تجمع حوامل ليبيا

[عيون زوجي]

ياسيدي بن سيدي القصة ومافيها كالتالي
يوم الموسم مشيت لحوش بوي من قبل العصرية بشويه لان راجلي بيطلع مع خوتي لسوق السعي بيشري خروف
المهم روحنا حوالي الساعه 10 في الليل بخريفنا وجونا تمام والخروف يبعبح في صندوق السيارة واحنا فرحانين
لما وصلت كلمتني سلفتي بالتليفون قالت: اسمعي وينك ما عيدتيش اعليا
انا:اليوم موسم والعيد غدوة
هي:الناس تعيد اليوم يا فالحه العيد عرفه وانا اكبر منك وهدا اول عيد مع بعض وما اتصلتيش
انا:(في خاطري لاش متصله وهي تنفخ)؛؛: ياحنا انتي كبيرة قدر وكل سنه وانتي طيبه ومبروك اعليك خروفك وعيدك
هي:اسمعي انا تفاهمت مع شغالة مغربيه بتجي ادير كل شي يوم العيد من غسل البطون والماعين وكل شي الا التتطيب والتقطيع
انا:يازين ما درتي احنا الزوز عندنا صغار هكي اريح وعزوزتنا كبيرة
هي:انا ندفع الثلت وانتي الثلت وعزوزتي الثلت
انا: ماعنديش مشكله اي مبلغ انا ندفعه
هي: الشغاله تبي 70دينار انتي ادفعي 25
انا:(واعلاش اني 25 خيرها هي) مش مشكلة حتى 30 مافيهاش مشكله
هي: اسمعي نسيت انقولك الشغاله بتقرض الخضرة يلي انــــــــــــا شريتها وبتغسل البطن متاع خروفي وخروف العزوزة وانتي اغسلي بطنك بروحك
انا:( وبكل غباء وسداجه): اوكي بسليمتك ومتفاهمين
بعدها مشيت لحوش عزوزتي هدرزت وكان جوها مش 100% لان سلفتي كانت عندها قبلي وروحت حكيت لراجلي وعيط في وجهي انتي غبيه تدفعي زيك زيها وهي مقعمزة رجل على رجل وانتي مع الشغالة تغسلي في الدوارة وريحتك اتفحفح ما يمشيش الحال كلمي الشغالة وزيديها فلوس من عندك وخلي تغسلك زيك زيها
فقت من غبائي شنو درت في عمري زي الحمارة وافقت وهي بتقعد زي البيه ادور وتشرف وحتى العصبان بديره الشغاله وانا نغسل مع الشغاله ونلبز واعلاش والفلوس ندفع زيني زيها
كلمتها الساعه 12 في الليل وقعده طيبه ودمي مش محروق هلبه نحسابه الدوة من الشغاله مش خنس من سلفتي تبي تستعبدني وتقلل من قيمي وتتطلع هي البيه النظيف لابسه وامفحفحة
انا: شنو الجو يا فلانه
هي:كويسه تمام
انا:بالله نبي رقم الشغاله منك
هي: واعلاش فيه حاجة
انا: راجلي قالي انزيدك فلوس المهم تغسلك البطن متاع خروفك مع البطون التانيه
هي: والله اسمعي يا احبيبه لما كنتي راقدة في حوش بوك كنت اني اندور على شغاله وشاقيه انوصي
انا: اوكي كان عالفلوس نزيد
هي:( تعيط وتصيح وتتطلع على حقيقتها) اسمعي الشغاله رح تغسل نص دوارة عمتي والبطن متاع خروفي ونص الماعين والنص الباقي اديريه انتي بروحك وغصبا عنك
انا:( فقت من الغباء): والله انا ما حدش يغصبني ومش ملزومه بيك وغدوة قعمزي انتي وشغالتك بروحك نقعد في حوشي واندير حاجتي بروحي واشبعي في عيدك بروحك
هي: والله يفتحلك ربي نص الحوسه نبعتهالك لحوشك
انا:تبعتي اي شي انحطه في الكناسه
هي: احترمي نفسك وتعلمي الاحترام وينهم اهلك ما علموكش الاحترام
انا: والله انا محترمه غصبا عنك وبالسلامه وعيدوا بروحكم باي
ومشيت بعدها لعزوزتي نجري ودموعي في عيونها نحكيلها شنو صار نحسابها بتزعل وتقول كيف تقولك هكي لكن الحكايه شكلها مدروسه بينهم ومعبيه راس عمتي ردت اعليا بكل برود وبصوت ما ينسمعش: مايصيرش منه لازم تجي غدوة
قلتلها بسلامتك تصبحي على خير
ردت: تصبحي على خير
تصدقوا ولا لا والله العظيم والله العظيم قعدت للصبح نايضة وريقي يابس ودمعتي في عيوني
على شنو يلزوني لا شاريه خضرة ولا شي و3 سنوات وانا نغسل بروحي في 3بطون عمي وعمتي كانوا يضحوا على زوز ونغسل كل شي وندوب الشحمة للعزوز ونديرلها القلاية ونعول اعليها للتقديد ونحشي العصبان ونخلي حصة حمواتي ال 5 وانطيب الغدي فاصوليا والساعه 10 في الليل باش انكمل ونسيق كل شي ونطلع من عندها بروحي ولا نشكي ولا نتكلم
وكانت الليلا مسافرة وتوا اول عيد بينا المفروض احلى وكل شي تمام لزتي وعمتي راضيه
تاني يوم بخرت حوشي بالوشق وقعمزت عالنت ولبست صغاري حوايج لعب باش يطلعوا يلعبوا جنب مكان الدبح وفعلا دبحنا ال11 وكملت كل شي بروحي الساعه 3كنت مدوشه وتامة
مادرتش عصبان لانه ماعنديش خضرة بس غسلت البطن وقرضت معاها المعلاق وشويه لحم وحولتها وكيست اللحم ودرت قلايه
بعتت للشيابين من الكبدة والشواء ومعاهم كتف
وما حدش منهم جاني يرضي فيا ولا حتى قال وينها
جاني عمي اماخر نحسابه يرضي فيا( للعلم اول ما تمت صلاة العيد مشيت عيدت على عمي وعمتي ورفعت صغاري وروحت)
جي عمي يعارك فيا بري رضي سلفتك والا ماعادش نكلمك قتله هي يلي غلطت فيا مانمشيش
في الليل مشيت باش نعيد على سلفي
تلقتني عزوزتي قتلي وينك لتوا قلتلها انا زعلانه وخاطري مكسور ونبكي للصبح ومعيدة بروحي من غير اي غلط مني ماتقوليش والله لازم اتعيدوا مع بعض وتحلفي عالكل انه لازم انجي ونحضر 3سنوات ما قصرتش معاك توا على خاطر شغاله خلاص كنت مجرد شغاله مافيش اعتبار لكوني كنتك وام احفادك
قتلي لا انتي كنتي تجي بروحك هدا حوش العيله
قلت:انا زعلانه ومجروحه
جتني زي الغوله سلفتي من الكوجينه تسب وتلعن وتقولي انتي لازم اتجي وتغسلس وتنظفي وانتي يلي قلتي مش ملزومه بعمتيوانتي انتي
وماخلت من خرارتها شي حاشاكم
ما سكتش وقلتها انتي تسكتي وكلامي وعتبي على عزوزتي وانتي ماعنديش كلام معاك تصيحي زي المصريات العوالم
ناضت زي المجنونه انا دكتورة يا حلوة قلتلها حتى انا دكتورة قالت انا ماجستير مش بكالوريوس
قلتها الشهادة مهما كبرت ماتعلمش الادب انا بادبي
وبدت تعيط انت قليله الاحترام
نطيت فيها وقلت لعمتي حسبي الله فيكم جيت بنعيد على سلفي ونلوم عليك من باب لوم الكنه والبنت بس خدلتوني وطلعت
تاني يوم مشيت الصبح لعزوزتي لابسه وملبسه صغاري وكان جوها حلو وفرحت بينا قعمزنا جنبها نص ساعه وجي سلفي عيدت اعليه وبعدها مشيت لحوش بوي وروحت اماخر
هادي القصة
وللعلم امي لتوا ما حكيتلهاش لان ماحبيتش نزعلها ممكن اليوم نحكيلها
بس بجد سلفتي قدرت تبسل الجو وتعكر العيد اعليا
اول يوم طيبت وما كليت شي وما اطعمت شي وامس كليت من نفس واسعه في حوش بوي
وعام داير سايورا نتسامحوا بس ياجارتي عاركيني وخلي باش تقابليني
ولكم كل الحريه والمجال للتعليق والمشورة
في انتظار قصة اختنا ايه....

[ام وسونة]

هايات عالحلوات

كيفكم وشن احوالكم

لالالالا كل شئ الاوخيه ليبيا ام ناريز

والله مانقدر على زعلك عموما كل سنة وانتي طيبة

وووووووووووووووووه صنة الثومة شن هدا ياتمورة

يبس ريقك قلبتي المنتدى بعد ماجبت الصفر وبعدها

بخرت وعطرت وجبت الخويتمات ودليليعات

حراااااااااااااااااااام عليك ضيعتي تعبي

لكن عقابك عند ميرااااااااااس اين انتي ياميراس

وخيه ميمونة كيفك وكيف حال عويلتك

ووخياتي ام روفيدة وام محمد واية ويقين كيفكم

[ام وسونة]

وتوا الرد خاااااااص لوخيه عيون

كيفك وكيفا زوزك وصغارك

وبالنسبة لسلفتك هادي شكلها وحدة ناوياتك بالهلبة

من ليلة الموسم خاطرها في عركة احسن حاجة درتيها

عيدتي بروحك وخليتيهالها واسعة وعريضة ....

لكن بصدق المفروض عيدتي عليها لان العيد

حتى اللي بيناتهم رقب يتسامحوا انتي عيدتي ورميتي

دنوبك عليها وبعدين العيب على زايد العقل والباين

هي عقلها صغير فلهدا فوتيييهااااااا,,,,,,

ههههههه الحمدلله ماعنديش سلفات

لكن صحة ليها قدرت ادير غسيل مخ لعمك وعمتك هادوا

اللي يقولوا عليهم فالحات يلا ايام وبتفوت على قولتك

وتتراضوا بس المواجع علاش ؟؟؟؟؟

[ام وسونة]

جبتلكم شوية دبيلات

[ام وسونة]

[ام وسونة]

بصراحة كلهم عجبوني هههههههههههه

خلي نغيروا اجواء الثومة

[ميمونة]

السلام عليكم

كيف حالك عيــــــــــــــــــــــــون الله يسلمك وعقبالك في حجه انتي وبعلك

بالنــــــســـــــــــــبه لقصتك اثرت فيا هلبه بصراحه ماصح وجهها وماره عليا قصص هالشكل عيني عينك كيف تجئ اصلا انتم الزوز في حوش العزوزه كيف هيا تقعمز وانتي عادي المشكله انها الشغاله جايه جايه وبتدفعي من جيبك لاحول ولا قوة الا بالله بس احسن عيدتي في حوشك ارتحلك ولا الاهانه وبعدين انتي درتي واجبك ومشيت عيدتي علي حوش العيله الاول هدا يكفي ورجعتي ومشيتي قعدت الحشمه في وجهها هده معبيه راس عزوزتك وشبانيك فالحه بس الله غالب الواحد يدير باصله وخليك ديما الباهيه ومعاش تفتحي الموضوع حتي مع راجلك نصيحه هو يشوف بعينه تصرفاتها مش ضروري تتبرري وهيا ربي ياخد حقك منها مش عارفه كيف الناس تفكر تعرفي عيـــــــــــــــــــــــون انا دمي انحــــــــــــــــرق مابعدك واكيده علي هالحاله شوق مواقف تحطك فيهم ربي يهديها وانتي فوتيها ورضي اهل زوجك ولو غالطين علي خاطر عيون راجلك بس وانتي درتي الباهي ربي يوسعلك بالك

[ميمونة]

ام وسونه والله الثوم غالب ربي يهديها تمــــــــــــــــوره اشبح قداش تخليها ههههههههههههههه

[عيون زوجي]

الله غالب
حسبي الله ونعم الوكيل
لو كان خاطر في بالي 1% انه ممكن نعيد في حوشي لكنت تقبلت بس العيد في حوش العيله امر مسلم به وواجب
بس راجلي حكالي شن يهدرز مع امه ومن بين السطور فهمت انه عمتي مش فارقه معاها المهم حد يخدمها ويضم الحوسه
اما حكايه اللمه وجو العيله عادي امر ثانوي
قلت العام الجاي كان سخر ربي انجيبلها شغاله زي سلفتي وكل وحدة تخدمها شغالتها ونقعمزوا في الصالون زي اي يوم عادي
دار الله ماعندناش ايديات والا صغيرونات اعمارنا 10 سنين مانعرفوا شي
وهكي كل وحدة ترتاح وبلا عراكات ولا حسبانيه
لما تحسي انك دروك في العيله تقدر تاخده سلفتك توجعك لكن تفوتي الموضوع لانه زيك زيها في الحوش
لكن دورك ومكانك تاخده شغاله مغربيه ويستغنوا اعليك
توجعك وتهدلك حيلك
الله المستعان

[عيون زوجي]

ميمونه عندك اخوات بنات ونساوين خوت والا لا
وربي يهنيك
ام وسونه ارتحتي توا من نفخ الدماغ
نسيت بكري ما سلمتش على ام ناريز وبوسي كيف حالكم يا امورات وجو الخمس وزواية الدهماني
ويارب يرجع النت لسبها ونطمن على حبل الوصل