ديوانية البحرين - دردشة حوامل البحرين - البحرينيات

[بنوتة حلوة]

كلهم قاموا خايفين .. أني بسهر لأن رجلي واخوي وولاد عمومي وعماتي كلللهم على الدوار الأبطال .. بيحررون الوطن من الاستعمار ..

وين الواحد يجيه النووم ,,

[أحلام أم]

السلام عليكم
فلونة
شكلها راحت تولد من أمس يارب تسهل عليها وتقومها هي وجنينها بالسلامة وترجع تطمنه عن ولادتها ياااااارب
طفلي حياتي
ويش أخبار موعدش ورحتين لولا ويشتغلوون المستشفى لولا
أني اليوم موعدي في الفاتح
عندي أشعة وأطلع نتيجة السكر وأدخل على الدكتورة ولاااااا رحت
قريب لي يداوم في المستشفى ومن أمس يقولي لاتروحيين محد من الدكاترة بيداوم في العيادات ونجفني وقعدت من الصبح أتصل له يقول شكله مافي دوووام في الفاتح وأيسني من الروحه سويت التلفون سايلنت ونمت وماقعدت إلا مكالمتين منه شكله دااوموا الدكاترة وهو نجفني عن الروحة ما أمبا أظلمه لاكن باروح موعدي الخاص إذا الله كتب ليي روحه وبارد أخذ موعد في الفاتح عااد أني من زمان أحارس هالموعد بس علشان أطمن على نتيجة السكر والأشعه
روز سول ربي يسهل عليش الولادة وتبشرينة بولادة بشرى
باقي البنات ويش أخباركم
أم السادة مابينت البارحة مادري شكلها بتولد لو تصيد الفرخة مالت ولد إخت طفلي حياتي
أشوفكم على خير وسلامة

[طفلي حياتي]

السلام عليكم
هلا احلام ام
الدخاتر شي بديهي مابيقعدون اهم قطاع هم ولا احد قال مافي دخاتر اني رحت موعدي
والفرخه حتى ولد اختي يفكر اشلخ عليه الحين لين اكلمه عنها مايعطيني ويه
فلونتي عف ولدت يارب تسهلها عليها وعلى البنات اللي هالايام ولادتهم وتبلغنا فوقتنا يارب
ماني عارفه اصلي من الم ريايلي فنتينهم منشلين من فوق لتحت وهداني بلا صلاه ماعرف اصلي بالقاعد .. بس الحين باصلي على الكرسي مال الصلاه
اراكم على خير
النت اليوم حده فاشل والله يستر مادري وش السالفه
بااي

[أحلام أم]

هلا
طفلي حياتي
الله يساعدش على وجع الرجايل يمكن نقص كالسيوم عندش أني عندي الوركيين كأنهم متفككيين الله العوين
وطلع صدق يداومون الفاتح وهو الله يحفظه ضيع عليي الموعد والأشعة ونتيجة التحليل
بس ماقصر رد راح أخذ ليي موعد على الإسبوع الجاي والله ييسر وأروح الموعد بس الأشعة راحت عليي
شوفي الجاهل لاتواعدينه بشيء وتماطليين وتأخرين عنه وعدش ترى تالي مابيصدقش ،وهو هالضروف إللي غيرت مواعيد الناس ربي أسألك الفرج
بنات الليلة مولد النبي محمد (ص) وبتتحول أغلب المأتم إلى توسلات بدل فرحة الميلاد
نسألكم الدعاء وعايدين بحال أحسن من هالحال
أستودعكم الله

[حنين للماضي]

السلام عليكم

فلونة شكلها ولدت
وعقبال الباقي ان شاءالله

روز توني اكلم اختي اقول لها روز ماطرشت مسج تقول لا
وتوني جفتش اون بعد
يلا باقي على موعدش ثلاثة ايام
يعني توقعي خلال هالاسبوع بشوره عندش
وعلى طاري المسج حده حليو طرشي عادي مافيها شيء وفرحي اهلش واحبائش

طفطف لو كنتين صوبي جان فغصتش على هالوسواس
جوفي اني وحدة لا كنت احس بحركة كاملة نفس ماقلتين دوران كامل
كنت احس بركلات رفسات شي جدي
والحمدلله دام فرحتش تتحرك معناته هي بخير لاتحطين بالش تحركت واجد لو شوي
لأن كل بيبي وحركته غير عن الثاني يعني انتي لا تاخذين كلام البنات وتعممينه على نفسش
في ناس ماشاءالله بيبياتهم تتحرك بقوة وناس لا حركات هادئة وقليلة
كنت بقول ليش شيء من زمان توني تذكرته
ليلة اللي رحت بولد وكنت ادعي للي وصوني بالدعاء سبحان الله اسمش كان على طول في بالي وربي الشاهد يمكن تذكرتش اكثر من خمس مرات
يااااااااااااااارب يسهل ولادتش وتبشرينه بقدوم اغلى فرحة

احلام ام شخبارش حبيبتي؟؟
روحي اخذي موعد للاشغة يمكن يرضون يعطونش مرة ثانية

وبنت الاياويد وام حماني وروز 2 و ام خليل وبنوتة شخباركم حبايبي؟؟

شموس شخبار ملاكي؟؟
راح ابوالصفار عنها ان شاءالله؟؟


حبيبة حسوني والذهبية شخباركم مع السهر؟؟

سمعت صوت علاوي بقوم اجوفه

[شمس الصباح]

سلااااااااااام

شخباركم بنات

ممممممم شكل فلونة ولدت ربي يسهل عليها وتجي تبشرنا بعد كم يوم

طف طووووووووف انتين حامل وتحاتين كل شي عيل لو تولدين ويش بتسوين على جدي الياهله مسكينه بتعاني منش وكلي امرش الي ربش ولا تفكرين في شي

ام علاوي هلا عمري شنو اخبار علاوي بخصوص ابوصفار لا تذكريني والله تعبت يوم يخف ويوم يزيد والمفروض اروح الطوارئ السلمانية هالسبوع بس ما اعتقد بيدخلوني مساكين هبابهم على اللي عندهم وهداني اعابل ابها احطها في الشمس واعطيها ماي واحط فيه ماي الحندبان ولا في فايدة بس يقولون ان اذا فيها نقص خميرة ما يروح ابو صفار واني وابوها مافينا.. سئلت اختى تقول اخوي كان فيه ولازم اسوي اليها تحليل علشان اعرف اذا فيها بس والله اذا اخذو منها دم تكسر الخاطر مافيها عرق يعصرون ايدها مثل الليمونة علشان يترسون غرشه دم تمللت من ابو صفار طلع اقرون لي بس ويش اسوي الحمد لله شكلي عورت راسش من هدرتي

[شمس الصباح]

اليوم رحت مع زوجي صوب ميدان الشهداء كان خاطري انزل من السيارة بس ملاك معاي ولكن اضعف الأيمان اني ما انساهم بالدعاء والحين ابو الشباب بعد راح ومن يروح اقعد على اعصابي ربي يحميهم وينصرهم

اي ما قلت اليكم عن اخر اخباري مع ان الوقت مو مناسب بس زوجي قاهرني

رحت الصالون وقصيت شعري بسسسسسسس قصيت من شعري تقريبا متر وظل الباقي قوف الكتف يعني حشيت شعري كله كان طويل يوصل للمؤخرة المهم جيت البيت وشافني زوجي وزفني يقول من سمح ليش تقصينه واني من قبل قلت اليه اني بقصه وقال انا ما يخصني ولا من يشوفني يقعد يضحك يبط الجبد يطالع ويضحك كاني مهرج اليه وقمت حلفته يقول لي ليش يضحك وما بزعل يقول كانش هنديه قلت اليه يعني مو حلو شعري يقول بله هنديه حلوه بس انا مو متعود عليش شعرش قصير ويبغي لي وقت على ما اتعود

والله الحين انام ولا اخاف انه ينام على شعري في الليل مثل قبل اصارخ شعري شعري قوم انت نايم على شعري

[ام السادة]

السلام وشحوااللل عفر

اخر الاخبار اخيراا طفطفاتي اخدت فرختها هههه
بس زعلت منها ما رضيت تدخل بيتنا كاني طاردتنها وقفت على الباب ام دبة خخخخخخ

للحين ما ولدت وماليي الا امشي من البيت الى الدوار علشان اولد ويصير ولدي وليد الدوار

خاطري اطلع وفي نفس الوقت ماليي مزاج اليوم كان عندي موعد في السلمانية ولا عطيت الموعد وجه ورحت في سابع نومه

ويش اخباركم بعد ما سمعنا خبر عن فلونه خلف جبدي ما ادري ويش الاوضاع عندها

[حبيبي]

شخباركم حوامل البحرين
انا مو بحرينيه سعوديه بس حبيت ادخل اهنا
الله ينصركم ويثبت اقدامكم ويرحم شهدائكم الابطال
وقلبنا معكم

[Roze]

قووه

المكحل يشلخ في قناة البحرين عن انه اليوم كان يوم دراسي طبيعي وعادي يااااااااااااو



اليوم اخدت نتايج الدم والسكر
طلع فيي سكر :(
ودمي قاصر :(