكمان حماتها موجودة وماما وكمان حماها احيانا بس انا لوحدى هنا حتى لو جبت ماما وقت الولادة هتفضل شهر او اتنين وهتسيبنى ربنا معانا احنا المتغربين
انا اتخطبت شوية وخطيبى سافر وبعدين اتشحنت وجيتله هنا المدينة المنورة عروسة من 6 شهور

[denar]

ازيكم جميعا انا مصرية عايشة فالسعودية انا فاخر التالت ربنا يعدى الشهور دى على خير

[دودى اشرف]

السلام عليكم ورحمة الله وبركاته... ازيكم يا احلى مصريات ... انا مصرية من القاهرة وقاعدة فى الكويت بقالى 5 شهور .. وحامل فى اخر الرابع ..ربنا يثبت حملنا جميعا ويتملنا على خيران شاء الله .... انا كمان مبسوطة جدا انى لاقيت تجمع مصرى لانى مشتركة فى تجمع كله عرب والحقيقة معظم الكلام مش بفهمه بس هما لذاذ جداا واستفدت منهم بصراحة ... بس طبعا بنات بلدى اسهل التعامل معاهم وفاهمين بعض اكتر اكيد ... المهم مفيش حد عايش فى الكويت معايا

[دودى اشرف]

السلام عليكم ... ازيكم يا امهات ... فعلا باين على التجمع ده كسلان اوى .... مفيش حد خالص ... كل ما ادخل مالاقاش حد .. انشالله يكون الجميع بخير