تجمع حوامل ليبيا

[عيون زوجي]

كل سنه وانتم طيبات وحبوبات وحلوات
انا اول وحدة تخش اتعيد ليا الشرف انعيد عليكم
وتقبل الله اضاحيكم جميعا

[ميمونة]

صباح الخير

كل عام وانتم بخير وتقبل الله ضحيتكم

[ميمونة]

عيون الحمدلله علي سلامتك شن حالك وحال اسرتك وكل عام وانتي بخير والله انشغلت عليك المهم حالك باهي والارضي رجعوه خلاص معاش عندك عذر خشي وهدرزي عليا


ع

[عيون زوجي]

ربي يهنيكم ام وسونه وميراس
ويشفيكم ويعافيكم من كل عله
بحبحوا دعوة عالصبح في يوم العيد
تو اتقولوا هالمرا شنو ادير في يوم العيد الصبح عالنت
اولا قعدين ما دبحناش راجلي وبوه امشوا ايعيدوا على جيراننا يلي فقدوا اولادهم ربي يصبرهم
وتانيا فيه قصة تانيه حزينه ههههههههه الله غالب
تصدقوا من امس لتوا ما رقدتش حتى غمضة من الغشش والسحن
دارت فيا سلفتي مقلب هكي كبره
تو نحكيهولكم بعدين لما نتلاقوا
توا جوي باهي وخروفي يبعبع قدام حوشي وريحة الوشق امفوحة المكان كله
ووليدي مع بوه وبنتي خايفة جنبي تقولي حروف بالحاء لا ياماما
ميراس شنو جو تونس وعيدها وشن اخبار اماليك
وام وسونه باش تحكيلنا جو العيد وقداش عندك سلفة ومنو غسل البطن امممممممم انخمم تعرفي ولا لاء؟

[عيون زوجي]

ميمونه ماشاءالله اعليك فالحه ربي يفرح قليبك بلي تتمني
انا البارح شريت كعك بالتمر انحبه وخلاص للشاهي
بنسئلك اوخيتي كيف حال ايه من يوم وفاة راجل اختها ما خشتش زعما شنو صاير فيها وروح خوها بالسلامه ولا شنو طمنيني
وام قصي روحوا اهلك بوك وخوتك وكيف استقبلتوهم هالابطال
تمر حنه يا صبراتيه انتي ويقين بتدبحوا في الحوش ولا السلخانه
ولا بعض ناس بتعيد عالدجاج
خواتنا من الشرق شنو اسعار الخرفان عندكم انتم تقولوا حولي صح؟
اليوووووووووووم الطقس راااااائع جدااااااااااا
ينعاد عليكم بالصحه والسلامه وعام داير ان شاءالله
نتلاقوا بعد ما نكمل حوستي

[عيون زوجي]

هادي رساله هديه لميراس....
يا اجليل منك وجعتنا.....تبي تزوج رجالتنا....بعد قولت ليبيه حره.....يبي يجيب اعليا ضره......اجليل مافيه محنه.....بيسحبها التوقيعه منا.....هاون واربعطاش ونص....وراس يقص......ضره في حوشي ما تخش


ههههههههههههههههههههه عجبتني نقلتها...

[عيون زوجي]

شيف ايمان مبروك عيدك وعام داير
كيف حالك يا اوخيتي ينعاد عليك براحة البال وحياة جديدة وحلوة
وربي يكتبلك يلي فيه الخير يارب

[ميمونة]

الله يسلمك عيوت

تعرفي توا نستنو في جيرانا باش يدبحلنا تعرفي اهلي في الحج غقبالكم وانا الكبيره في البنات وخوي مواليد 81 مايدبحش بس ياناري يخمم والله نرفعوه للجزار يقطعه بعدين مانبيش ندير قديد قالو الناس حدرو عليه قالوا في فيروس في الذباب والله اعلم

اما العصبان طبعا توا حطيته عالنار عندي مصاريين داستهم في الفريز طلعت حشيتهم --والحشو قطعته البارح وقريب يطيب صنته يفوح والله مانحكيلكم يسلم ايديتي

وكل عام وانتم بخير

[ميمونة]

عيــــــــــــــــــــــــــــــــــون تبي شئ تفضلي معي الشيف ايمان ماتخممي حار وحلو

بالنسبه ايه والله امس كلمتني والله هدرزنا قريب ساعه وانا نغسل في الماعين وهيا ادير في المخلل المسير سفهتني فيه ونهدرزوي هههههههههه حالها تمام والحمد لله

[تمر حنة]

السلام عليكم ورحمة الله وبركاته

كل سنة وانتم بخير وعيدكم مبارك ان شاء الله

اول حاجة بنحكيلكم شن صار معانا بخصوص الاضحية
آمس العصر راجلي كلم صاحبه يباركله بمناسبة العيد ويهدرز عليه وهو الراجل هذا ليبي وليه سبعة سنوات مقيم في ماليزيا المهم سأله راجلي قال له كيف داير في الاضحية انا ماقدرتش نشريه الاسترالي مشي صاحبه قال لا انا نعرف واحد ايبيع في خرفان مستوردات من دول عربية وخليجية وقال انه هو ديما يتعامل معاه ومضمون ان شاء الله بعدين مشوا للشخص هذا وهو في منطقة بعيدة علينا شوية عالعموم شرينا الخروف و وصل راجلي للحوش قريب الساعة 3 في الليل واليوم ذبح راجلي في مزرعة دكتور ماليزي صاحبه ومشت الامور الحمد لله وتوا كيف كملت الحوسة الساعة 8 في الليل لانهم ذبحوا موخر
ههههههههههه الحمد لله نكاية فيكم ياشمايتيات قعدتوا هازيات عليا والسيدة عيــــــــون اللي ديما ننشد عليها حتى هي خاشة تحدف في الدوة وتتهزى دجاجة ما دجاجة هههههههه وغدوة العصبان ان شاء الله لان اليوم ماعنديش خضرة مانحسابش نبوا نذبحوا
ام وسونـــــــة غسلتي البطن وإلا قعدة تمزرطي هههههههه نتخايل فيك لوحتيها كلها
اسمعي اللي تلقيه صاعب تنظيفه لوحيه وكان راجلك سألك خيره شوية قوليله خرفان تونس بلا مصارين مش كيف الليبي ههههههه