ديوانية البحرين - دردشة حوامل البحرين - البحرينيات

[طفلي حياتي]

ياعلي لو تشوفون عباير المصريين مقتل
يصلون خلط وبجواتيهم خخخخخخخخخخ صاقعه ماليهم حل

[حنين للماضي]

السلام عليكم
شخباركم حبايبي؟؟

احلام ام ماعليش شر حبيبتي
صدق الم الراس شيء مريع
انتي على طول يجيش كأنه لأن كل مرة تشتكين من هالشيء

روز شخبار بشورة؟؟
هالايام بتكون هادئة وبترتاحين في نومش
بس عقب جم من يوم قولي وداعاً للراحة

البارحة طلعت من عقب حبسة شهر واحد ورحنا عن يازعم المطعم وقلبنا في يدنا عن لايقعد حبيب قلب الماما
وصدق من عقب ما جابوا العشاء بخمس دقايق قعد الحب وفزع المكان فزعة وشال المطعم بصريخه كل الناس قاموا يطالعونه حتى زوجي يقول اول مرة اسمعه بهالقوة يصيح
عاد شلته وسكت الحمدلله وقمنا على طول
ويوم ركبنا السايرة رد يصيحقلت ما في فايدة ورجعنا البيت وهددنا ان خلاص مافي طلعه مرة ثانية

طفطوفة شخبارش حبيبتي؟؟
شنورطوبة يعني افرازات قصدش؟؟
ترى حده طبيعي
اني كنت في اليوم في كل صلاة اغير ملابسي الداخلية بسبة هالشيء

بنوتة غبتي يومين وقلت في قلبي شكلها ولدت

ام السادة ياااااااااااارب تقومين بالسلامة وتبشرينا بخبر ولادتش اليوم

[ام حسين الدار]

مساء الخير خواتي اخباركم وكيف اطفلكم وكروشاتكم الله اسهل على الجميع انشاالله الوضاع عدكم هدت والوضع استقر وحبيت اقول لكم ان مرحب فيكم في دردشة في كل وقت دعواتكم الي راح اتنوم بكره واذا البيبي ابخير وكل شي ابخير راح اسوي عملية ربط يوم الاحد يارب لاتحرم احد من الدريه
وانشاالله اذا قمت بسلامه راح اطمنكم عني
والله يرزق الجميع يارب

[شمس الصباح]

سلاااااااااااااام عليكم

ام السادة ان شاء الله ولادة ربي يسهل عليش

احلام ام ما عليش شر بس ليش ما تدهنين شعرش زيت يمكن يخف

باقي الأمهات والحوامل شخباركم

اليوم جتني الدورة بعد الآربعين واحس جسمي كلش متكسر

اي ما قلت ليكم اني من ولدت ما طلعت وامس كنت متملله قام زوجي طلعني مع ملوكة بس وداني ميدان الشهداء قعدت الي الساعه عشر بعدين قامت تصيح ورجعنا
هناك النسوان يقولون يعني هالنتفه معتصمة قلت اليهم اي مو بس انتون بعد هي علشان مستقبلها ومستقبل اولادها والكل قام يطلب الفرج كان موقف حلو وقلوبهم على بعض وحده وطنيه

[حنين للماضي]

هلا فيش ام حسين
ربي يقومش بالسلامة وتبشرينا بسلامة البيبي
بس ليش بتسوين ربط؟؟؟

هلا والله شموسه
ملوك صايره تشبه علوان شوي بالصورة تصدقين
يعني لازم تقلديني في الطلعة
اني بعد البارحة طلعت بس علوان قعد من نومته وقام يصيح ورجعنا البيت
بس عالاقل شميت هوا شوي

[حبيبة حسوني]

سلام بنات شخباركم ؟ويش مسويين ؟
قرات قصة ولادتش روز حمد لله الله سهل عليش وماتعسرت ولادتش واني اليوم اكمل 3 اسابيع من ولادتي وبكتب ليكم قصة ولادتي الحين اني كنت بكتبها من زمان بس كنت واجد تعبانه
المهم يوم الجمعه تاريخ 4/2/2011
كنت نايمه وزوجي كان قاعد وجه ينبطح شوي علشان بيقوم لصلاة الظهر تالي المهم اني قعدت يوم يجي حسيت شي ينزل عليي رحت الحمام الا دم ينزل عليي وياه مثل الماده مخاطيه
رحت سيده اقول لزوجي قام وتالي راح سال حماتي لاني ماكنت احس باي الم قالت ليه خلها تنتظر لين مايجيها الم تالي ودها بس اني خفت واتصلت لامي وقلت ليها قالت ليي روحي احسن ووداني زوجي المستشفى وجيكوني مافي اي توسع تالي سوو لي تخطيط وعقب قالو ليي التخطيط اوكي هي الدم عادي من علامات الولاده روحي البيت اذا صادش اي شي اونزل عليش ماي ردي ارجعي طبعا ظل ينزل مني دم قالت ليي الممرضه عادي عقب الفحص ينزل دم المهم رجعت البيت وخبرت امي طبعا بكل شي قالت بتصلي الظهر وبتمرني قلت ليها ماحس باي الم وهي الا مصره تمرني قلت ليها حياش المهم ظل ينزل عليي دم وشويه بني وامي جت وكلحين اراويها الي نزل عليي >>عباره خبره امي المهم ظل ينزل عليي افرازات كلحين لون مندم الي بني وتالي ظل ينزل عليي شوية ماي وتالي اخضر واني كل دقيقه بس في الحمام يوم قلت لامي اخضر استغربت الا اصرت اراويها في الكيرفري مالتي راويتها اياه وسيده اتصلت لدكتور تعرفه عاد شرح ليها السالفه وقاليها لازم اروح المستشفى هي يسمونه ميكينيوم هي ويش عاد مادري قاليها تقوليهم وهم بيعرفون اني كنت احس بالم في ظهري دابحني اكثر شي وتالي في الحوض بس موواجد واجد الم بسيط
المهم رحنا المستشفى وامي خايفه عليي جيكوني الا ولاشي بعد متوسعه وشافو الي ينزل عليي يسوون لي هي عادي عادي تخيلو
وامي منقهره حدها عليهم لانهم مو فاهمين شنو الي ينزل عليي وتالي قعدنا على الكراسي الي برا في مستشفى جدحفص عند غرفه الفحص علشان انتظر زوجي راح يجيب لي سندويشه وعصير لازم اكلهم قبل لايسوون لي تخطيط مره ثانيه المهم واحنا قاعدين على الكرسي امي تشرح للي هناك الممرضه تشتغل شنو الي كان ينزل عليي ماشافوني الا اضرخ مره وحده ماشفت الا ماي واجد نزل علي ويا اخضر واني على الكرسي تخيلو ودبحت روحي من لصياح ثيابي ودفتي وحالتي حاله سيده جت تركض قومتني هي ويامي ودتني داخل الغرفه وبدلت ثيابي وردت شيكت ليي مافي توسع سيده فصختني ثيابي تسوي ليهم ولاده واني خايفه لاني مو حاسه بالالم القوي شلون ولاده بدلوني واني دابحه روحي من لصياح وهي تهدا فيني مسكينه وتقرا عليي ايات وتصلي على النبي واني بس اصيح كنت خايفه لاني مادري ويش صايره المهم بدلو ثيابي وقعدوني على ويب جير تالي زوجي مسكين جه وتفاجا ماكان متوقع اني بولد ولايدري ويش صاير المهم طلعوني حب راسي زوجي ياعليييييي والدمعه في عيوني بس ماحبيت اصيح جودت روحي قدامه وتالي امي من حضنتني دبحت روحي من لصياح دخلوني بصياحي حتى كلهم يقولون ليي لاتصيحين توش ومدري ويه
المهم ودوني غرفه من غرف الولاده حطو عليي سيلانين ويا هوز البول الله يعزكم وجهاز تخطيط ظليت منبطحه وكلحين وحده تجي تجيك مافي اي توسع وماكان عندي الم وهالاخضر عفسني عفاس ظل ينزل عليي مو راضي يوقف وكلما يجيكوني يشوفونه في ايدهم يقولون هذا مو ماي ويطالعون في التخطيط ويستغربون خوفوني تالي جت دكتوره تقوليي هي البيبي موصخ داخل بطنش هي المفروض يسويها عقب مايطلع بس سواها في بطنش وهي خطر عليش وعليه خطر لايستنشقه ويموت او اني اتسمم او يصير فيني شي قالت ليي حاليا الي مطمننا تخطيط البيبي اوكي بس تاكدي من التخطيط يصير مو اوكي سيده عمليه
واني خفت وظليت بس اقرا ادعيه المهم تالي ظلو يروحون يجون ظليت 4 ساعات على هالحال ومافي اي توسع تالي جاني طلق بدا عندي وماتوسعت الا اقل من نص سانتي والوقت يمر وهي خطر عليي وعلى البيبي قلت ليهم بكلم زوجي اتصلت ليه وجه لي عند الباب هو ويا امي بالغصب خلوني اطلع ليه طلعت ليهم برا وقلت ليهم يمكن عمليه وجدي الا ايمكانت تدري اصلا من يوم تتصل للدكتور قال ليها اكيد عمليه بس ماحبت تخوفني وقالو بيصبرون يمكن اولد طبيعي عاد هم قالو لي ماعليه لاتخافين حتى لو عمليه هي تعبتش 9 شهور اهم شي تقومين بالسلامه قلت ليهم بخليهم يحطون علي طلق صناعي واذا ماتوسعت بسوي عمليه وقالت ليهم امي يحطون عليي طلق صناعي حضنت زوجي ودخلت داخل علشان يحطون علي طلق صناعي وحطو عليي ماكمل ربعه الا ويسمعوني صراخي جو يتراكضون من سمعو صراخي بغيت اموت من الوجع جيكوني الا توني نص سانتي ياعليييييييي بغيت اموت وراحو عني وظليت اتلوى من الوجع مو قادره وصلت حدي حسيت اني بمووت من الوجع واني اصارخ وماجو لي الا عقب ماطلعت روحي قلت ليها بندي بندي بس مابي طلق صناعي نادي دكتوره تقوليي دكتوره في بريك تاكل اني بمووووووووت وهي تقوليي دكتوره بريك وتاكل تخيلو وظليت ساعه كامله علما شرفت الدكتوره واني الطلق حده موصل تالي جت الا سيده اصاررررخ اقوليها دكتوره خلاص بسوي عمليه ماقدر بمووت قالت ليي اوكي بس بجيكش اول لانها جافت حالتي حاله ومو قادره جيكتني نفس الشي تخيلو على كل هالالم ماتوسعت ظليت اقل من نص سانتي تالي قالت لي زوجش برا قلت ليها اي قالت ليهم ينادونه ونادوه علشان يوقع وشرحت ليه وضعي انه لازم عمليه لانه خطر عليي وعلى فطومه تالي تنهد تنهديه كبيره وفي ايده كان مسباح وعلا عمري ووقع وقال ليي لاتصيحين اوكي واني ماصحت علشانه وتالي ماشفتهم الا يبرزوني للعمليه وسيده لبسوني وودوني غرفة العمليات واني الله يعلم بحالي اصرخ من الوجع اتلوى على السرير مو قادره الطلق دابحني قاعد يزيد وظليت اقول طول الوقت في نادو عليا مظهر العجائب تجده عونا لك في النوائب وعلما دخلوني الغرفه وبرزو الاغراض ويلبسون ثيابهم حطوني على سرير العمليات وحطو ايادي كل ايد على قاعده وحده فيها سيلان ووحده عليها مال الضغط وطبعا هوز الابوال مركب ماشفت الا دكتور داخل واتصروعت اقول في قلبي يوووو جيفه دكتوره واني مفصخه يعني ثياب العمليه مفتوحين من ورا ويش هالفلشه بعدين قلت الا هو بس اولد بموووووووووت تالي سيده قالو ليي تلوتي مثل الربيانه علشان يضربني الدكتوره الابره في ظهري واني خايفه ومو داريه ويش بيصير واصارخ من الام مو قادره اثبت على السرير الا تقوليي الدكتوره لاخافين من نضربش ابره بيروح كل الالم مابتحسين بولاشي وجودت ايد الممرضه الفيلبينه قال ليي الدكتور لاتتحركين ولين خف الالم قوليي ومن خف شوي قلت ليه وجودت ايد الممرضه بزززززور وضربني الابره ومن ضربني اياها الله وكيلكم ماحسيت الا بحراره تتخلل جسمي من تحت صدري الا اخر جسمي وكل الالم راح في دقيقه وتالي ماحسيت بجسمي سيده قعدت اصارخ اقويلهم غطوني غطوني مامبي اشوف شي وهم اوردي بيغطوني بس اني كنت خايفه حدي ومستحيه من هالدكتور وهو مسكين وقف على راسي يمسح على راسي ويهداني وقعد يسولف ويايي وجدي يضيع الوقت الا تالي يقوليي تدرين الحين هم اشتغلو فيش اني استغربت اقوليه يعني شقو بطني يقوليي اي لاني ماحسيت بولاشي وقعد يسولف ويايي عاد عقب ربع ساعه قان قاليي ماعليه تحملي شوي بضغط تحت صدرش في دكتورتين يسوون العمليه ضغط تحت صدري علشان يدفع فطومتي لتحت بطني ليهم وتالي حسيت بشي طلع من جسمي سبحان الله مع اني كنت مبنجه الا اقوليه وين بتي امبي بتي ماسمعتها تصيح لانه وخفت قالي حينظفوفها ويجيبوها وتالي سيده سمعتها تصيح واني ماشفتها طبعا من سمعت صوتها تصيح دبحت روحي من لصياح وسيده لفوها وجابوها ليي في خلقه وعليها شوية دم ياعمرييييييي ماقدر اوصف شعوري في هالحظه كنت امبي احضنها بس ماقدرت لاني جابوها صوب راسي واياديي كلها سيلان وجهاز الضعظ لمست رجولها الصغنونه وظل في صبعتي اثر دم شويه منها يعمرررررررري فطومتي الورده كانت بنفسجيه المهم يوم يدخلوني العمليات كانت الساعه عشر وشي ويوم يبدون العمليه كانت الساعه 11 الا ربع وطلعت فطومتي الساعه 11 بالضبط وتالي ظلو يكملون ليي العمليه للساعه 12 بالضبط وطلعوني وكنت ارتجف ميته من الرجفه وسيده حطو عليي لحاف داااافي وودوني غرفه الانعاش وحطو عليي اجهزه وجهاز بخار واني دايخه مو في دنيه مو حاسه بشي والا بس خمس دقايق والا كللللل خالاتي وحمواتي وامي وابويي وخواتي وزوجي كلهم دخلو دمعت عيوني من الفرحه ماتوقعتهم كلهم هني لاني مادري من جه ومن ماجه استانست عدل وماكنت قادره اتكلم كنت اتنافض وكلهم مستانسين ويصيحون وتالي جابو ليهم فطامي القمر وراحو يحببونها وسييييييده قالو ليي نسختي بالضبط اني وزوجي كان يرتجف مو عارف يجودها وهو ياذن في اذونها صدق كان احلا شعور من بين كل الالم الي صادتني شوفت فطومتي القمر هونت عليي كل الالام الي شفتها وحمد لله اني شفتها في حضني بصحه وسلامه هههههههههه سوري طولت عليكم بس حابه تعيشون الجو ويايي وعقبال كل الي ماولدو الله يفرحهم بشوفة كتاكيتكم

[أحلام أم]

السلام عليكم كلكم حوامل وأمهات
طفلي حياتي
شكله الرطوبة إللي فيش من الفطرياات حبيبتي لاتخافين يبى ليش علاج عن الفطريات
شمس الصباح وحنين للماضي
الله يسلمكم أني ألم الراس مشتهره به وفي الحمل يزيد وشمس تصدقين ماخليت شي الزيت مغرق شعري والكمادات الساخنه والتدليك وساعات أربطة وساعات أخلي الماي الحار يهد عليه ولافي فاايدة لين يبره بروحة
روز سول
السيم يبى له وقت على مايبره
أم حسين الدار
هلا بيش حبيبتي ،توكلي على الله وطلعي صدقه بنية نجاح العملية وسلامة حملك وجنينك ومابننساش من الدعاء
حبيبة حسوني
ياااااالله عشت قصة ولادتش بكل حذافيرها وكأني مكانش وتفاعلت وياش
الحمدلله يوم الله سلمكم إنتين وبنوتتش وشفتينها في حظنش ،تتربى في عزكم إنتين وأبوها وربي يحفظها ليكم ويجعل قدمها قدم السعد على طول عليكم

[صعب تنساني]

حبيبه الحمد الله على سلامتك تاثرت وايد بقصتج وعشت الجو معاج صدق الي قال الوحده من جوف ظنها بيدها تنسى التعب سبحان الله

[حبيبة حسوني]

أحلام أم

صعب تنساني

تسلمون حبيباتي على هالمشاعر الطيبه واشكر تفاعلكم وياقصتي بس صدق
الوحده لماتكون في الولاده تحس روحها في دنيا غير هالدنيا وهي مو تنسى الالم
بس شوفة البيبي تهون وتخفف عليها كل الالم والتعب الي شافته
الله يفرحكم بشوفة كتاكيتكم يارب

[ام حسين الدار]

تسلمي اختي احلام ام واشكر الجميع على وقفكم معاي
اختي حنين الماضي راح اعمل ربط عنق لان عندي عنق الرحم قصير واخر حمله الي انفتح عندي الرحم واني في شهر6
الحمدالله على كل شي
دعواتكم
والف مبروك الى الولدنين الله لايكسر فرحت احد